ខេត្តកំពង់ធំ ៖ បុរសម្នាក់ស្រវឹងស្រាដើរធ្លាក់ទឹកប្រឡាយលង់ស្លាប់ហេតុការណ៍នេះបានបង្ករឲ្យពលរដ្ឋមានការភ្ញាក់ផ្អើលកាលពីវេលាម៉ោង៤និង២០នាទីល្ងាចថ្ងៃទី២៩ ខែតុលា ឆ្នាំ២០១៨ ស្ថិតនៅក្នុងភូមិសង្គម ឃុំដំរីស្លាប់ ស្រុកកំពង់ស្វាយ ខេត្តកំពង់ធំ។
នគរបាលបានឲ្យដឹងថា ជនរងគ្រោះដែលស្លាប់ឈ្មោះ ហួន ងឿន ភេទប្រុស អាយុ៥៤ឆ្នាំ រស់នៅភូមិកើតហេតុ ។
បើយោងតាមការឲ្យដឹងពីប្រជាពលរដ្ឋនិយាយថា ជនរងគ្រោះជាមនុស្សចូលចិត្តផឹកស្រា នៅមុនពេលកើតហេតុ គេឃើញជនរងគ្រោះផឹកស្រវឹងស្រាជោកជាំ ហើយក៏ដើរតាមខ្នងទំនប់ទឹកតែម្នាក់ឯងបាត់ រហូតពេលជិតល្ងាចទៅហើយ ទើបមានប្រជាពលរដ្ឋត្រឡប់មកពីស្រែប្រទះឃើញ ហើយរាយការណ៍ប្រាប់អាជ្ញាធរ និងសមត្ថកិច្ចចុះទៅធ្វើកោសល្យវិច្ឆ័យ ។
តាមការសន្និដ្ឋានរបស់សមត្ថកិច្ចថា មូលហេតុគឺមកពីជនរងគ្រោះស្រវឹងស្រាដើរធ្លាក់ទឹកប្រឡាយបណ្តាលឲ្យលង់ស្លាប់ ។
បន្ទាប់ពីពិនិត្យរួច ក៏ប្រគល់សពជូនសាច់ញាតិដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ