ផ្អើលជិតស្តុបពេទ្យចិន ខណៈពន្លះអស់២គ្រឿងហើយ អត់មានលុយសងលើកដៃសំពះ
- ភ្នំពេញ
រាជធានីភ្នំពេញ ៖ យុវជន២នាក់បានជិះម៉ូតូមួយគ្រឿងក្នុងល្បឿនលឿនខ្វះការប្រុងប្រយត្ន័បានគេចពីម៉ូតូកង់បីមួយគ្រឿងជ្រុលទៅបុករថយន្តពីរគ្រឿងដែលចតស្ងៀមនៅលើផ្លូវ បណ្តាលអោយរថយន្តរងការខូចខាត ចំណែកយុវជនទាំង២នាក់បានរងរបួសតិចតួច ដោយសារអត់មានលុយសងថ្លៃការខូចខាតរថយន្តបានត្រឹមលើកដៃសំពះសុំទោស បង្កការភ្ញាក់ផ្អើលនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី៣០ ខែតុលា ឆ្នាំ២០១៨ ជិតស្តុបពេទ្យចិន…
តាមប្រភព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញ យុវជនវ័យក្មេង២នាក់ បានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ កំពង់ចាម ២D-២៨៣៦ បានធ្វើដំណើរតាមផ្លូវព្រះមុនីវង្សក្នុងទិសដៅពីជើងទៅត្បូង ក្នុងល្បឿនលឿនដូចហោះ ។
លុះមកដល់ចំណុចកើតហេតុ អ្នកបើកបរម៉ូតូបានបើកគេចម៉ូតូកង់បីមួយគ្រឿងដែលធ្វើដំណើរស្របគ្នា ហើយបានងាកចង្កូតទៅខាងស្តាំដៃ ក៍ជ្រុលទៅបុកជាមួយនឹងរថយន្តម៉ាកឡិចស៊ិស RX330 ពណ៌ស ពាក់ស្លាកលេខ ភ្នំពេញ ២AU-៧៥៩០ បណ្តាលអោយរងការខូចខាត ឆ្កូតថ្នាំគូទក្រោយចំហៀងខាងស្តាំបន្តិច ។
ពេលនោះដែរ ម៉ូតូរបស់យុវជនទាំងពីរនាក់មិនទាន់អស់ល្បឿន ក៍ទៅបុកនឹងរថយន្តមួយគ្រឿងទៀតម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ ២AE-៦៤៣២ ដែលចតនៅទិសដៅស្របគ្នា បណ្តាលអោយរងការខូចខាតឆ្កូតថ្នាំផ្នែកគូទក្រោយបន្តិច តែមិនមានគ្រោះថ្នាក់ដល់មនុស្សណាម្នាក់ឡើយ ។ ដោយឡែកភាគីខាងម៉ូតូវិញរងរបួសរលាត់ដៃរលាត់ជើងតិចតួចទាំង២នាក់ និងរងការខូចខាតម៉ូតូតិចតួច ។
ភ្លាមៗនោះដែរ ភាគីរថយន្តពីរគ្រឿងបាននាំគ្នាទាមទារសំណង ដោយអោយខាងម៉ូតូចេញថ្លៃជួសជុលអោយ តែពេលនោះយុវជនទាំងពីរអត់មានលុយនោះទេ គឺបានត្រឹមលើដៃសំពះសុំទោសដើម្បីបញ្ចប់រឿង ហើយត្រូវភាគីខាងរថយន្តម៉ាកកាមរីបាឡែន បានអធ្យាស្រ័យអោយ ហើយបើករថយន្តចេញទៅបាត់ទៅ ។
ចែករំលែកព័តមាននេះ