ខេត្តស្វាយរៀង ៖ ប្រជាពលរដ្ឋជាច្រើនគ្រួសារដែលរស់នៅអមសងខាងផ្លូវជាតិលេខ១ ចាប់ពីភូមិគោកកណ្តោល ដល់ភូមិក្រោលគោ ស្ថិតក្នុងឃុំក្រោលគោ ស្រុកស្វាយជ្រំ បាននាំគ្នាចាប់យកមុខរបរដាល់អំបុកលក់ដែលជាអាហារប្រពៃណីខ្មែរដំណរតាំងពីដូនតា ហើយក៏ជាប្រពៃណីរបស់ប្រជាជនខ្មែរ តាំងពីបុរាណកាលមក…
ខេត្តស្វាយរៀង ៖ ប្រជាពលរដ្ឋជាច្រើនគ្រួសារដែលរស់នៅអមសងខាងផ្លូវជាតិលេខ១ ចាប់ពីភូមិគោកកណ្តោល ដល់ភូមិក្រោលគោ ស្ថិតក្នុងឃុំក្រោលគោ ស្រុកស្វាយជ្រំ បាននាំគ្នាចាប់យកមុខរបរដាល់អំបុកលក់ដែលជាអាហារប្រពៃណីខ្មែរដំណរតាំងពីដូនតា ហើយក៏ជាប្រពៃណីរបស់ប្រជាជនខ្មែរ តាំងពីបុរាណកាលមក នៅពេលរដូវរំហើយ ចាប់ពីថ្ងៃ១៥ កើតពេញបរមីអស្សុជ រហូតដល់ថ្ងៃ១៥កើត ខែកក្តិក ។
ប្រជាកសិករខ្មែរតែងតែនាំគ្នាដាល់អំបុកទទួលទាន និងសម្រាប់សែនព្រេន ក្នុងពិធីបុណ្យអកអំបុកសំពះព្រះខែ ស្រុកខ្លះធ្វើបុណ្យភូមិដោយរៀបចំពិធីដាល់អំបុករួមគ្នា ក្នុងភូមិទាំងមូលប្រណាំងគ្នាយ៉ាងសប្បាយរីករាយ ។
បើតាមស្ត្រីអ្នកលក់អំបុកម្នាក់បានប្រាប់អ្នកសារព័ត៌មានយើងឲ្យដឹងថា ដោយអំបុកជាអាហារប្រពៃណីប្រជាពលរដ្ឋខ្មែរយើងចូលចិត្តពិសា គ្រួសាររបស់គាត់បានចាប់យកមុខរបរដាល់អំបុកលក់រហូតមកអស់ រយៈពេលជាច្រើនឆ្នាំមកហើយ ។ ប្រភពដដែលបន្តទៀតថា ការដាល់អំបុក គឺងាយស្រួលជាងការងារមួយចំនួនផ្សេងទៀតដោយការងារដាល់អំបុក គឺមិនចាំបាច់ប្រើកម្លាំងច្រើននោះទេ និងចំណេញពេលវេលា ហើយថែមទាំងអាចបង្កើនប្រាក់ចំណូលក្នុងជីវភាពរស់នៅក្នុងគ្រួសារបានមួយកម្រិតផងដែរ ។ ហើយភាគច្រើនពួកគាត់យកស្រូវប្រភេទផ្ការំដួល ផ្កាម្លិះ ដែលក្លិនក្រអូបឈ្ងុយឈ្ងប់មកដាល់ចេញជាអំបុក ដែលមានរស់ជាតិឆ្ងាញ់ និងក្លិនក្រអូបស្រួយ ហើយទុកបានយូរថែមទៀតផង រីឯតម្លៃវិញក៏លក់បានថ្លៃផងដែរ ។
គាត់បានបញ្ជាក់ទៀតថា កាលពីមុនគេតែងតែដាល់អំបុកតាមរបៀបបុរាណដោយត្បាល់ដៃមានមនុស្ស២នាក់ ម្នាក់កាន់អង្រែម្នាក់ទៀត ដៃម្ខាងកាន់អង្រែដៃម្ខាងទៀត កាន់ឈើឆ្គៀសនិងម្នាក់ទៀតជាអ្នកលីញស្រូវ ។
ក្រោយមកមានអ្នករកស៊ីដាល់អំបុកលក់ក៏ច្នៃដោយប្រើត្បាល់ជាន់យកអំបុកវិញ ។ ប៉ុន្តែសម័យឥឡូវងាកមកប្រើម៉ាស៊ីនគោយន្តជំនួសមនុស្ស ជាន់ត្បាល់ការដាល់អំបុកស្វ័យប្រវត្តិព្រោះងាយស្រួលជាង ហើយថែមមិនហត់ផង ។ ប្រភពបន្តទៀតថា អំបុកដែលលក់ចេញក្នុងមួយថង់ស្មើរ និង៨កំប៉ុង គឺតម្លៃ១០,០០០រៀល ទៅ១២,០០០រៀល និងថង់តូចតម្លៃ៥,០០០រៀលស្មើរ និង៤កំប៉ុង និងតម្លៃលក់រាយមួយកំប៉ុង១,២០០រៀល ។
បើតាមអ្នកលក់អំបុកខាងលើបានប្រាប់បន្ថែមទៀតថា ពួកគាត់អាចដាល់អំបុកក្នុងមួយថ្ងៃបានគិតជាស្រូវបានចំនួន៥តៅ ហើយលក់ចេញបាន២០០,០០០រៀល បើមានម៉ូយមកទិញដល់កន្លែង ដើម្បីយកលក់បន្ត ។ បើតាមអ្នកធ្វើដំណើរតាមដងផ្លូវជាតិលេខ១បានឲ្យដឹងថា រូបគាត់រាល់ពេលដែលធ្វើដំណើរតាមផ្លូវជាតិមួយនេះ គឺតែងតែមិនមើលរំលងនោះទេ យ៉ាងហោចណាស់ក៏ចូលទិញបន្តិចបន្តួចដែរ ហើយអំបុកអាចយកមកហូបជាមួយ និងទឹកដូង ឬច្របល់ជាមួយចេកទុំធ្វើក្រម៉ៅថត ឬលីងជាមួយកំពឹសដែលមានរស់ជាតិឈ្ងុយឆ្ងាញ់ ហើយអ្វីដែលពិសេសជាងនេះទៅទៀត គឺយកអំបុកមកសែនព្រេននូវរដូវបុណ្យអុំទូកបណ្តែតប្រទីប អកអំបុក សំពះព្រះខែ ជាបុណ្យប្រពៃណីមួយរបស់ប្រជាជនកម្ពុជា តាំងពីបុរាណតែងតែប្រារព្ធធ្វើពាក់កណ្តាលខែវិច្ឆកា គឺថ្ងៃ១៥កើតពេញបរមីខែកក្តិក ៕
ចែករំលែកព័តមាននេះ