ទីក្រុងហាណូយ ៖ ធនាគារវៀតណាមមួយចំនួនបានពង្រីកការវិនិយោគរបស់ខ្លួនទៅទីផ្សារបរទេស ដើម្បីទាញយកការវិនិយោគពីក្រៅស្រុក ដោយក្រុមហ៊ុនវៀតណាម ។
កាលពីដើមសប្តាហ៍នេះ ធនាគារពាណិជ្ជភាគហ៊ុនសម្រាប់ការធ្វើពាណិជ្ជកម្មក្រៅប្រទេសរបស់វៀតណាម (Vietcombank) បានបើកដំណើរការVietcombank សាខាប្រទេសឡាវ នៅទីក្រុងវៀងចន្ទន៍ ។
ធនាគារវៀតណាមចំនួន៦បានបង្កើតវត្តមាននៅប្រទេសឡាវ ដែលរួមមាន ធនាគារយោធា (Military Bank), ធនាគារ Vietcombank, ធនាគារសៃហ្គន-ហាណូយ (Saigon-Hanoi Bank), ធនាគារវិនិយោគនិងអភិវឌ្ឍន៍វៀតណាម (BIDV), ធនាគារពាណិជ្ជកម្មនិងឧស្សាហកម្មវៀតណាម (Vietinbank) និងធនាគារ Saigon Thuong Tin Bank (Sacombank)។
យោងតាមលោក Pham Manh Thang អនុប្រធានធនាគារ Vietcombank ឡាវបានឲ្យដឹងថា ធនាគារ Vietcomeback សាខាប្រទេសឡាវ នឹងផ្តល់សេវាកម្មដល់ក្រុមហ៊ុនវៀតណាមដែលកំពុងស្វែងរកការវិនិយោគនៅក្នុងប្រទេសឡាវ និងក្រុមហ៊ុនទាំងឡាយណាដែលកំពុងដំណើរការនៅក្នុងប្រទេសឡាវ និងផ្សេងៗទៀត ។
ធនាគារ Vietcombank ក៏មានការិយាល័យនិងសាខានៅប៉ារីស (បារាំង) ម៉ូស្គូ (រុស្ស៊ី) និងសិង្ហបុរី ក៏ដូចជាក្រុមហ៊ុនហិរញ្ញវត្ថុវៀតណាមលីមីតធីត (Vinafico) នៅហុងកុង ផងដែរ ។ ធនាគារ Vietcombank គ្រោងនឹងបើកសាខាមួយនៅប្រទេសអូស្ត្រាលី និង ការិយាល័យតំណាងនៅសហរដ្ឋអាមេរិកនៅចុងឆ្នាំនេះ ។
ចំណែកធនាគារ BIDV ក៏ជាអ្នកត្រួសត្រាយផ្លូវការពង្រីកទីផ្សារបរទេសដោយមានសាខា និងការិយាល័យនៅក្នុងប្រទេសកម្ពុជា មីយ៉ាន់ម៉ា ឡាវ សាធារណរដ្ឋឆែក តៃវ៉ាន់ និងរុស្ស៊ី ផងដែរ ។
គួរបញ្ជាក់ផងដែរថា ឡាវនិងកម្ពុជា គឺជាទីផ្សារកំពូលពីរសម្រាប់ធនាគារវៀតណាម ដោយសារតែមានការវិនិយោគបរទេសយ៉ាងច្រើនពីសំណាក់ក្រុមហ៊ុនវៀតណាម ៕
ចែករំលែកព័តមាននេះ