ប្រទេសឥណ្ឌូណេស៊ី ៖ បើតាមអាជ្ញាធរបានរាយការណ៍ឱ្យដឹងថា យន្តហោះដឹកអ្នកដំណើរធុនប៊ូអ៊ីង៧៣៧មួយគ្រឿង របស់ក្រុមហ៊ុនអាកាសចរណ៍ឥណ្ឌូណេស៊ី LION AIR ដែលដឹកមនុស្ស១៨៨នាក់ បានធ្លាក់នាព្រឹកថ្ងៃទី២៩ តុលា ២០១៨ ក្នុងដែនទឹកឆ្នេរសមុទ្រកោះជ្វា ក្រោយហោះចេញពីក្រុងហ្សាការតា។
យន្តហោះនោះបានស្នើវិលត្រឡប់មកកាន់ព្រលានយន្តហោះរដ្ឋធានីវិញ មុនពេលដាច់ការទាក់ទងបន្តិចជាមួយប៉មត្រួតពិនិត្យការហោះហើរ នាវេលាម៉ោង៦និង៣០នាទីព្រឹកម៉ោងក្នុងស្រុក។ ហើយយន្តហោះនេះហោះទៅកាន់ក្រុង PANGKAL PINANG ជាទីក្រុងមួយនៃកោះបាងកាក្នុងដែនទឹកកោះស៊ូម៉ាត្រា។
លោក YUSUF LATIF អ្នកនាំពាក្យរបស់ទីភ្នាក់ងារទទួលបន្ទុកខាងការរុករកថ្លែងថា យន្តហោះបានធ្លាក់ក្នុងទឹកសមុទ្រ។ យើងកំពុងតាមរកបំណែកយន្តហោះ ដោយវាធ្លាក់ក្នុងតំបន់ទឹកជ្រៅមួយមានជម្រៅពី៣០ទៅ៤០ម៉ែត្រ។
លោក SINDU RAHAYU អគ្គនាយកនៃអាកាសចរណ៍ស៊ីវិលរបស់ក្រសួងដឹកជញ្ជូន អះអាងក្នុងសេចក្ដីប្រកាសមួយថា យន្តហោះនោះដឹកអ្នកដំណើរ១៧៨នាក់ជាមនុស្សពេញវ័យ កុមារម្នាក់ និងកូនង៉ែត២នាក់ អ្នកបើក២នាក់ និងបុគ្គលិកកាប៊ីន៥នាក់។ លោកបន្តថា យន្តហោះនេះបានស្នើហោះវិលមកកាន់មូលដ្ឋានវិញ មុនពេលបាត់ពីអេក្រង់រ៉ាដា។វាបាត់ដានភ្លាមៗនៅកន្លែងមួយពីលើសមុទ្រនៃកោះជ្វាមិនឆ្ងាយប៉ុន្មានពីឆ្នេរ។
ក្រុមហ៊ុនអាកាសចរណ៍ LION AIR ជាក្រុមហ៊ុនលក់សំបុត្រក្នុងតម្លៃទាប ធ្លាប់ជួបប្រទះនឹងឧប្បត្តិហេតុនានាជាច្រើន។ កាលពីខែសីហា ឆ្នាំ២០១៧ យន្តហោះប៊ូអ៊ីងមួយគ្រឿងរបស់ក្រុមហ៊ុននេះ ក្រោយហោះចេញបន្តិចពីព្រលានយន្តហោះអន្តរជាតិ KUANAMU ក្រុងមេដានជាទីក្រុងធំទី៣ របស់ប្រទេស នាភាគខាងជើងកោះស៊ូម៉ាត្រា បានប៉ះស្លាបយន្តហោះធុន ATR-72 មួយគ្រឿងរបស់ក្រុមហ៊ុនអាកាសចរណ៍ WINGS AIR ក៏ជារបស់ឥណ្ឌូណេស៊ីដែរ ដែលរង់ចាំការហោះចេញ។ ការប៉ះគ្នានោះពុំបណ្ដាលឲ្យមានជនរងគ្រោះឡើយ។
កាលពីខែឧសភា ឆ្នាំ២០១៦ យន្តហោះ២គ្រឿងរបស់ក្រុមហ៊ុន LION AIR បានបុកគ្នាលើផ្លូវនៃព្រលានយន្តហោះ SOEKARNO HATTA ជាយក្រុងហ្សាការតា។ កាលពីខែមេសា ឆ្នាំ២០១៣ យន្តហោះប៊ូអ៊ីងមួយរបស់ក្រុមហ៊ុននេះ បានចុះខុសផ្លូវនៅព្រលានយន្តហោះអន្តរជាតិក្រុង DENPASAR លើកោះបាលី ហើយធ្លាក់ក្នុងសមុទ្រដែលនៅក្បែរ។ មនុស្ស១០៨នាក់ជិះក្នុងយន្តហោះនេះ ក្នុងនោះមានអ្នកដំណើរ១០១នាក់ នៅរស់រានមានជីវិត តែប្រមាណ៤០នាក់រងរបួស។
នៅឥណ្ឌូណេស៊ីដែរ កាលពីខែសីហា ក្មេងប្រុសម្នាក់អាយុ១២ឆ្នាំនៅរស់រានមានជីវិត ពីគ្រោះថ្នាក់ធ្លាក់យន្តហោះមួយ បណ្ដាលឲ្យមនុស្សស្លាប់៨នាក់ ក្នុងតំបន់ភ្នំមួយនៃកោះប៉ាពូអាស៊ី។ កាលពីខែសីហា ឆ្នាំ២០១៥ យន្តហោះ ATR-42-300 មួយគ្រឿងរបស់ក្រុមហ៊ុនអាកាសចរណ៍TRIGANA AIR ដឹកអ្នកដំណើរពេញវ័យ៤៤នាក់ កុមារ៥នាក់ និងសមាជិកក្រុមយានិក៥នាក់ ធ្លាក់ដោយសារធាតុអាកាសអាក្រក់ក្នុងជួរភ្នំ BINTANG ហើយពុំមានមនុស្សណាម្នាក់នៅរស់រានមានជីវិតឡើយ៕
ចែករំលែកព័តមាននេះ