រាជធានីភ្នំពេញ ៖ បុរសម្នាក់ទើបតែចេញមកពីចូលរួមពិធីមង្គលការក្នុងស្ថានភាពស្រវឹង បានជិះម៉ូតូមួយគ្រឿងក្នុងល្បឿនលឿនហើយធ្លាក់ជង្ហុកបណ្តាលអោយដួលបាក់កស្លាប់ភ្លាមៗ កាលពីវេលាម៉ោង១០និង៤០នាទីយប់ ថ្ងៃទី២៩ ខែតុលា ឆ្នាំ២០១៨ត្រង់ចំណុចខាងមុខស្ថានីយប្រេងឥន្ធនៈភីធីធី តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់កាកាប…
រាជធានីភ្នំពេញ ៖ បុរសម្នាក់ទើបតែចេញមកពីចូលរួមពិធីមង្គលការក្នុងស្ថានភាពស្រវឹង បានជិះម៉ូតូមួយគ្រឿងក្នុងល្បឿនលឿនហើយធ្លាក់ជង្ហុកបណ្តាលអោយដួលបាក់កស្លាប់ភ្លាមៗ កាលពីវេលាម៉ោង១០និង៤០នាទីយប់ ថ្ងៃទី២៩ ខែតុលា ឆ្នាំ២០១៨ត្រង់ចំណុចខាងមុខស្ថានីយប្រេងឥន្ធនៈភីធីធី តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់កាកាប ខណ្ឌពោធិ៍សែនជ័យ។
រងគ្រោះដែលស្លាប់ឈ្មោះ លៀម ទួន អាយុ៣៩ឆ្នាំ ជាអ្នកខ្វៃជ្រូកលក់ ស្នាក់នៅសង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅខេត្តកំពត។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ ជនរងគ្រោះខាងលើបានជិះម៉ូតូមួយគ្រឿងម៉ាកហុងដាឃ្លីច ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១GO-៣៧១៣ ទើបតែជិះចេញមកពីចូលរួមពិធីមង្គលការគេនៅម្តុំទួលគោកហើយគោលបំណងជិះត្រឡប់ទៅផ្ទះវិញនៅម្តុំរង្វង់មូលចោមចៅ ដោយធ្វើដំណើរក្នុងស្ថានភាពស្រវឹង តាមបណ្ដោយផ្លូវសហព័ន្ធរុស្ស៊ី ទិសដៅពីជើងទៅត្បូង និងក្នុងល្បឿនលឿន។
លុះមកដល់ចំណុចកើតហេតុ ដោយមិនប្រយ័ត្នក៏បានធ្លាក់ជង្ហុកដែលនៅចំកណ្តាលផ្លូវ បណ្តាលឲ្យម៉ូតូដួលអូសប្រមាណ៣០ម៉ែត្ររងការខូចខាតបន្តិចបន្តួច ចំណែកឯបុរសរងគ្រោះដែលជាអ្នកបើកម៉ូតូបានដួលបោកទៅនឹងថ្នល់បណ្តាលឲ្យបាក់កស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័ម។
ក្រោយពេលកើតហេតុ គេឃើញសាច់ញាតិ និងប្រពន្ធរបស់ជនរងគ្រោះបានមកដល់កន្លែងកើតហេតុ និងបានស្រែកទ្រហោយំសោកអោបសពប្តីគួរឱ្យសង្វែគ ។
សមត្ថកិច្ចជំនាញក៏បានធ្វើការប្រគល់សពបុរសរងគ្រោះទៅអោយក្រុមគ្រួសារដឹងយកទៅតម្កល់នៅវត្តទឹកថ្លាដើម្បីធ្វើបុណ្យទៅតាមប្រពៃណី។
ដោយឡែកម៉ូតូខាងលើត្រូវបានសមត្ថកិច្ចជំនាញយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ រង់ចាំប្រគល់ទៅអោយសាច់ញាតិនៅពេលក្រោយ៕
ចែករំលែកព័តមាននេះ