ខេត្តព្រះវិហារ ៖ ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារបានអះអាងថា ឆ្នាំ២០១៨ នេះកផលសណ្តែកសៀងនៅខេត្តព្រះវិហារទទួលបាននូវទិន្នផលច្រើនគួរសម ប៉ុន្តែកសិករខ្លះក៏នៅតែជួបបញ្ហាសណ្តែកសៀងលូតលាស់មិនបានល្អដែរ ។
តែទោះជាបែបនេះក្តីមន្ទីរជំនាញបានណែនាំឲ្យកសិករក្នុងខេត្តព្រះវិហារដែលតែងតែដាំដុះដំណាំសណ្តែកសៀង គួរតែផ្លាស់ប្តូរពូជសណ្តែកចាស់មកដាំពូជថ្មីវិញ ដើម្បីឲ្យទទួលបាននូវទិន្នផលខ្ពស់ជាងពូជដំណាំចាស់ដែលពួកគាត់តែងតែដាំជារៀងរាល់ឆ្នាំ ។
ប្រាប់អ្នកសារព័ត៌មាននៅថ្ងៃទី២៩ ខែតុលា ឆ្នាំ២០១៨នេះលោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារមានប្រសាសន៍ថា ចាប់តាំងពីថ្ងៃចាប់ផ្តើមដាំដំណាំសណ្តែកសៀងរហូតមកដល់ថ្ងៃប្រមូលផលចាប់ផ្តើមប្រមូលផល ចាប់ពីខែតុលានេះទៅ ឃើញថាទាំងគុណភាព និងទិន្នផលមានភាពល្អប្រសើរច្រើនស្ទើតែទូទាំងខេត្តព្រះវិហារ ដោយមិនមានជួបនូវហានិភ័យដល់ដំណាំនេះឡើយ ព្រោះឆ្នាំនេះទឹកភ្លៀងមានអំណោយផលច្រើនសម្រាប់កសិករធ្វើកសិកម្មនៅក្នុងខេត្តព្រះវិហារមិនថា ឡើយតែដំណាំសណ្តែកសៀងប៉ុណ្ណោះទេ សូម្បីតែដំណាំស្រូវ និងដំណាំរួមផ្សំផ្សេងៗក៏មានការលូតលាស់ល្អផងដែរគិតមកដល់ចុងខែតុលានេះកសិករកំពុងសម្រុកប្រមូលផលសម្រេចបានជិត៥០% ហើយលើផ្ទៃដីដាំដុះសណ្តែកសៀងទូទាំងខេត្តព្រះវិហារប្រមាណជាង១ម៉ឺនហិកតា ។ លោកថា ជាទូទៅដំណាំនេះកសិករអាចដាំដុះបានចាប់ពីសប្តាហ៍ទី១ ទី២ ឬទី៣ ខែកក្កដា នឹងអាចប្រមូលផលបានចាប់ពីសប្តាហ៍ទី១ ខែតុលា ឡើងទៅរហូតដល់ខែវិច្ឆិកា ប៉ុន្តែក៏នៅមានកសិករមួយចំនួនតូច បានជួបផលប៉ះពាល់ដល់ការលូតលាស់សណ្តែកសៀងនេះផងដែរដោយសារ តែពួកគាត់នៅតែប្រើប្រាស់ពូជសណ្តែកសៀងពីមុន ហើយម្យ៉ាងទៀតពួកគាត់ដាំដំណាំនេះមិនបានត្រឹមត្រូវតាមកាលបរិច្ឆេទព្រោះ អ្នកខ្លះដាំដំណាំនេះរហូតដល់ខែសីហាក៏មាន ពេលដែលសណ្តែកចាប់ផ្តើមលូតលាស់ភ្លៀងធ្លាក់ច្រើនក៏ជាកត្តាមួយធ្វើឲ្យសណ្តែកលូតលាស់មិនសូវល្អដែរខ្លះដើមសណ្តែកតឿ រីឯគ្រាប់សណ្តែកក៏មិនបានដាក់ពេញ ។
ជាមួយគ្នានេះលោកក៏បានណែនាំឲ្យកសិករទាំងអស់នៅក្នុងខេត្តព្រះវិហារដែលដាំដុះដំណាំនេះ គួរតែប្តូរពូជសណ្តែក ពីមុនផ្លាស់ប្តូរមកដាំដុះដំណាំសណ្តែកប្រភេទថ្មីវិញដែលអាចឲ្យ កសិករទទួលបាននូវទិន្នផលខ្ពស់ជាងពូជចាស់ ដោយក្នុង១ហិកតារហូតដល់ជិត២តោន ខណៈបច្ចុប្បន្ននេះកសិករមួយចំនួនបានផ្លាស់ប្តូរពូជថ្មីរួចរាល់ហើយដោយទទួលបានទិន្នផលច្រើនគួរសម ។
លោក ឌុច សៅ ជាកសិកររស់នៅភូមិចម្ការស្រម៉ូវ សង្កាត់ប៉ាលហាល ក្រុងព្រះវិហារបានលើកឡើងថា ឆ្នាំនេះសណ្តែកពួកគាត់លូតលាស់មិនសូវល្អនោះទេ រីឯទិន្នផលវិញធ្លាក់ចុះច្រើន ដោយក្នុងមួយហិកតាទទួលបានត្រឹមតែ៤០០ទៅ៥០០គីឡូក្រាមប៉ុណ្ណោះដោយសារតែនៅពេលដែលសណ្តែកពួកគាត់ចាប់ផ្តើមលូតលាស់ភ្លៀងធ្លាក់សន្ធឹកសន្ធាប់ពេកធ្វើឲ្យដើមសណ្តែកលូតលាស់មិនបានល្អ ដើមសណ្តែកតឿ និងខ្លះទៀតគ្រាប់សណ្តែកល្អិតៗទើបធ្វើឲ្យទិន្នផលមានការធ្លាក់ចុះ ។ លោកថា នៅឆ្នាំក្រោយកសិករនៅភូមិនេះអាចនឹងប្តូរពីការដាំសណ្តែកនេះ មកដាំចេក ដំឡូងមី ឬចន្ទីវិញហើយដើម្បីកុំឲ្យមានការខាតបង់ដូចការដាំសណ្តែកសៀងនេះទៀត ៕
ចែករំលែកព័តមាននេះ