ខេត្តព្រះសីហនុ ៖ រថយន្តមួយគ្រឿងបើកបរក្នុងល្បឿនលឿនបានរេចង្កូតមកខាងឆ្វេងដៃបុកនឹងរនាំងពុះចែកផ្លូវ រួចបោកក្រឡាប់ត្រឡប់ក្រោយ បណ្តាលឱ្យយុវជនម្នាក់បានស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង៤ល្ងាចថ្ងៃទី៣០ ខែតុលា ឆ្នាំ២០១៨ នៅលើវិថីផែ ចំណុចចំណោតលោកយាយម៉ៅ…
ខេត្តព្រះសីហនុ ៖ រថយន្តមួយគ្រឿងបើកបរក្នុងល្បឿនលឿនបានរេចង្កូតមកខាងឆ្វេងដៃបុកនឹងរនាំងពុះចែកផ្លូវ រួចបោកក្រឡាប់ត្រឡប់ក្រោយ បណ្តាលឱ្យយុវជនម្នាក់បានស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង៤ល្ងាចថ្ងៃទី៣០ ខែតុលា ឆ្នាំ២០១៨ នៅលើវិថីផែ ចំណុចចំណោតលោកយាយម៉ៅ ស្ថិតក្នុងភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ។
ជនរងគ្រោះដែលស្លាប់ឈ្មោះ វ៉ាន់ ភេទប្រុស អាយុ២៨ឆ្នាំ មុខរបរអ្នកបើកបររថយន្ត មានទីលំនៅ ស្រុកស្ទឹងហាវ ខេត្តព្រះសីហនុ ។
លោកវរសេនីយ៏ឯក ព្រហ្ម ពៅ នាយការិយាល័យចរាចរណ៏ជើងគោកខេត្តព្រះសីហនុ បានគូសបញ្ចាក់នៅកន្លែងកើតហេតុថា ករណីគ្រោះថ្នាក់ចរាចរណ៍ដែលបង្កឡើងដោយខ្លួនឯងនេះ គឺរថយន្តបែនដឹកខ្សាច់ មួយគ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខ តាកែវ ៣A-០៦៣៨ បើកបរ ដោយយុវជនម្នាក់ ធ្វើដំណើរពីឃ្លាំងលើឆ្ពោះទៅកែងរ៉ា លុះដល់មកចំណុចខាងលើស្ថានភាពផ្លូវចុះចំណោតលោកយាយម៉ៅ ដោយរថយន្តមានល្បឿនលឿនផងនោះ ក៏រេចង្កូតមកខាងឆ្វេងដៃបុកនឹងរនាំងពុះចែកផ្លូវ រួចបោកក្រឡាប់ត្រឡប់ក្រោយ បណ្ដាលឲ្យ អ្នកបើកបររថយន្តខ្ទាតចេញក្រៅស្លាប់តែម្ដង ។
ក្នុងករណីគ្រោះថ្នាក់ខាងលើនេះបណ្ដាលឲ្យរងការខូចខាតរបាំងពុះចែកផ្លូវអស់ចំនួន៩ផ្ទាំង និងបង្គោលភ្លើងបំភ្លឺផ្លូវចំនួន១ដើម ។ ចំណែករថយន្តម៉ាកហ៊ីយ៉ាន់ដាយបានរងការខូចខាតធ្ងន់ ។
ក្រោយពេលកើតហេតុ រថយន្តខាងលើត្រូវបានសមត្ថកិច្ចចាត់ចែងស្ទូចយកទៅរក្សាទុកនៅ ការិយាល័យនគរបាលចរាចរផ្លូវគោកដើម្បីរង់ចាំធ្វើការដោះស្រាយ ។
សូមបញ្ជាក់ផងដែរ ត្រង់ចំណុចចំណោតលោកយាយម៉ៅ ក្រុងព្រះសីហនុ នាមួយរយៈចុងក្រោយនេះ បានក្លាយជាចំណុចគ្រោះថ្នាក់បំផុត បន្ទាប់ពីមានរថយន្តធន់ធំជាច្រើនគ្រឿង បានបុកគ្នា និងក្រឡាប់ដោយខ្លួនឯង បណ្តាលអោយមានមនុស្សរងរបួស និង បាត់បង់ជិវិតជាច្រើននាក់ផងដែរ ដែលកត្តាទាំងនេះ ត្រូវបានមតិមហាជនជាច្រើនបានឱ្យដឹងថា ចំពោះមូលហេតុដែលបង្កអោយមានគ្រោះថ្នាក់ទាំងនេះ គឺភាគច្រើនមកពីអ្នកបើកបររថយន្ត បើកបរខ្វះការប្រុងប្រយ័ត្ន, រថយន្តពុំមានលក្ខណៈបច្ចេកទេសត្រឹមត្រូវ, បើកបរហួសល្បឿនកំណត់ គួបផ្សុំជាមួយកត្តាផ្លូវថ្នល់ផងដែរ ៕
ចែករំលែកព័តមាននេះ