ខេត្តកំពង់ឆ្នាំង ៖ ក្រោយពីបញ្ចប់ពិធីបុណ្យទន្លេលើកទី៤នៅខេត្តកណ្ដាល ប្រកបដោយជោគជ័យរួចមក រាជរដ្ឋាភិបាលកម្ពុជា បានសម្រេចយកខេត្តកំពង់ឆ្នាំង សម្រាប់ប្រារព្ធពិធីបុណ្យទន្លេលើកទី៥ ។ ថ្ងៃទី២៧ ខែតុលា…
ខេត្តកំពង់ឆ្នាំង ៖ ក្រោយពីបញ្ចប់ពិធីបុណ្យទន្លេលើកទី៤នៅខេត្តកណ្ដាល ប្រកបដោយជោគជ័យរួចមក រាជរដ្ឋាភិបាលកម្ពុជា បានសម្រេចយកខេត្តកំពង់ឆ្នាំង សម្រាប់ប្រារព្ធពិធីបុណ្យទន្លេលើកទី៥ ។ ថ្ងៃទី២៧ ខែតុលា លោក ថោងខុន រដ្ឋមន្ត្រីក្រសួងទេសចរណ៍ និងលោក ឈួរច័ន្ទឌឿន អភិបាលខេត្ត បានអញ្ជើញត្រួតពិនិត្យទីតាំងជាក់ស្ដែងនៅបរិវេណវិមានឯករាជ្យខេត្ត និងបន្តដឹកនាំកិច្ចប្រជុំនៅសាលាខេត្ត ដើម្បីពិ
ភាក្សាពីការត្រៀមរៀបចំពិធីបុណ្យទន្លេលើកទី៥នេះ ។
លោករដ្ឋមន្ត្រី ថោង ខុន មានប្រសាសន៍ថា ពិធីបុណ្យទន្លេលើកទី៥នៅខេត្តកំពង់ឆ្នាំង គ្រោងរៀបចំរយៈពេល៣ថ្ងៃនៅអំឡុងខែមីនា ឆ្នាំ២០១៩ ដោយមានព្រឹត្តិការណ៍និងសកម្មភាពកីឡា ទេសចរណ៍ វប្បធម៌ជាច្រើនដូចជា ការប្រកួតកីឡាលើទឹក លើគោក ពិធីដាំដើមឈើ ការរៀបចំសិក្ខាសាលា ការតាំងពិព័រណ៍កសិ-ទេសចរណ៍ និងផលិតផលខ្មែរ ពិព័រណ៍សិប្បកម្ម ពាណិជ្ជកម្ម មហោស្រពម្ហូបអាហារ និងភេសជ្ជៈ ការប្រគំតន្ត្រី ការសម្តែងសិល្បៈវប្បធម៌ និងសកម្មភាពផ្សេងៗទៀតជាច្រើន ។
លោករដ្ឋមន្ត្រីបន្តថា ការរៀបចំពិធីបុណ្យទន្លេនេះ ជាឱកាសដ៏ប្រសើរបំផុតក្នុងការរួមគ្នាគិត រួមគ្នាធ្វើ និងរួមគ្នាទទួលខុសត្រូវ ក្នុងការអភិវឌ្ឍទឹកដី ហេដ្ឋារចនាសម្ព័ន្ធជុំវិញខេត្ត ការលើកកម្ពស់ការយល់ដឹងជាសាធារណៈពីការថែរក្សាការពារ និងអភិរក្សធនធានធម្មជាតិ វប្បធម៌ ទេសចរណ៍ ការរៀបចំសណ្ដាប់ធ្នាប់ អនាម័យបរិស្ថាន ការចូលរួមសម្អាតទីក្រុង ទីប្រជុំជន និងផ្ទះស្នាក់ប្រកបដោយភាពស្អាត ភាពបៃតង (ដើម្បីចូលរួមក្នុងយុទ្ធនាការគ្មានសំរាមក្រោមតុ) ភាពញញឹមរួសរាយរាក់ទាក់ និងបដិសណ្ឋារកិច្ចល្អ ការពង្រឹងគុណភាពផលិតផលនិងសេវាកម្មទេសចរណ៍ ។
ពិសេស ព្រឹត្តិការណ៍នេះនឹងជួយលើកកម្ពស់មុខមាត់ កិត្តិយស កេរ្តិ៍ឈ្មោះ និងកិត្យានុភាពរបស់ខេត្ត បង្កើតមុខរបរប្រាក់ចំណូល និងបង្កើនជីវភាពរស់នៅរបស់ប្រជាពលរដ្ឋមូលដ្ឋាន។ ជាងនេះទៀត ខេត្តកំពង់ឆ្នាំងនឹងក្លាយជាគោលដៅទេសចរណ៍ប្រកបដោយភាពទាក់ទាញ ភាពស្អាត បៃតង និងបដិសណ្ឋារកិច្ចល្អ ។
«ការចេះបដិសណ្ឋារកិច្ចចំពោះភ្ញៀវទេសចរ គឺមានសារៈសំខាន់ខ្លាំងណាស់ ដើម្បីឲ្យភ្ញៀវទេសចរពេញចិត្ត និងចូលចិត្តមកតំបន់ឬខេត្តរបស់យើង» ។ នេះជាប្រសាសន៍របស់លោករដ្ឋមន្ត្រី ថោង ខុន នៅក្នុងកិច្ចប្រជុំត្រួតពិនិត្យ ផែនការរៀបចំបុណ្យទន្លេនៅខេត្តកំពង់ឆ្នាំង ដែលបានប្រារព្ធធ្វើនៅសាលាខេត្តនាព្រឹកថ្ងៃទី២៧ ខែតុលា ។
លោករដ្ឋមន្ត្រីបន្តថា អ្នកលក់ដូរក្នុងភោជនីយដ្ឋាន អាហារដ្ឋាន ត្រូវតែមានឯកសណ្ឋានត្រឹមត្រូវ និងមានសេវាកម្មល្អក្នុងការបម្រើភ្ញៀវដោយត្រូវមានអាហាឆ្ងាញ់ មានអនាម័យល្អ បរិស្ថានល្អ ដើម្បីទទួលភ្ញៀវដែលមកលេងកម្សាន្តក្នុងពិធីបុណ្យទន្លេរយៈពេល៣ថ្ងៃ ដែលនឹងប្រព្រឹត្តទៅពីថ្ងៃទី១៨ ដល់ថ្ងៃទី២០ ខែមីនា ឆ្នាំ២០១៩ ខាងមុខ ។ ជាបទពិសោធន៍ក្នុងការធ្វើបុណ្យទន្លេកន្លងមក តាមបណ្តាខេត្តមួយចំនួននៅ
ម៉ោង៩យប់ភ្ញៀវមកលេងបុណ្យទន្លេរកបាយម្ហូបអត់មាន ។
លោកបានសំណូមពរដល់អាជ្ញាខេត្ត ត្រូវបង្រៀនដល់ក្រុមអាជីវករ អ្នកលក់ដូរទាំងអស់ ត្រូវចេះបដិសណ្ឋារកិច្ចចំពោះភ្ញៀវទេសចរ និងណែនាំដល់ម្ចាស់ផ្ទះសំណាក់ សណ្ឋាគារ សូមកុំដំឡើងថ្លៃ ។ ចំណែកតាមផ្ទះប្រជាពលរដ្ឋនៅក្នុងក្រុង សូមរៀបចំឲ្យបានស្អាតបាត មានរបៀបរៀបរយ មានភ្លើងអគ្គិសនី មានបន្ទប់ទឹកស្អាត មានអនាម័យល្អ ដើម្បីទទួលភ្ញៀវដែលមកស្នាក់នៅលេងកម្សាន្តនៅក្នុងពិធីបុណ្យ គឺមានន័យថា បើផ្ទះសំណាក់ឬសណ្ឋាគារពេញហើយនោះ ភ្ញៀវនឹងមកជួលផ្ទះប្រជាពលរដ្ឋយើងស្នាក់នៅជាមិនខាន ។ ចំណែកម៉ូតូឌុប រ៉ឺម៉កម៉ូតូ ត្រូវមានអាវកាក់និងមានការគ្រប់គ្រងឲ្យបានល្អ ។
នៅក្នុងកិច្ចប្រជុំនេះដែរ លោក ឈួរ ច័ន្ទឌឿន អភិបាលខេត្ត បានលើកឡើងថា គម្រោងនៃការធ្វើបុណ្យទន្លេក្រោមប្រធានបទ«ទន្លេនៃជីវិត សុភមង្គល និងកំណើនទេសចរ» ដោយអាជ្ញាធរខេត្តបានរៀបចំបង្កើតគណៈកម្មការ លេខាធិការដ្ឋាន និងអនុគណៈកម្មការសរុបចំនួន១៧ ដើម្បីបែងចែកភារកិច្ចទទួលខុសរៀងៗខ្លួនទៅតាមមុខជំនាញ ដើម្បីឲ្យដំណើរការបុណ្យទន្លេទទួលបានជោគជ័យ ។ នៅក្នុងកម្មវិធីធ្វើបុណ្យទន្លេ ដែលនឹងមានវត្តមានសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងពេលខាងមុខនេះ អាជ្ញាធរខេត្តបានគ្រោងរៀបចំតុបតែងខ្លោងទ្វាររូបភាពធំៗចំនួន១៧ ខ្លោងទ្វារតូចៗចំនួន២២ នៅក្នុងទីក្រុងនិងនៅតាមផ្លូវជាតិ ។
ក្នុងកម្មវិធី៣ថ្ងៃនៃបុណ្យទន្លេនេះដែរ ក៏មានកម្មវិធីនានាជាច្រើនដូចជារត់ប្រណាំង ការដាំដើមឈើអនុស្សាវរីយ៍ ការប្រណាំងទូក២២គូ ការតាំងពិព័រណ៍កសិ-ទេសចរណ៍ ផលិតផលខ្មែរ ការប្រកួតកីឡាអុកចត្រង្គ ប្រដាល់គុនខ្មែរ ថៃ ចំបាប់បុរាណនិងក្បាច់គុនល្បុក្កតោ កីឡាហែលទឹកឆ្លងទន្លេ ការប្រកួតកីឡាបាល់ទាត់ បាល់ទះមិត្តភាព ការប្រកួតកីឡាប្រណាំង ជិះកង់កម្សាន្ត១២គីឡូម៉ែត្រ កម្មវិធីសិល្បៈ ប្រគំតន្ត្រី មហោស្រពម្ហូបអាហារនិងភេសជ្ជៈ មានការតាំងលក់ដូរនូវផលិតផលផ្សេងៗ២៤០ស្តង់ និងការបាញ់កាំជ្រួចអបអរសាទរកម្មវិធីបើកជាផ្លូវការបុណ្យទន្លេលើកទី៥ផងដែរ ។
លោករដ្ឋមន្ត្រី ថោង ខុន មានប្រសាសន៍ថា ទន្លេមេគង្គមានប្រភពពីខ្ពង់រាបទីបេត៍ ប្រទេសចិន ប្រវែងប្រមាណ៤.២០០គីឡូម៉ែត្រ ហូរកាត់ខេត្តយូណានភាគខាងត្បូងប្រទេសចិន និងឆ្លងកាត់ប្រទេសមីយ៉ាន់ម៉ា ថៃ ឡាវ កម្ពុជា និងវៀណាម និងហូរកាត់ទៅតំបន់ដីសណ្ដភាគខាងត្បូងប្រទេសវៀតណាម ។ ទន្លេមេគង្គហូរកាត់ប្រទេសកម្ពុជាប្រមាណ៥០០គីឡូម៉ែត្រពីខាងជើងទៅខាងត្បូង និងបែកជាទន្លេផ្សេងៗដូចជា ទន្លេសេសានក្នុងខេត្តស្ទឹងត្រែង ទន្លេស្រែពកក្នុងខេត្តរតនគិរី ទន្លេសាបនិងបឹងទន្លេសាប ទន្លេបាសាក់ ទន្លេវ៉ៃគោក្នុងខេត្តស្វាយរៀង បឹងព្រែកល្ពៅក្នុងខេត្តតាកែវ និងបំបែកជាដៃទន្លេ ស្ទឹងជាច្រើនទៀត ។ អាស្រ័យហេតុនេះហើយ បានជានៅក្នុងយុទ្ធសាស្ត្រវិស័យធនធានទឹក បានចាត់ទុកកម្ពុជាជាព្រះរាជាណាចក្រទឹក (Kingdom of Water) ។
ប្រជាជនដែលរស់នៅតាមបណ្ដោយទន្លេមេគង្គទាំង៦ប្រទេសនេះ មានប្រមាណ៩០លាននាក់ ក្នុងនោះកម្ពុជាមានប្រជាជនប្រមាណ៥លាននាក់(១ភាគ៣នៃប្រជាជនសរុប) រស់នៅតាមបណ្ដោយទន្លេមេគង្គ (បើគិតរួមបញ្ចូលប្រជាជនដែលរស់នៅតាមខេត្តជុំវិញបឹងទន្លេសាប និងទន្លេផ្សេងៗទៀតអាចមានដល់ទៅ១៣លាននាក់) ។សូមជម្រាបថា សម្រាប់បុណ្យទន្លេលលើកទី១ ឆ្នាំ២០១៥ នៅខេត្តក្រចេះ មានភ្ញៀវសរុប
ប្រមាណ១០ម៉ឺននាក់ ឆ្នាំ២០១៦ នៅខេត្តកំពង់ចាម មានភ្ញៀវសរុបប្រមាណ៥០ម៉ឺននាក់ ឆ្នាំ២០១៧ នៅខេត្តស្ទឹងត្រែង មានភ្ញៀវសរុបប្រមាណ១៤ម៉ឺននាក់ និងឆ្នាំ២០១៨ នៅខេត្តកណ្ដាលមានភ្ញៀវសរុបប្រមាណ១,៥លាននាក់ ៕
ចែករំលែកព័តមាននេះ