ខេត្តកែប ៖ រដ្ឋបាលខេត្តកែបបានរៀបចំពិធីសម្ពោធដាក់ឱ្យប្រើប្រាស់ជាផ្លូវការនៅអគារសិក្សា០១ខ្នង០២ជាន់ស្មើនិង០៦បន្ទប់ ទីចាត់ការ០១ខ្នង បន្ទប់ទឹក០១ខ្នង មាន០៥បន្ទប់ និងអណ្ដូងស្នប់០១ នៅព្រឹកថ្ងៃទី២១ ខែតុលា ឆ្នាំ២០១៨ ដែលស្ថិតនៅក្នុងសាលាបឋមសិក្សា ហ៊ុន សែន ព្រែកតានេន ស្ថិតនៅក្នុងភូមិអំពែង ឃុំអង្កោល ស្រុកដំណាក់ចង្អើរ ខេត្តកែប ។
ក្រោមអធិបតីភាពឯកឧត្តម ហ៊ាង ស៊ីណេ អនុរដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុង រដ្ឋមន្ត្រីក្រសួងអប់រំយុវជន និងកីឡា និងឯកឧត្តម កែន សត្ថា អភិបាលនៃគណៈអភិបាលខេត្តកែប ។ ពិធីនេះផងដែរមានការអញ្ជើញចូលរួមពីប្រតិភូអមដំណើឯកឧត្ដមអនុរដ្ឋលេខាធិការក្រសួង ឯកឧត្ដម លោកជំទាវ អភិបាលរងខេត្ត ប្រធាន អនុប្រធានមន្ទីរអង្គភាពជុំវិញខេត្តអភិបាល អភិបាលរងស្រុក កងកម្លាំងប្រដាប់ទាំងបីអង្គភាព លោកគ្រូ អ្នកគ្រូ ក្មួយៗសិក្សានុសិស្ស បងប្អូនប្រជាពលរដ្ឋមាតាបិតាសិស្សអញ្ជើញចូលរួមជាច្រើនកុះករផងដែរ ។
លោកស្រី គឹម ចន្នី អភិបាលស្រុកដំណាក់ចង្អើរបានឡើងអានរបាយការឲ្យដឹងពីស្ថានភាពស្រុកដំណាក់ចង្អើរនាពេលបច្ចុប្បន្នមានភាពរីកចម្រើនប្រសើរឡើងជាលំដាប់ក្រោមការដឹកនាំពីប្រមុខរាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន នាយករដ្ឋមន្ត្រីបាននាំមកនៅសន្តិភាព ស្ថេរភាពនយោបាយល្អ ។
លោកស្រីអភិបាលស្រុកបានបន្តថា ស្រុកដំណាក់ចង្អើរ គឺជាស្រុកមួយក្នុងចំណោមខេត្តកែប ស្រុកដំណាក់ចង្អើរមានអំណោយផលល្អពីធម្មជាតិ មានឆ្នេរសមុទ្រ មានស្រែអំបិល មានចំការម្រេច ដែលប្រជាពលរដ្ឋប្រកបមុខរបរកសិកម្ម និងសិប្បកម្មផលិតអំបិល -នេសាទត្រី ជាដើម ដោយមានកំណើនប្រជាពលរដ្ឋរស់នៅកាន់តែច្រើនឡើងៗ ភូមិអំពែង ឃុំអង្កោល ទទួលបានយកចិត្តទុកដាក់ពីអង្គការសប្បុរសជន (AIdi et Action) ប្រចាំប្រទេសកម្ពុជាបានរួមសហការជាមួយសាលា (IL EAD International) ព្រមទាំងមានការចូលរួមមូលនិធិ (Tx foundation) ក្នុងការកសាងនៅហេដ្ឋារចនាសម្ព័ន្ធអប់រំ ដើម្បីបំពេញតម្រូវការចាំបាច់របស់ពលរដ្ឋសហគមន៍ ។
មានប្រសាសន៍សំណេះសំណាលនាឱកាសនោះដែរឯកឧត្តម កែន សត្ថា អភិបាលនៃគណៈអភិបាលខេត្តកែបបានថ្លែងអំណរគុណដល់ឯកឧត្តម ហ៊ាង ស៊ីណេ តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា ជាពិសេសឯកឧត្តមបានថ្លែងកោតសរសើរដល់អង្គការអន្តរជាតិ (អង្គការអេដ អេ អាក់ ស្យុង) រួមនិងមូលនិធិ (ធីអ៊ិក) ដែលជាដៃគូរអភិវឌ្ឍន៍ប្រទេសកម្ពុជាដែលបានលះបង់បរិច្ចាគធនធានរបស់ខ្លន រួមសហការលើកស្ទួយវិស័យអប់រំនៅកម្ពុជាតាមជនបទដាច់ស្រយ៉ាលជាមួយរាជរដ្ឋាភិបាលក្នុងនាមឯកឧត្តមជាគណៈបញ្ជាការឯកភាពខេត្ត ឯកឧត្តម ព្រមទាំងមន្ត្រីរាជការ អាជ្ញាធរមូលដ្ឋាន មានភាពសប្បាយរីករាយយ៉ាងក្រៃលែង នៅសមិទ្ធផលអគារសិក្សាថ្មីលើនេះ ដែលបានសាងសង់សម្រេចបានជាស្ថាពរ សមិទ្ធផលខាងលើនេះ បានកសាងឡើងក្នុងតម្លៃទឹកប្រាក់សរុបអស់ចំនួន១១ម៉ឺនដុល្លារសហរដ្ឋអាមេរិក ។
ឯកឧត្តម ហ៊ាង ស៊ីណេ តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជនច និងកីឡាបានមានប្រសាសន៍ថ្លែងកោតសរសើរអាជ្ញាធរគ្រប់លំដាប់ថ្នាក់ដែលបានយកចិត្តទុកដាក់ខ្ពស់លើគុណភាពអប់រំ ការថែទាំ ដល់កុមារតូចៗ អប់រំកុមារ និងស្ត្រី ការអប់រំបញ្ចូលគ្នា តាមរយៈគម្រោងអនុវត្តន៍ទាំង១៦យើង នៅក្នុងតំបន់អាស៊ីអាគ្នេយ៍ ក្នុងឆ្នាំ២០១៧ យើងបានជួយធ្វើឲ្យប្រសើរឡើងនូវជីវិតរស់នៅរបស់កុមារចំនួន១០៥,៩៤៩នាក់ និងបានបណ្តុះបណ្តាលគ្រូបង្រៀន និងអាជ្ញាធរមូលដ្ឋានចំនួន ៤,៨៨១នាក់ បង្កើនការចូលរួមរបស់មាតាបិតាសិស្ស និងសមាជិកសហគមន៍ចំនួន៥០,៤៩១នាក់ ហើយបានធ្វើការជាមួយសាលារៀន និងអង្គការសហគមន៍មូលដ្ឋានចំនួន៩៨៩ផងដែរ ។
ឯកឧត្តម ហ៊ាង ស៊ីណេ អនុរដ្ឋលេខាធិការនៃក្រសួងអប់រំយុវជន និងកីឡាបានបំពាក់គ្រឿងឥស្សរៈយស ដល់សប្បុរសជន និងជាអង្គការដៃគូដែលបានកសាង និងជួយឧបត្ថម្ភនូវមូលនិ ធិកសាងសាលាបឋមសិក្សាហ៊ុនសែនព្រែកតានេននាពេលនេះ ព្រមទាំងអញ្ជើញកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនូវអគារសិក្សាខាងលើចាប់ពីថ្ងៃនេះតទៅ ៕
ចែករំលែកព័តមាននេះ