ទីក្រុងវ៉ាស៊ីនតោន ៖ មិនយូរប៉ុន្មានបន្ទាប់ពីលោកប្រធានាធិបតី ដូណាល់ត្រាំ (Donald Trump) របស់សហរដ្ឋអាមេរិក បានប្រកាសកាលពីខែឧសភាថា នឹងដាក់ទណ្ឌកម្មលើប្រទេសអ៊ីរ៉ង់សាជាថ្មី ក្រសួងការបរទេសអាមេរិកបានចាប់ផ្តើមប្រាប់ដល់ប្រទេសជុំវិញពិភពលោកឲ្យកាត់បន្ថយការទិញប្រេងពីអុីរ៉ង់ដល់កម្រិតសូន្យ…
ទីក្រុងវ៉ាស៊ីនតោន ៖ មិនយូរប៉ុន្មានបន្ទាប់ពីលោកប្រធានាធិបតី ដូណាល់ត្រាំ (Donald Trump) របស់សហរដ្ឋអាមេរិក បានប្រកាសកាលពីខែឧសភាថា នឹងដាក់ទណ្ឌកម្មលើប្រទេសអ៊ីរ៉ង់សាជាថ្មី ក្រសួងការបរទេសអាមេរិកបានចាប់ផ្តើមប្រាប់ដល់ប្រទេសជុំវិញពិភពលោកឲ្យកាត់បន្ថយការទិញប្រេងពីអុីរ៉ង់ដល់កម្រិតសូន្យ ។
យុទ្ធសាស្ត្រនេះមានគោលបំណងដាក់សម្ពាធលើសេដ្ឋកិច្ចដែលពឹងផ្អែកលើប្រេងរបស់អ៊ីរ៉ង់ និងបង្ខំឲ្យអ៊ីរ៉ង់បោះបង់ចោលមហិច្ឆតាអាវុធនុយក្លេអ៊ែរ កម្មវិធីកាំជ្រួចផ្លោង និងឥទ្ធិពលលើប្រទេសស៊ីរីជាដើម ។
ខណៈដែលនៅសល់ប៉ុន្មានថ្ងៃទៀតប៉ុណ្ណោះមុននឹងការដាក់ទណ្ឌកម្មចាប់មានប្រសិទ្ធភាពនៅថ្ងៃទី៥ ខែវិច្ឆិកា អតិថិជនធំៗទាំងបីរបស់អ៊ីរ៉ង់ដែលរួមមាន ប្រទេសឥណ្ឌា ចិន និងតួកគី កំពុងតែប្រឆាំងនឹងសំណើរបស់អាមេរិកឲ្យឈប់ទិញប្រេង ដោយអះអាងថា មិនមានការផ្គត់ផ្គង់គ្រប់គ្រាន់សម្រាប់ជំនួសប្រេងទាំងនេះ ។
សម្ពាធនេះ បូកផ្សំជាមួយនឹងកង្វល់ពីកំណើនតម្លៃប្រេង កំពុងតែធ្វើឲ្យរដ្ឋាភិបាលលោកប្រធានាធិបតីត្រាំជួបការលំបាក និងអាចបង្កឲ្យមានកិច្ចព្រមព្រៀងទ្វេភាគីដែលអនុញ្ញាតឲ្យមានការទិញបន្ត ។
ភាពតានតឹងនេះបានបំបែករដ្ឋាភិបាលលោកត្រាំទៅជាពីរក្រុម ដែលមានមួយក្រុមត្រូវបានដឹកនាំដោយទីប្រឹក្សាសន្តិសុខជាតិលោក John Bolton ដែលចង់បានគោលជំហររឹង ខណៈដែលក្រុមមួយទៀតត្រូវបានដឹកនាំដោយមន្ត្រីការបរទេសដែលចង់ស្វែងរកលំនឹងរវាងការដាក់ទណ្ឌកម្មនិងកំណើនតម្លៃប្រេងដែលអាចប៉ះពាល់ដល់សហរដ្ឋអាមេរិក និងសម្ព័ន្ធមិត្ត ។
ប្រភពមួយបានឲ្យដឹងថា ព្រោះតែកង្វល់លើតម្លៃប្រេង រដ្ឋាភិបាលលោកត្រាំកំពុងតែពិចារណាលើការអនុញ្ញាតដល់អតិថិជនអ៊ីរ៉ង់មួយចំនួនឲ្យទិញប្រេងពីរុស្ស៊ី និងអារ៉ាប៊ីសាអូឌីត ដើម្បីបង្កើនប្រេងផ្គត់ផ្គង់នៅឆ្នាំក្រោយ ៕
ចែករំលែកព័តមាននេះ