រាជធានីភ្នំពេញ ៖ ជម្លោះរវាងក្រុមអាជីវករ និងលោកឧកញ៉ាព្រំ សុធី ដែលជាអ្នកគ្រប់គ្រងផ្សារឯករាជ្យ២ ដែលបានបិទផ្សារមិនឲ្យលក់ដូរ និងធ្វើឲ្យអាជីវករក្ដៅក្រហាយឈានដល់ធ្វើការយ៉ាងខ្លាំងនោះ ត្រូវបានដោះស្រាយបញ្ចប់រឿងវិវាទមួយជំហានហើយ ។ ដោយនៅវេលា ថ្ងៃត្រង់ថ្ងៃទី៣០ ខែតុលា ឆ្នាំ២០១៨ ភាគីទាំង២យល់ព្រមទៅតាមការសម្របសម្រួលរបស់លោកនួន សុផារ័ត្ន អភិបាលរងរាជធានីភ្នំពេញ ។
លោក ហែម ដារិទ្ធិ អភិបាលខណ្ឌពោធិ៍សែនជ័យរួមជាមួយអាជ្ញាធរសង្កាត់ចោមចៅ៣ ។ ដែលបានចុះទៅជួបដោះស្រាយផ្ទាល់ជាមួយភាគីទាំង២ដល់ផ្សារឯករាជ្យ២ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ នៅក្នុងជំនួបដំណោះស្រាយគ្នានោះភាគីអាជីវករមានចំនួនជាង១០០នាក់ ដែលជាម្ចាស់តូបចំនួន១៧៦តូប បានជួបជុំគ្នានៅក្នុងផ្សារ ។ ចំណែកខាងអ្នកគ្រប់គ្រងផ្សារ គឺឧកញ៉ាព្រំ សុធី មិនបានទៅជួបអាជីវករផ្ទាល់ឡើយ គឺបានចាត់តំណាងម្នាក់ទៅជំនួស ។ នៅក្នុងពេលនោះដែរ នៅមុនពេលដែលលោកអភិបាលរងរាជធានីភ្នំពេញទៅដល់ភាគីទាំង២ជជែកគ្នាយ៉ាងតឹងសរសៃក និងស្ទើរតែផ្ទុះហិង្សាទៅហើយ ប៉ុន្តែបានការរារាំងពីសំណាក់លោកអភិបាលខណ្ឌពោធិ៍សែនជ័យ ហែម ដារិទ្ធិ ទើបមានការស្ងប់ស្ងាត់ទៅវិញ ។
បន្ទាប់ពីលោក នួន សុផារ័ត្ន អភិបាលរងរាជធានីភ្នំពេញអញ្ជើញទៅដល់ក្រុមអាជីវករបានលើកឡើងជម្រាបជូនពីការលំបាកខកខានមិនបានលក់ដូរ ។ ដោយសារតែលោកឧកញ៉ាព្រំ សុធី បញ្ជាឲ្យកូនចៅបិទផ្សារបិទបង្គន់អនាម័យ បិទកន្លែងផ្ញើកង់ម៉ូតូ បិទភ្លើង ដកកងសន្តិសុខផ្សារចេញ ។ ពួកគាត់អះអាងថា តូបនៅផ្សារនោះបានទិញដាច់ និងផ្ទេរកម្មសិទ្ធិត្រឹមត្រូវ ដែលក្នុងតូប១មានតម្លៃចាប់ពី៣ពាន់ដុល្លារដល់៥ម៉ឺនដុល្លារ ។ ពួកគាត់ព្រមទាំងធ្វើការចោទប្រកាន់ថា ទង្វើរបស់លោកឧកញ៉ារូបនោះ គឺមានចេតនាមិនចង់ឲ្យអតិថិជនទៅទិញទំនិញពីពួកគាត់ និងចង់ឲ្យផ្សារដួលរលំយ៉ាងជាក់ស្ដែង ។ ចំណែកខាងតំណាងលោកឧកញ៉ា ព្រំសុធី បានបដិសេធន៍រាល់ការលើកឡើងរបស់អាជីវករដោយបញ្ជាក់ថា លោកឧកញ៉ព្រំ សុធី មិនមានបំណងធ្វើបាបក្រុមអាជីវករនោះទេ ។ ប៉ុន្តែដោយសារតែរត់មិនរួចខាតទើបធ្វើបែបនេះហើយចំពោះបង្គន់ខាងអ្នកគ្រប់គ្រងផ្សារបានប្រគល់ឲ្យអាជីវករទទួលខុសត្រូវដោយខ្លួនឯងប៉ុន្តែពួកគាត់មិនទទួលយក ។ ទាក់ទិនទៅ និងសំណួររបស់អ្នកសារព័ត៌មានអំពីមូលហេតុនៃការបិទផ្សារ តំណាងរូបនេះបដិសេធន៍មិនឆ្លើយតបយ៉ាងខ្លីថា គាត់មិនអាចបកស្រាយបានឡើយ ។
ក្រោយមកលោក នួន សុផារ័ត្ន អភិបាលរងរាជធានីភ្នំពេញបានធ្វើការសម្របសម្រួលភាគីទាំង២ ហើយតំណាងដែលលោកឧកញ៉ាព្រំ សុធី ចាត់ទៅជួបដោះស្រាយជាមួយអាជីវករនាពេលនោះមិនអាចសម្រេចកិច្ចការអ្វីបានទាល់តែសោះ ។ ទើបខណៈនោះលោកអភិបាលរងរាជធានីភ្នំពេញសម្រេចខលទាក់ទងទៅលោកឧកញ៉ា ព្រំ សុធី ដោយផ្ទាល់ ស្វែងរកគន្លឹះដោះស្រាយឲ្យរលូន ។ ទីបំផុតដំណោះស្រាយត្រូវបានបញ្ចប់មួយជំហានដោយខាងអ្នកគ្រប់គ្រងផ្សារបានយល់ព្រមបើកដំណើរការផ្សារឡើងវិញ រហូតដំណាច់ឆ្នាំនេះ ។
ចំណែកខាងអាជីវករសុខចិត្តបង់ថ្លៃអនាម័យក្នុង១ខែម្នាក់៥ដុល្លារបន្ថែមលើតម្លៃចាស់ទៅឲ្យខាងភាគីអ្នកគ្រប់គ្រង ។ មិនតែប៉ុណ្ណោះភាគីទាំង២បានសន្យាជួបដោះស្រាយគ្នាជាថ្មីម្ដងទៀត នៅដើមឆ្នាំ២០១៨ ក្រោមវត្តមានលោកនួន សុផារ័ត្ន អភិបាលរងរាជធានីភ្នំពេញ ។ និងលោកហែម ដារិទ្ធិ អភិបាលខណ្ឌពោធិ៍សែនជ័យ រួមជាមួយអាជ្ញាធរសង្កាត់ចោមចៅ៣ជាថ្មីទៀត៕
ចែករំលែកព័តមាននេះ