រាជធានីភ្នំពេញ ៖ ជនសង្ស័យចំនួន៦នាក់ ក្នុងនោះមានមុខសញ្ញាលួច និងប្លន់ប្រដាប់អាវុធ ត្រូវបានកម្លាំង នគរបាលនៃអធិការដ្ឋាននគរបាលខណ្ឌដង្កោ ធ្វើការស្រាវជ្រាវរហូតឈានដល់ការចាប់ខ្លួនបានជាបន្តបន្ទាប់។ ដោយឡែកនៅវេលាម៉ោង៤ល្ងាច ថ្ងៃទី៣១ ខែតុលា ឆ្នាំ២០១៨ នគរបាលខាងលើបានបង្ហាញមុខជនសង្ស័យ ទាំងនោះរួមទាំងវត្ថុតាងដែលដកហូតបានជាសាធារណៈដើម្បីត្រៀមបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់នាថ្ងៃបន្ទាប់។ ប្រតិបត្តិការឃាត់ខ្លួនក្រុមជនសង្ស័យខាងលើ នោះក្រោមការដឹកនាំដោយផ្ទាល់ និងដាក់ផែនការច្បាស់លាស់ពីសំណាក់លោកវរៈសេនីយ៍ឯក ជឹម ស៊ីថា អធិការនគរបាលខណ្ឌ។
ជាពិសេសក្រោមការណែនាំបញ្ជាដោយលោកឧត្ដមសេនីយ៍ ស ថេត ស្នងការនគរបាលរាជធានីភ្នំពេញផងដែរ។ ចំណែកក្រុមជនសង្ស័យទាំង៦នាក់ដែលត្រូវឃាត់ខ្លួននោះរួមមានមុខសញ្ញាប្លន់ប្រដាប់អាវុធ២នាក់ មុខសញ្ញាកាច់សោកម៉ូតូ៣នាក់ និងគាស់ផ្ទះម្នាក់។ ព្រមទាំងដកហូតបានវត្ថុតាងមួយចំនួនមានដូចជា កាំភ្លើងខ្លីមួយដើម សម្ភារកាច់សោកម៉ូតូ និងគាស់សោទ្វារផ្ទះរួមទាំងម៉ូតូសម្រាប់ធ្វើសកម្មភាពចំនួន៤គ្រឿង ផងដែរ។ នគរបាលបានឲ្យដឹងថា ករណីទី១គឺសកម្មភាព ប្លន់ប្រដាប់អាវុធមិនបានសម្រេចដែលបង្កឡើងដោយ ជនសង្ស័យ២នាក់ បានជិះម៉ូតូដេញតាមធាក់ប្លន់យកម៉ូតូ១គ្រឿងពីយុវជនម្នាក់។
ខណៈដែលជនរងគ្រោះ កំពុងជិះម៉ូតូម្នាក់ឯង កាលពីវេលាម៉ោង៩ និង៣០នាទីយប់ ថ្ងៃទី២៩ ខែតុលា ឆ្នាំ២០១៨ នៅត្រង់ចំណុចស្ថានីយប្រេងសាំងតេលា ស្ថិតនៅតាមផ្លូវបេតុងព្រៃស នៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។ ជនសង្ស័យខាងលើនោះម្នាក់ឈ្មោះ ម៉ាក់ ឡុង អាយុ២២ឆ្នាំ មានទីលំនៅក្នុងភូមិព្រៃសលិច សង្កាត់ព្រៃស ខណ្ឌដង្កោ និងម្នាក់ទៀតឈ្មោះ ជា សេងដា ហៅវឿន អាយុ២៩ឆ្នាំមុខរបរជាមន្ត្រីយោធាជើងទឹក មានទីលំនៅក្នុងភូមិជាមួយគ្នា។ អ្នកទាំង២បានធ្វើសកម្មភាពប្លន់យកម៉ូតូម៉ាកហុងដាស្គូពី១គ្រឿងពីយុវជនម្នាក់ ឈ្មោះ ពិត ទិត្យ អាយុ២៥ឆ្នាំ មុខរបរលក់ដូរ ស្នាក់នៅផ្ទះលេខ២៧២ ផ្លូវលេខ១ បុរីពិភពថ្មីចំការដូង ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។ និងមានស្រុកកំណើតនៅក្នុងភូមិនាល ឃុំតាំងដូង ស្រុកបាទី ខេត្ដតាកែវ។
នៅមុនពេលកើតហេតុជនរងគ្រោះបានជិះម៉ូតូម្នាក់ឯង ចេញពីបុរីពិភពថ្មីចំការដូង ទៅលេងម្ដាយនៅស្រុកកំណើត លុះពេលទៅដល់ត្រង់ចំណុចកើតហេតុខាងលើស្រាប់តែត្រូវជនសង្ស័យជិះម៉ូតូ បិទភ្លើងដេញតាមកៀរប្លន់។ ប៉ុន្តែមិនបានសម្រេចបន្ទាប់មកជនរងគ្រោះបានប្ដឹងឲ្យនគរបាលជួយអន្តរាគមន៍ ហើយលោកវរៈសេនីយ៍ឯក ជឹម ស៊ីថា អធិការនគរបាលខណ្ឌ ក្រោមបញ្ជាដោយលោកឧត្តមសេនីយ៍ស ថេត ស្នងការនគរបាលរាជធានីភ្នំពេញ។ ចុះធ្វើការស្រាវជ្រាវ រហូតដល់វេលាម៉ោង១ថ្ងៃត្រង់ ថ្ងៃទី៣០ ខែតុលា ឆ្នាំ ២០១៨ ទើបចាប់ខ្លួនជនសង្ស័យបាននៅត្រង់ចំណុចក្បែររោងចក្រស្រាបៀរក្រោន ស្ថិតនៅតាមផ្លូវបេតុងព្រៃស ភូមិព្រៃសកើត សង្កាត់ព្រៃស។ ដោយដកហូតបានវត្ថុតាងរួមមាន អាវុធខ្លីម៉ាក K59 លុបលេខមួយដើម ម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ 1GZ-9350 លេខតួ និងលេខម៉ាស៊ីន 5248634 មួយគ្រឿង។ ទូរស័ព្ទម៉ាក LGមួយគ្រឿង,វិទ្យុទាក់ទង(អាយឌី) លេខ 706157 មួយគ្រឿង, នាឡិកាដៃម៉ាកសាប់ភីរី មួយគ្រឿង,គ្រាប់កាំភ្លើងខ្លីចំនួន០២គ្រាប់។
ករណីទី២ជនសង្ស័យ៣នាក់ បានចេញធ្វើសកម្មភាពកាច់សោកម៉ូតូ ទាំងថ្ងៃ ប៉ុន្តែមិនទាន់បានកាច់ផងក៏បានជួបកម្លាំងនគរបាលខាងលើកំពុងល្បាតទប់ស្កាត់បទល្មើស នៅក្នុងមូលដ្ឋាន ហើយដោយមានការសង្ស័យនគរបាលឃាត់ខ្លួនតែម្ដង។ ហេតុការណ៍នោះបានកើតឡើង កាលវេម៉ោង២រសៀល ថ្ងៃទី៣០ ខែតុលា ឆ្នាំ២០១៨ នៅត្រង់ចំណុចដីឡូត៍មួយកន្លែង ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។ ជនសង្ស័យខាងលើរួមមាន១-ឈ្មោះ ផល វាសនា ហៅត្រា អាយុ២៤ឆ្នាំ មានទីលំនៅភូមិដើមមាន សង្កាត់ដើមមាន ក្រុងតាខ្មៅ ខេត្តកណ្តាល។ ២-ឈ្មោះ យូ ផាន់នាង អាយុ១៧ឆ្នាំ ជនជាតិខ្មែរ ៣-ឈ្មោះ ម៉ាត់ តាំ អាយុ៣៣ឆ្នាំ ជនជាតិខ្មែរឥស្លាម មុខរបររត់ម៉ូតូឌុប អ្នកទាំង២នាក់នេះ មានទីលំនៅភូមិព្រែកតាពៅ សង្កាត់ដើមមាន ក្រុងតាខ្មៅ ខេត្តកណ្តាល។
នគរបាលដកហូតវត្ថុតាងមួយចំនួនមាន ដែកជ្រុងសំប៉ែតចុងស្រួចមួយ, សោរដោះម៉ូតូមួយកំប្លេ, ម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1I-3290 លេខតួ និងលេខម៉ាស៊ីន 341771មួយគ្រឿង,ម៉ូតូម៉ាកយ៉ាម៉ាហាស៊ីរុស ពណ៌ខ្មៅ ពាក់ស្លាកលេខ កណ្តាល 1Q-2612 លេខតួលេខម៉ាស៊ីន 22421 មួយគ្រឿង,ទូរស័ព្ទដៃចំនួន៣គ្រឿង។ ករណីទី៣ សកម្មភាពគាស់ផ្ទះបង្កឡើងដោយជនសង្ស័យម្នាក់ ហើយត្រូវបានកម្លាំងនគរបាលខាងលើចាប់ខ្លួន កាលពីវេលាម៉ោង១ និង៣០នាទីរសៀល ថ្ងៃទី៣០ ខែតុលា ឆ្នាំ២០១៨ នៅត្រង់ចំណុចផ្ទះលេខ៣៩៧ ផ្លូវបេតុង ស្ថិតនៅក្នុងភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ។ ជនសង្ស័យរូបនោះ ឈ្មោះ ផាត រ័ត្ន អាយុ២០ឆ្នាំ ស្នាក់នៅផ្ទះជួល ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
នគរបាលដកហូតបានម៉ូតូម៉ាក Suzuki Smash ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1AA-3708 មានលេខតួ BE4EM 111001 លេខមាស៊ីន E480-111001 មួយគ្រឿង,ទួណឺវីសចំនួន៣ ,ពិលតូចមួយ; និងមេដែកឆក់មួយ។ ជនសង្ស័យខាងលើបានគាស់ផ្ទះលេខ៣៩៧ ផ្លូវបេតុង ភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ដែលមានម្ចាស់ឈ្មោះ កុយ អ៊ន អាយុ៧១ឆ្នាំ។ គួរកត់សម្គាល់ផងដែរថា ជនសង្ស័យទាំង៦នាក់នោះសុទ្ធតែមានសារធាតុញៀននៅក្នុងខ្លួន ហើយនគរបាលបានកសាងសំណុំរឿង រួចរាល់ហើយព្រមទាំងបង្ហាញមុខជាសាធារណៈ មុននឹងបញ្ជូនទៅតុលាការនាថ្ងៃទី១ ខែវិច្ឆិកា ចាត់ការតាមច្បាប់៕
https://youtu.be/59jzvWpLBhk
ចែករំលែកព័តមាននេះ