រាជធានីភ្នំពេញ ៖ អគារចាស់នៃមន្ទីរពេទ្យព្រះកុសុមៈ ឬមន្ទីរពេទ្យព្រះសង្ឃ ដែលមានចារឹកអក្សរឆ្លាក់ធំៗលើអគារខ្ពស់ជាងគេថា «មន្ទីរសង្ឃព្រះកុសុមៈ» កំពុងធ្វើឱ្យមានការចាប់អារម្មណ៍យ៉ាងខ្លាំង ពីមហាជន ហើយនៅលើបណ្តាញសង្គមមួយចំនួន ក៏បានរិះគន់យ៉ាងខ្លាំងផងដែរ…
រាជធានីភ្នំពេញ ៖ អគារចាស់នៃមន្ទីរពេទ្យព្រះកុសុមៈ ឬមន្ទីរពេទ្យព្រះសង្ឃ ដែលមានចារឹកអក្សរឆ្លាក់ធំៗលើអគារខ្ពស់ជាងគេថា «មន្ទីរសង្ឃព្រះកុសុមៈ» កំពុងធ្វើឱ្យមានការចាប់អារម្មណ៍យ៉ាងខ្លាំង ពីមហាជន ហើយនៅលើបណ្តាញសង្គមមួយចំនួន ក៏បានរិះគន់យ៉ាងខ្លាំងផងដែរ ខណៈដែលគម្រោងសាងសង់មន្ទីរពេទ្យក៏ត្រូវបានបន្ថែមឈ្មោះមន្ទីរពេទ្យនេះដែរ គឺមន្ទីរពេទ្យមិត្តភាពកម្ពុជា-ចិន ព្រះកុសុមៈ ត្រូវបានបើកការដ្ឋានសាងសង់ កាលពីព្រឹកថ្ងៃទី៣០ ខែតុលា ។
អ្វីដែលធ្វើឱ្យមហាជនរិះគន់នោះ គីនៅពេលថ្មីៗនេះ ខ្លោងទ្វារការដ្ឋានអគារមន្ទីរពេទ្យដែលជាជំនួយរបស់មហាមិត្តចិន ត្រូវបានគេដាក់រំលេចអក្សរជាភាសាចិនធំៗពីលើ ឯអក្សរខ្មែរគេដាក់នៅពីក្រោមហើយតូច ចំណែកស្លាកមន្ទីរពេទ្យព្រះកុសុមៈវិញ ក៏ត្រូវបានគេវាយ ។
បន្ទាប់ពីមានការរិះគន់ស្លាកដែលសរសេរអក្សរចិនធំៗពីលើអក្សរខ្មែរនោះ ត្រូវបានគេដោះចេញវិញ ហើយធ្វើថ្មីដោយដាក់អក្សរខ្មែរធំ និងអក្សរចិនតូចពីក្រោមវិញ ។ ទន្ទឹមនឹងការរិះគន់នោះ ក៏មានមហាជនមួយចំនួនចាប់អារម្មណ៍ និងសួរចោទជាសំណួរថា ចាប់ពេលនេះ ទៅមន្ទីរពេទ្យព្រះកុសុមៈនឹងប្តូរឈ្មោះទៅជា«មន្ទីរពេទ្យមិត្តភាពកម្ពុជា-ចិន ព្រះកុសុមៈ» ទាំងអគារដ៏ទំនើបមួយនោះមិនទាន់មានរូបរាងនៅឡើយឬ
យ៉ាងណា ។
ជុំវិញការរិះគន់ ចំពោះឈ្មោះមន្ទីរពេទ្យព្រះកុសុមៈនេះ មហាជនក៏បានចាប់អារម្មណ៍ពីការចារឹកអក្សរឆ្លាក់
ធំៗរំលេចនៅលើអគារចាស់ពណ៌លឿង ដែលទើបតែលាបថ្នាំថ្មី ដែលសរសេរថា «មន្ទីរសង្ឃពេទ្យកុសុ
មៈ» ។
មហាជនជនមួយចំនួន ដែលពីមុនមកមិនបានចាប់អារម្មណ៍ ក៏បានធ្វើការរិះគន់និងចោទនាយកមន្ទីរពេទ្យថា បានសរសេរខុសដែលគប្បីសរសេរថា មន្ទីរពេទ្យព្រះកុសុមៈ ។ បន្ទាប់ពីមានការរិះគន់ពីគ្រប់មជ្ឈដ្ឋាននេះ កោះសន្តិភាពក៏បានស្វែងរកការពិតមួយពីបញ្ហានេះ ។ តាមនាយករងរដ្ឋបាលនៃមន្ទីរពេទ្យព្រះកុសុមៈ បានឱ្យដឹងថា អក្សរចារឹកដែលសរសេរថា«មន្ទីរសង្ឃពេទ្យកុសុមៈ» នៅជាប់អគារមន្ទីរពេទ្យនោះគឺជាអក្សរចារឹកចាស់ តាំងពីការកសាងមន្ទីរពេទ្យព្រះកុសុមៈមកម្ល៉េះ និងមិនមានការកែប្រែនោះទេ ។
គួរបញ្ជាក់ថា មន្ទីរពេទ្យព្រះកុសុមៈជាមន្ទីរពេទ្យសាធារណៈ ស្ថិតនៅក្បែរស្ពានអាកាស៧មករា ក្នុងខណ្ឌទួលគោក រាជធានីភ្នំពេញ បានកសាងនិងដំណើរការតាំងពីឆ្នាំ១៩៥៦ ក្រោមព្រះរាជូបត្ថម្ភរបស់សម្ដេចព្រះមហាក្សត្រិយានី សុីសុវត្ថិ កុសុមៈ នារីរតន៍ ដែលជាព្រះមាតារបស់ព្រះ បរមរតនកោដ្ឋ ។ មន្ទីរពេទ្យនេះសម្រាប់ព្យាបាលជំងឺព្រះសង្ឃដែលមានឈ្មោះដើមថា «មន្ទីរសង្ឃពេទ្យកុសុមៈ» និង
បានកែសម្រួលមកជាមន្ទីរពេទ្យព្រះកុសុមៈ ហៅមន្ទីរពេទ្យលោកសង្ឃនៅពេលបច្ចុប្បន្ន ។
នៅពេលអនាគត មន្ទីរពេទ្យនេះនឹងក្លាយជាមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលជាមន្ទីរពេទ្យទំនើបមួយមានកម្ពស់១១ជាន់ក្រោមជំនួយរបស់ប្រទេសចិន ក្នុងទឹកប្រាក់សាងសង់ប្រមាណជាង៨០លានដុល្លារ និងសាងសង់ក្នុងរយៈពេល៤០ខែ ។ ទោះបីជាបែបណា អក្សរចារឹកលើអគារចាស់នោះគឺនៅរក្សាឈ្មោះដើមដដែល ៕
ចែករំលែកព័តមាននេះ