រាជធានីភ្នំពេញ ៖ អ្នកគ្រប់គ្រងផ្សារឯករាជ្យ២កំពុងបង្ករឿងបិទផ្សារមិនឲ្យអាជីវករបានចូលលក់ដូរដែលជាហេតុធ្វើឲ្យក្រុមអាជីវករទាំងនោះមានការក្ដៅក្រហាយ ហើយពួកគាត់បាននាំគ្នាធ្វើការតវ៉ាទាមទារឲ្យឧកញ៉ា ព្រំ សុធី ដែលជាអ្នកគ្រប់គ្រងផ្សារនោះចេញមុខដោះស្រាយបន្ទាន់ ។
មិនតែប៉ុណ្ណោះទង្វើរបស់អ្នកគ្រប់គ្រងផ្សារខាងលើក៏កំពុងធ្វើឲ្យអាជ្ញាធរឈឺក្បាលផងដែរ ព្រោះតែនៅសុខៗដំបៅមិនឈឺយកឈើរុកបង្ករឿងធ្វើឲ្យប្រជាពលរដ្ឋបះបោរបែបនេះ ។ ហេតុការណ៍នោះបានកើតឡើងឡើងកាលពីវេលាម៉ោង៨និង៣០នាទីព្រឹក ថ្ងៃទី២៩ ខែតុលា ឆ្នាំ២០១៨ នៅក្នុងផ្សារឯករាជ្យ២ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
នៅក្នុងទឹកមុខពោរពេញទៅដោយកំហឹង និងការក្ដៅក្រហាយហើយនៅក្នុងដៃមានកាន់បដារផងនោះ ក្រុមអាជីវករជាង១០០នាក់ ដែលជាម្ចាស់តូបចំនួន១៧៦តូប ដែលលក់ដូរនៅក្នុងផ្សារឯករាជ្យ២ បានប្រមូលផ្ដុំគ្នាធ្វើការតវ៉ា បន្ទាប់ពីអ្នកគ្រប់គ្រងផ្សារមួយនេះបិទច្រកចេញចូលផ្សារ បិទភ្លើង បិទបង្គន់បន្ទប់ទឹក បិទកន្លែងផ្ញើរកង់ម៉ូតូ មិនឲ្យពួកគាត់បានចូលលក់ដូរឡើយ ។
ដោយពួកគាត់យល់ឃើញថា នេះជាចេតនាអាក្រក់មួយហើយក៏ជាការរំខានដល់ការលក់ដូររបស់ពួកគាត់ឈានដល់ការដួលរលំផ្សារទាំងមូល ។ នៅក្នុបដារដែលពួកគាត់កាន់នៅពេលផ្ទុះការតវ៉ានោះពួកគាត់បានទាមទារឲ្យឧកញ៉ា ព្រំ សុធី ចេញមុខធ្វើការដោះស្រាយជាបន្ទាន់នៅមូលហេតុខាងលើ។
អាជីវករខាងលើបាននិយាយថា ពួកគាត់បានទិញតូបនៅក្នុងផ្សារឯករាជ្យ២នោះជាច្រើនឆ្នាំមកហើយ ដោយអ្នកខ្លះទិញមុនគេក្នុងតូប១ថ្លៃជាង៣ពាន់ដុល្លារ អ្នកខ្លះទៀតទិញក្នុងតម្លៃ៥ពាន់ទៅ១ម៉ឺនដុល្លារ រហូតដល់៥ម៉ឺនដុល្លារក៏មានដែរគឺទិញដាច់ៗតែម្ដង ។ ប៉ុន្តែកាលពីតូបលក់មិនទាន់ដាច់អស់មិនដែលមានបញ្ហានោះឡើយ លុះមកដល់មួយរយៈពេលចុងក្រោយបន្ទាប់ពីលក់តូបអស់ឧកញ៉ា ព្រំ សុធី នេះបានបង្ករឿងជាបន្តបន្ទាប់ ។
មិនតែប៉ុណ្ណោះនៅរាល់ពេលបុណ្យជាតិមកដល់ ដែលជាថ្ងៃកម្មករ-កម្មការិនីរោងចក្រមន្ត្រីរាជការផ្សេងៗឈប់សម្រាកដែលជាថ្ងៃសម្រាប់ពួកគាត់លក់ដាច់គឺអ្នកគ្រប់គ្រងផ្សាររូបនោះតែងតែបិទផ្សារមិនឲ្យលក់បែបនេះជាបន្តបន្ទាប់ ។
ប្រភពដដែលបានបន្តទៀតថា ផ្សារនេះលក់ដាច់ខ្លាំងតែនៅថ្ងៃដែលមានបុណ្យជាតិធំៗប៉ុណ្ណោះដូចជានៅថ្ងៃកើតហេតុនេះដែលជាថ្ងៃបុណ្យរាជាពិសេកព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានេះជាដើម ។ ប៉ុន្តែឧកញ៉ា ព្រំ សុធី បែរជាយកថ្ងៃទាំងនេះធ្វើបាបពួកគាត់ដោយបិទផ្សារទាំងមូលមិនឲ្យពួកគាត់ចូលលក់បានឡើយ ពួកគាត់ពិតជាឈឺចាប់ខ្លាំងបំផុត ។
កាលពីលើកមុនអ្នកគ្រប់គ្រងផ្សារនេះបានបិទផ្សារមិនឲ្យលក់ដោយទាមទារឡើងថ្លៃភាស៊ីនិងថ្លៃសន្តិសុខ ហើយពួកគាត់បានផ្ទុះការតវ៉ាម្ដងប៉ុន្តែក្រោយមកដោយសារខ្ជិលវែងឆ្ងាយក្រោយមកបានបញ្ឈប់ការតវ៉ានិងព្របង់តាមការតម្លើងនោះ ។
លុះក្រោយៗមកឧកញ៉ារូបនេះបានចិត្តបានបង្កព្យុះភ្លៀងមិនឈប់ពេលនេះបានឈានដល់ការបិទច្រកចេញចូលផ្សារ បិទភ្លើង បិទបង្គន់បន្ទប់ទឹក បិទកន្លែងផ្ញើរកង់ម៉ូតូ មិនឲ្យពួកគាត់បានចូលលក់ដូរឡើយ ។
ពួកធ្វើការតវ៉ាដើម្បីឲ្យអ្នកគ្រប់គ្រងផ្សាររូបនោះចេញមុខដោះស្រាយ និងបកស្រាយពីមូលហេតុនៃការបិទផ្សារនេះឲ្យបានច្បាស់ ។ នៅក្នុងខណៈនោះអាជ្ញាធរសង្កាត់ចោមចៅ៣បានចុះជួបជាមួយក្រុមអាជីវករ និងបានទំនាក់ទំនងជាមួយឧកញ៉ា ព្រំ សុធី នោះឲ្យបើកផ្សារឡើងវិញដែរប៉ុន្តែឥតប្រយោជន៍ទេ ឧកញ៉ារូបនោះមិនព្រមស្ដាប់ និងបញ្ចប់រឿងឡើយ ៕
ចែករំលែកព័តមាននេះ