ប្រទេសតួកគី ៖ ប្រធានាធិបតីតួកគីលោករីស៊ីបតៃយីបអ័រដូហ្គាន កាលពីថ្ងៃទី២៩ តុលាបានទៅបើកសម្ពោធព្រលានយន្តហោះថ្មីនៃក្រុងអ៊ីស្តង់ប៊ុល ដែលក្លាយជាព្រលានយន្តធំជាងគេបំផុតនៃពិភពលោក ជាមហាគម្រោងហេដ្ឋារចនាសម្ព័ន្ធមួយចាប់តាំងពីលោកឡើងកាន់អំណាចមក។
ក្នុងពិធីផ្លូវការបើកសម្ពោធព្រលានយន្តហោះនោះ ដែលដាក់ឈ្មោះថាព្រលានយន្តហោះអ៊ីស្តង់ប៊ុល លោកអ័រដូហ្គានថ្លែងថាព្រលានយន្តហោះថ្មីនោះនឹងជាមោទភាពរបស់ប្រទេសយើង ហើយនឹងជាគំរូព្រលានយន្តហោះថ្មីសម្រាប់ពិភពលោក។អ៊ីស្តង់ប៊ុលពុំមែនត្រឹមតែជាទីក្រុងធំបំផុតរបស់ប្រទេសយើងប៉ុណ្ណោះទេ តែក៏មានព្រលានយន្តហោះធំបំផុតលើលោកដែរ។
មេដឹកនាំរបស់បណ្ដាប្រទេសនៅតំបន់បាល់កង់និងអាស៊ីកណ្ដាល ព្រមទាំងព្រះមហាក្សត្រកាតាCHEIKH TAMIM BEN HAMAD AL THANIរហូតដល់ប្រធានាធិបតីស៊ូដង់ លោកអូម៉ាអែលបេសៀរមានវត្តមានក្នុងពិធីបើកសម្ពោធព្រលានយន្តហោះធំនោះ។
លោកអ័រដូហ្គានបានតាមពិនិត្យជាប់ការសាងសង់ព្រលានយន្តហោះនោះ នៅផ្នែកខាងអឺរ៉ុបនៃក្រុងអ៊ីស្តង់ប៊ុលជិតសមុទ្រខ្មៅ។ការសាងសង់ជួបប្រទះការយឺតយ៉ាវព្រមទាំងកូដកម្មរបស់កម្មករ ដែលទាមទារឲ្យមានការកែលម្អលក្ខខណ្ឌការងាររបស់ពួកគេ។
គម្រោងនោះស្ថិតក្នុងឆន្ទៈរបស់ប្រធានាធិបតីតួកគី ដែលចង់ប្រែក្លាយអតីតរាជធានីនៃអាណាចក្រអុតតូម៉ង់ជាកន្លែងប្រសប់គ្នារបស់ពិភពលោក រវាងទ្វីប៣គឺទ្វីបអឺរ៉ុប អាស៊ី និងអាហ្វ្រិក។ ការបើកសម្ពោធព្រលានយន្តហោះថ្មីនោះដែលត្រូវជំនួសព្រលានយន្តហោះអន្តរជាតិATATURKគឹចំថ្ងៃខួបលើកទី៩៥នៃការបង្កើតសាធារណរដ្ឋតួកគី៕
ចែករំលែកព័តមាននេះ