ខេត្តកំពង់ឆ្នាំង ៖ ឯកឧត្តមបណ្ឌិតទេសរដ្ឋមន្ត្រី គង់ គីម អនុប្រធាន និងជាអគ្គលេខាធិការសមាគមន៍អតីយុទ្ធជនកម្ពុជា និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន មានសប្រសាសន៍ថា សូមលោកប្រធានសមាគមអតីតយុទ្ធជនកម្ពុជាខេត្តកំពង់ឆ្នាំង និងសមាគមន៍អតីតយុទ្ធជនតាមស្រុកត្រូវតែសកម្មយកចិត្តទុកដាក់ចុះពិនិត្យឲ្យដល់លំនៅឋានបងប្អូនអតីតយុទ្ធជន ដើម្បីស្វែងយល់ពីការលំបាកការខ្វះខាត និងសេចក្តីត្រូវការជាចាំបាច់របស់បងប្អូនអតីតយុទ្ធជន នឹងត្រូវតែរួមគ្នាជួយដោះស្រាយសេចក្តីត្រូវការទាំងនោះជូនពួកគាត់ជាបន្ទាន់ ។
មានប្រសាសន៍បែបនេះនៅក្នុងពិធីចុះសាកសួរសុខទុក្ខ និងបានប្រគល់ប័ណ្ណបេឡាជាតិរបបសន្តិសុខសង្គម (ប.ស.ស) ជូនដល់អតីតយុទ្ធជនកម្ពុជា នៅក្នុងខេត្តកំពង់ឆ្នាំង ចំនួន១៩៥០នាក់ នៅក្នុងសាលានយោបាយខេត្ត កាលពីរសៀលថ្ងៃទី៣០ ខែតុលា ឆ្នាំ២០១៨ ។
ឯកឧត្តមបណ្ឌិតបានបន្តទៀតថា បណ្ណ័បេឡាជាតិរបបសន្តិសុខ ចែកជូនបងប្អូននៅពេលនេះ គឺមានសារប្រយោជន៍នៅពេលបងប្អូនអតីតយុទ្ធជនមានជំងឺ អាចអញ្ជើញទៅព្យាបាលជំងឺតាមគ្រប់មន្ទីរពេទ្យ និងមណ្ឌលសុខភាព ដោយឥតគិតថ្លៃ ។ ទាំងនេះជាការយកចិត្តទុកដាក់របស់ប្រមុខរាជរដ្ឋាភិបាលដឹកនាំដោយ គតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ដោយឡែកនៅពេលបង្អូនអតីតយុទ្ធជនស្លាប់ សមាគមន៍ត្រូវតែរូតរះបើកប្រាក់មរណៈសង្គ្រោះជូនក្រុមគ្រួសារគាត់ឲ្យបានទាន់ពេលវេលា ដើម្បីដោះស្រាយឲ្យទាន់ពេលក្នុងពេលធ្វើបុណ្យសព ដោយមិនត្រូវអសកម្ម ឬពន្យាពេលដោយគ្មានមូលហេតុនោះឡើយ ។ នៅក្នុពិធីនេះដែរលោកឧត្តមសេនីយ៍ទោ ធន ធឿន មេបញ្ជាកររងយោធភូមិភាគពិសេស និងជាមេបញ្ជាការតំបន់ប្រតិបត្តិការសឹករងកំពង់ឆ្នាំងបានលើកឡើងថា ថ្ងៃនេះខេត្តកំពង់ឆ្នាំងមានមោទនភាពណាស់ ដែលប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានយកចិត្តទុកដាក់ផ្តល់នូវប័ណ្ណបេឡាជាតិរបបសន្តិសុខសង្គម ជូនដល់អតីតយុទ្ធជនខេត្តកំពង់ឆ្នាំង ដែលមានជីវភាពខ្វះខាត សរុបចំនួន១៩៥០នាក់ ក្នុងនោះមានយោធិនពិកាចំនួន១០៨៥នាក់ យោធិនបាត់បង់សមត្ថភាពចំនួន៥៦នាក់ និងយោធិនចូលនិវត្តន៍ចំនួន៨០៩នាក់ ដែលបានផ្តល់ជូនតាមរយៈ ឯកឧត្តមបណ្ឌិត គន់ គីម អគ្គលេខាធិការសមាគមន៍អតីតយុទ្ធជនកម្ពុជាក្នុងពេលនេះ ។
កន្លងមកគណៈកម្មាធិការសមាគមន៍បានសាងសង់ផ្ទះឈើផុតពីដីមានទំហំ៤គុណ៦ និងបានប្រគល់ជូនបងប្អូនអតីតយុទ្ធជន ស្នាក់នៅបានចំនួន៤ខ្នង ដែលសរុបថវិកាមានចំនួន១២លានរៀល និងកំពុងដំណើរការសាងសង់ថ្មី២ខ្នងបន្ថែមទៀត ៕
ចែករំលែកព័តមាននេះ