ខេត្តកណ្តាល ៖ ពិតជាគួរមិនជឿសោះ យុវជនម្នាក់សម្រេចចងកសម្លាប់ខ្លួនទាំងជីវិតនៅលីវ បង្កឲ្យមានការភ្ញាក់ផ្អើលដល់អ្នកឃើញហេតុការណ៍ និងក្រុមគ្រួសារ ជាពិសេសមិត្តភក្តិតែម្តង។ ហេតុការណ៍នេះបានកើតឡើងនៅថ្ងៃច័ន្ទ ៥រោច ខែអស្សុជ…
ខេត្តកណ្តាល ៖ ពិតជាគួរមិនជឿសោះ យុវជនម្នាក់សម្រេចចងកសម្លាប់ខ្លួនទាំងជីវិតនៅលីវ បង្កឲ្យមានការភ្ញាក់ផ្អើលដល់អ្នកឃើញហេតុការណ៍ និងក្រុមគ្រួសារ ជាពិសេសមិត្តភក្តិតែម្តង។ ហេតុការណ៍នេះបានកើតឡើងនៅថ្ងៃច័ន្ទ ៥រោច ខែអស្សុជ ឆ្នាំច នព្វស័ក ពុទ្ធសករាជ ២៥៦២ ត្រូវនឹងថ្ងៃទី២៩ ខែតុលា ឆ្នាំ២០១៨ វេលាម៉ោង១១ និង៤០នាទីព្រឹក នៅចំណុចកើតហេតុ ក្នុងសាលាគរុកោសល្យភូមិភាគខេត្តកណ្តាល ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានប្រាប់ឲ្យដឹងថា ជនរងគ្រោះឈ្មោះ សៀម វឌ្ឍនា ភេទប្រុស អាយុ២៥ឆ្នាំ មុខរបរបុគ្គលិកក្រុមហ៊ុន ស្នាក់នៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។ ឪពុកជនរងគ្រោះឈ្មោះ សៀម ប៉ូច ភេទប្រុស អាយុ៤៨ឆ្នាំ មុខរបរ មន្ត្រីនគរបាល ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។ វត្ថុតាងដកហូតមាន ខ្សែកាតសិស្សពាក់ក ចំនួន១ ប្រវែង០.៧៣ មែត្រ។
តាមការបំភ្លឺរបស់សាក្សីឈ្មោះ ស៊ីវ បូរ៉ា ភេទប្រុស អាយុ២៩ឆ្នាំ មុខរបរលក់ដូរ បានឲ្យដឹងថា វេលាម៉ោង១១ព្រឹក ខ្ញុំបានចូលក្នុងសាលាគរុកោសល្យ ភូមិភាគ បំណងចូលបន្ទប់ទឹកបត់ជើង ពេលបត់ជើងរួចរាល់ហើយ មានអារម្មណ៍ធុំក្លិនស្អុយ ក៏ដើររកមើលតែមិនឃើញ ហើយក៏មានបន្ទប់ទឹកមួយបិទទ្វារ មានការសង្ស័យក៏អើតមើល តាមប្រហោងទ្វារ ក៏ឃើញមានមនុស្សចងក ហើយក៏រាយការណ៍ទៅសមត្ថកិច្ចប៉ុស្តិ៍តាខ្មៅ តាមរយៈទូរស័ព្ទ។ ភ្លាមនោះសមត្ថកិច្ចក៏បានធាក់ទ្វារបន្ទប់ទឹក ឃើញមនុស្សប្រុសចងក ទៅនឹងធ្នឹមដំបូលបន្ទប់ទឹកជាមួយខ្សែកាតសិស្សពាក់ក បន្ទាប់មកក៏រាយការណ៍ជូនសមត្ថកិច្ចជំនាញ ដើម្បីចុះធើ្វការពិនិត្យ។
ការសន្និដ្ឋានតាមការពិនិត្យរបស់សមត្ថកិច្ចនគរបាលជំនាញផ្នែកពិនិត្យវិភាគ កន្លែងកើតហេតុក្រុងតាខ្មៅ ព្រមទាំងអាជ្ញាធរដែលពាក់ព័ន្ធ និងលោកគ្រូសន្និដ្ឋានថា ដងខ្លួនសាកសពមិនមានស្លាកស្នាមអ្វីគួឲ្យកត់សម្គាល់ឡើយ សពពិតជាស្លាប់ដោយសារអត្តឃាត(ចងក) ពិតប្រាកដមែន។ ដោយមិនបានពាក់ព័ន្ធបទល្មើសអ្វីឡើយ ។ ការពិនិត្យចប់សព្វគ្រប់ សាកសពត្រូវបានប្រគល់ឲ្យឪពុកយកទៅធ្វើបុណ្យតាមប្រពៃណី៕
ចែករំលែកព័តមាននេះ