រាជធានីភ្នំពេញ ៖ បុរសម្នាក់បើករថយន្តស៊េរីទំនើបមួយគ្រឿង ទៅបុកគូទម៉ូតូមួយគ្រឿង បណ្តាលឱ្យរងរបួសស្រាល២នាក់ ហើយមិនព្រមនៅដោះស្រាយ បែរជាព្យាយាមបើកគេច បណ្តាលអោយទៅបុកម៉ូតូមួយគ្រឿងទៀតពេញទំហឹង បណ្តាលអោយអ្នកបើកបរម៉ូតូរបួសធ្ងន់ ហើយរថយន្តខាងលើក៏បន្តទៅបុកនឹងរថយន្តម៉ាកព្រូសមួយគ្រឿងទៀត ទៅមុខលែងរួច ក៍ត្រូវប្រជាពលរដ្ឋឃាត់រថយន្តជាប់ ដោយក្តីខឹងសម្បារនឹងអ្នកបើកបររថយន្តបង្កគ្មានការទទួលខុសត្រូវ ក៍ស្វាគមន៍អ្នកបើកបររថយន្តបង្ក ម្នាក់មួយដៃម្នាក់មួយជើង តែសំណាងល្អសមត្ថកិច្ចទៅឃាត់ទាន់ ។
ហេតុការណ៍គ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង១០និង៤០នាទីយប់ថ្ងៃទី២៩ ខែតុលា នៅតាមបណ្ដោយផ្លូវ២១៧ កែងនឹងមហាវិថីព្រះសីហនុ ស្ថិតនៅសង្កាត់ផ្សារដើមគរ ខណ្ឌទួល
គោក។
ប្រភពព័ត៌មានពីម្ចាស់ម៉ូតូរងគ្រោះម៉ាកស៊ុយហ្សុ៊យគីនិច ពណ៌ស ពាក់ស្លាកលេខ ភ្នំពេញ ១CJ-៦០៦២ បើកបរដោយបុរសម្នាក់ និងស្ត្រីម្នាក់ជាអ្នករួមដំណើរសុំមិនប្រាប់អត្តសញ្ញាណ បានប្រាប់អោយដឹងថា មុនកើតហេតុ ពួកគាត់ទាំងពីរនាក់ បានធ្វើដំណើរតាមផ្លូវ២១៧ ក្នុងទិសដៅពីជើងទៅត្បូង លុះមកដល់កន្លែងកើតហេតុ ក៏មានរថយន្តបង្កមួយគ្រឿងម៉ាកតាកូម៉ា ពណ៌ស ពាក់ស្លាកលេខ ភ្នំពេញ ២AW-៩៧០៧ បើកបរដោយបុរសម្នាក់ ធ្វើដំណើរតាមមហាវិថីព្រះសីហនុ ទិសដៅពីកើតទៅលិច បត់ឆ្វេងចូលផ្លូវ217ក៍ ជ្រុលមកគូទម៉ូតូរបស់គាត់ពីក្រោយ បណ្តាលអោយបាក់កាតាប៊ូក្រោយ នឹងបង្កអោយនារីអង្គុយពីក្រោយរងរបួសស្រាល ។
ភ្លាមៗគាត់ក៏ឈប់រថយន្តនៅដោះស្រាយដែរ ហើយក៏ចចារគ្នា តែស្រាប់តែមានវត្តមានសមត្ថកិច្ចមកជួយសម្របសម្រួល បែរជាម្ចាស់រថយន្តព្យាយាមបើករថយន្តគេចវេស ហើយឆ្លៀតឱកាសឡើងរថយន្តបើកគេចបាត់តែម្តង ភ្លាមៗក៏មានប្រជាពលរដ្ឋ និងសមត្ថកិច្ចជួយដេញឃាត់ តែត្រូវរថយន្តបង្កបើករត់តាមផ្លូវ២១៧ ឆ្លងកាត់ប៉ារាស់របស់សមត្ថកិច្ចត្រួតពិនិត្យជាតិស្រវឹង ហើយមិនព្រមឈប់ទៀត ។
រថយន្តបង្កខាងលើបានធ្វើដំណើរបន្តទៅមុខ ក៏បត់ឆ្វេងចូលមកផ្លូវ៣២៨ រួចបន្តរហូតដល់កែងផ្លូវ២០៥ ក៏បុកម៉ូតូមួយគ្រឿងទៀត ម៉ាកហុងដាឌ្រីម ពណ៌ខ្មៅ មិនមានស្លាកលេខ ពេញទំហឹង បណ្តាលអោយប៉ើងផ្លោងទាំងម៉ូតូ និងអ្នកបើកបរជាង២០ម៉ែត្រ រងរបួសធ្ងន់សន្លប់ស្ដូកស្ដឹង ចំណែកម៉ូតូខូចខាតទាំងស្រុង ហើយរថយន្តបង្ក នៅតែមិនព្រមឈប់ទៀតក៏បន្តទៅមុខរហូតដល់ផ្លូវ១៩៩កែងនឹងផ្លូវ៣២៨ ក្នុងសង្កាត់ទួលស្វាយព្រៃ២ ខណ្ឌចំការមន ក៏ទៅបុកនឹងរថយន្ត មួយគ្រឿងទៀតម៉ាកព្រូស ពណ៌ខៀវ ពាក់ស្លាកលេខ ភ្នំពេញ ២AP-៣៥២១ ដែលធ្វើដំណើរកាត់ទទឹងផ្លូវគ្នាចំពីមុខរថយន្តពេញទំហឹងបណ្តាលអោយរថយន្តព្រូស ខូចខាតមួយកំណាត់មុខយ៉ាងដំណំ តែអ្នកបើកបររថយន្តមិនមានរងរបួសទេ ។
ភ្លាមៗនោះរថយន្តបង្កត្រូវប្រជាពលរដ្ឋ ដែលឃើញហេតុការណ៍ ឃាត់រថយន្តជាប់ ក៏បើកទ្វារទាញជនបង្កមកក្រៅ ក៏ស្វាគមន៍ម្នាក់មួយដៃម្នាក់មួយជើង ដោយសារតែខឹងបុរសនោះបើកបរគ្មានការទទួលខុសត្រូវ និងមិនគិតដល់សុវត្ថិភាពអ្នកដទៃដែលធ្វើដំណើរនៅលើផ្លូវជាមួយខ្លួនសោះ តែសំណាងល្អដែលមានវត្តមានសមត្ថកិច្ច មកដល់កន្លែងកើតហេតុ ជួយឃាត់ប្រជាពលរដ្ឋបានភ្លាមៗផងដែរ។
ក្រោយកើតហេតុ ដោយឃើញសភាពបែបនេះកើតឡើង ភាគីខាងម៉ូតូរងគ្រោះម៉ាកស៊ុយហ្ស៊ុយគីនិច មិនបាននៅទាមទារសំណងទេ ហើយបានបើកបរម៉ូតូចេញទៅបាត់ នៅសល់តែរថយន្តបង្ក និងអ្នកបើកបរ រួមទាំងរថយន្តរងគ្រោះ ហើយនិងម៉ូតូរងគ្រោះត្រូវបានកម្លាំងសមត្ថកិច្ច ប្រគល់ទៅខាងកម្លាំងជំនាញ ចរា
ចរណ៍ក្រុង ធ្វើការវាស់វែង និងឃាត់ខ្លួនយកទៅដោះស្រាយបន្តតាមផ្លូវច្បាប់នៅការិយាល័យនរគរបាលចរាចរណ៍ផ្លូវគោកនៃស្នងការដ្ធាន រាជធានីភ្នំពេញ ៕
ចែករំលែកព័តមាននេះ