ខេត្តរតនគីរី ៖ បុរសម្នាក់ចងកសម្លាប់ខ្លួន ដោយសារសោកស្ដាយប្រពន្ធមានជំងឺស្លាប់ចោល បានជាង១ខែកន្លងមកហើយ ។ ហេតុការណ៍នេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២៩ ខែតុលា ឆ្នាំ២០១៨ ស្ថិតនៅផ្ទះជនរងគ្រោះ ក្នុងភូមិធួយអំពិល ឃុំចាអ៊ុង ស្រុកអូជុំ ។
សមត្ថកិច្ចបានអោយដឹងថា ជនរងគ្រោះដែលស្លាប់ឈ្មោះងៀវ បឿន ភេទប្រុស អាយុ៣៦ឆ្នាំ ជាជនជាតិដើមភាគតិចគ្រឹង មុខរបរកសិករ រស់នៅភូមិឃុំកើតហេតុខាងលើ។
យោងតាមការបំភ្លឺរបស់បងប្អូននឹងសាច់ញាតិរួមទាំងអ្នកភូមិបានឱ្យសមត្ថកិច្ចដឹងថា ជនរងគ្រោះមានប្រពន្ធ និងមានកូន៣នាក់ ហើយស្ត្រីជាប្រពន្ធមានជំងឺឈឺបានស្លាប់ចោលបុរសរងគ្រោះអស់រយៈពេលជាង១ខែកន្លងមកហើយ ។ ក្រោយពីស្ត្រីជាប្រពន្ធស្លាប់បានចំនួនជាង១០ថ្ងៃ បុរសរងគ្រោះបានដើរត្អូញត្អែរប្រាប់បងប្អូននិងអ្នកភូមិជាញឹកញាប់ថា «ខ្លួនមិនចង់រស់រានមានជីវិតលើផែនដីនេះទៀតទេ» ។
ដោយឮជនរងគ្រោះដើរនិយាយបែបនេះ បងប្អូន និងសាច់ញាតិរួមទាំងអ្នកភូមិក៏បាននាំគ្នា ជ ជីកសួដេញដោលជនរងគ្រោះថា «មូលហេតុអ្វីបានជាឯងមិនចង់រស់ ចេះតែចង់ចងកសម្លាប់ខ្លួនឯងអោយស្លាប់ ចោលកូនបែបនេះ?»
ជនរងគ្រោះក៏បានឆ្លើយថា មូលហេតុគឺមកពីខ្លួនមានការសោកស្ដាយប្រពន្ធខ្លាំងពេក ដោយសារមានជំងឺឈឺស្លាប់ចោល ហើយខ្លួនចេះតែមានអារម្មណ៍ថានឹកប្រពន្ធគ្រប់ពេលវេលា ព្រោះប្រពន្ធរបស់គាត់ស្អាតណាស់ ហើយមានចរិកស្លូតបូត និងស្រលាញ់គាត់ជាប្ដីខ្លាំងណាស់ តាំងពីរស់នៅជាមួយប្ដីជិត១០ឆ្នាំមិនដែលមានរឿងឈ្លោះទាស់គ្នាធំដុំម្ដងណាឡើយ។
បងប្អូន និងសាច់ញាតិបានបញ្ជាក់ប្រាប់សមត្ថកិច្ចបន្តទៀតថា ពេលព្រឹក មុនពេលជនរងគ្រោះសម្រេចចិត្តចងកសម្លាប់ខ្លួន ជនរងគ្រោះបានដើរប្រាប់បងប្អូនថា «ក្នុងថ្ងៃនឹង បើបាត់រួបគាត់មិនចាំបាច់នាំគ្នាពិបាកចិត្តទេ» លុះថ្ងៃត្រង់ជនរងគ្រោះបានចងកសម្លាប់ខ្លួនបាត់ទៅហើយ។
បើយោងតាមរបាយការណ៍របស់សមត្ថកិច្ចមូលដ្ឋានបានអោយដឹងថា ជនរងគ្រោះបានយកខ្សែអង្រឹងប្រវែងជាង២ម៉ែត្រចងកនឹងរនួតឈើក្រោមផ្ទះមានកំពស់៣ម៉ែត បណ្តាលឱ្យស្លាប់ ក្រោយពីសមត្ថកិច្ចធ្វើការត្រួតពិនិត្យរួចលទ្ធផលរកឃើញថា ជនរងគ្រោះពិតជាបានចង ក សម្លាប់ខ្លួនឯងពិតប្រាកដមែន គ្មានរឿងឃាតកម្មកើតឡើងនោះទេ ។ សពត្រូវបានសមត្ថកិច្ច ប្រគល់ជួនបងប្អូន និងសាច់ញាតិដើម្បីយកទៅធ្វើបុណ្យតាមប្រពៃណីបងប្អូនជនជាតិគ្រឹង ៕
ចែករំលែកព័តមាននេះ