រាជធានីភ្នំពេញ ៖ បុរសជាមន្ត្រីប៉ូលិសស័ក្តិ៥ម្នាក់ ក្រោយពេលផឹកស្រាស្រវឹង ក៏បានកំហឹងជាមួយឪពុកមា ម្តាយមីង ព្រមទាំងអ៊ុំសាច់ថ្លៃ រហូតបង្កជាហិង្សាវាយគ្នាទៅវិញទៅមកបណ្តាលឱ្យរងរបួសរាងៗខ្លួន ហើយផ្អើលពេញភូមិ កើតឡើងនៅវេលាម៉ោង៧យប់ថ្ងៃទី២៩ តុលា ស្ថិតក្នុងភូមិរំដួលត្បូង សង្កាត់ស្នោ ខណ្ឌពោធិ៍សែនជ័យ ។
ប្រភពឱ្យដឹងថា មន្ត្រីប៉ូលិសខាងលើ មានឈ្មោះ យ៉ែម ច័ន្ទតារា អាយុជាង៤០ឆ្នាំ មានទីលំនៅក្នុងភូមិកើតហេតុខាងលើ ។ ដោយឡែក ខាងរងគ្រោះស្គាល់ម្នាក់ជាម្តាយមីង ឈ្មោះសឿង ចំរើន អាយុ៤៨ឆ្នាំ រស់នៅភូមិស្នោរត្បូង សង្កាត់ស្នោរ ខណ្ឌពោធិ៍សែនជ័យ និងម្នាក់ទៀតឈ្មោះសឿង សៀម ភេទប្រុស អាយុ៦១ឆ្នាំ និង២នាក់ទៀតត្រូវជាពូនិងមីង មិនបានស្គាល់ឈ្មោះទេ ។
តាមប្រភពថា គេមិនទាន់ដឹងថា ពួកគេឈ្លោះគ្នារឿងអ្វីនោះទេ គ្រាន់តដឹងថា នៅមុនពេលកើតហេតុ ប៉ូលិសរូបនោះបានតភ្លើងនៅរោងរានទេវតា រួចហើយក៏បានទៅអង្គុយផឹកស៊ី តែមិនដឹងមានគ្នាប៉ុន្មាននាក់នោះដែរ ។ លុះផឹករហូតស្រវឹងក៏ផ្ទុះហិង្សានេះតែម្តង ។
ប្រភពបន្តថា នៅពេលសមត្ថកិច្ចចុះទៅបង្ក្រាប ប៉ូលិសខាងលើ ក៏បានទៅពួនសំងំក្នុងផ្ទះ ។ លុះសមត្ថកិច្ច និងម្តាយក្មេកលួងលោមអស់ជាច្រើនម៉ោង ទើបគាត់ព្រមចុះមក ដោយនៅលើខ្លួន ក៏មានរងរបួសឈាមស្រោចពេញខ្លួនផងដែរ ។
ពាក់ព័ន្ធករណីនេះ សមត្ថកិច្ចនៅមិនទាន់ដឹងថា ភាគីខាងណាជាជនបង្កពិតប្រាកដនៅឡើយ ព្រោះភាគីទាំងសងខាង សុទ្ធតែរងរបួសដូចគ្នា ។
ចែករំលែកព័តមាននេះ