រាជធានីភ្នំពេញ ៖ តាមបណ្តាញហ្វេសប៊ុកថ្មីៗ កំពុងតែបង្ហាញនូវការគោរពស្រឡាញ់ និងកោតសរសើរមន្ត្រីនគរបាលមួយរូប ដែលបានជួយសង្គ្រោះក្មេងប្រុសម្នាក់ដែលកៀបជាប់ក្នុងរថយន្តធុនធំ១គ្រឿង ហើយពេលនាំទៅសង្គ្រោះនៅមន្ទីរពេទ្យ បានដោះឯកសណ្ឋានរបស់ខ្លួនមកគ្របដណ្ដប់ក្មេង ដែលកំពុងមានរបួសធ្ងន់ធ្ងរនោះផងដែរ ។
រឿងរ៉ាវដែលមហាជននាំគ្នាកោតសរសើរមន្ត្រីនគរបាលរូបនេះ គឺបន្ទាប់ពីមានគ្រោះថ្នាក់គួរឲ្យរន្ធត់មួយកាលពីថ្ងៃទី២៧ តុលា វេលាម៉ោង៤ទៀបភ្លឺនៅចំណុចវាលបារាម ផ្លូវជាតិលេខ៥ ចន្លោះបង្គោលគីឡូ ម៉ែត្រ លេខ៦៥និងលេខ៦៦ ក្នុងភូមិបន្ទាយមាស ឃុំតាជេស ស្រុកកំពង់ត្រឡាច ខេត្តកំពង់ឆ្នាំង រវាងរថយន្តនីស្សាន់ឌីយេសែល ពណ៌ទឹកមាស ចង្កូតស្ដាំ ពាក់ផ្លាកលេខ PSHN០១៦៤ បើកបរពីទិសខាងជើងឆ្ពោះទៅទិសខាងត្បូង និងរថយន្តហីុយ៉ាន់ដាយ ពណ៌ខៀវ ពាក់ផ្លាកលេខ កំពង់ចាម៣A-៣២៤៨ បើកបរក្នុងទិសដៅបញ្ច្រាសគ្នា ។
ក្នុងគ្រោះថ្នាក់រថយន្តធុនធំជល់គ្នានេះ បណ្តាលឲ្យស្លាប់២នាក់ ដែលម្នាក់ជាឪពុកក្មេងប្រុសរងគ្រោះ និងជាអ្នកបើកបររថយន្តផងដែរ រីឯម្នាក់ទៀតជាព្រូរថយន្ត ។ ចំណែកក្មេងប្រុសខាងលើ ដែលរងរបួសត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកកំពង់ត្រឡាច ។
ក្រោយពេលកើតហេតុ អ្នកបើកបររថយន្តម្ខាងទៀត បានរត់គេចខ្លួនបាត់ស្រមោល បន្សល់ទុកតែរថយន្តនៅនឹងកន្លែងកើតហេតុ ។ បច្ចុប្បន្ន រថយន្តទាំង២គ្រឿង ត្រូវបានយកទៅរក្សាទុកនៅអធិការដ្ឋាននគរ បាលស្រុកកំពង់ត្រឡាច រង់ចាំដោះស្រាយតាមនីតិវិធីនៅពេលក្រោយ ។
សាច់ញាតិគ្រួសារក្មេងប្រុសរងគ្រោះបានអរគុណមន្ត្រីសមត្ថកិច្ច ដែលបានជួយសង្គ្រោះ ដោយសរសេររៀបរាប់នៅលើគណនីហ្វេសប៊ុកថា «អរគុណបងប្រុសប៉ូលិស ដែលបានមើលថែក្មួយខ្ញុំ ពេលដែលខ្ញុំមិនទាន់ទៅដល់មន្ទីរពេទ្យ ក្រោយពេលដឹងខ្លួន ក្មួយប្រុសខ្ញុំម្នាក់នេះ សួររកបងប៉ូលិសចង់អរគុណ ហើយថាបានពូប៉ូលិសនៅក្បែរពេលអូនដេរក្បាល ។ អរគុណបងប៉ូលិសរកអ្វីប្រៀបមិនបានទេ ដែលបាននៅមើលក្មួយខ្ញុំ រហូតដល់ខ្ញុំទៅដល់មន្ទីរពេទ្យ អរគុណ និងអរគុណដល់គ្រូពេទ្យ ដែលបានជួយដេរក្បាលឲ្យក្មួយ
ខ្ញុំ ។
តើអ្នកណាជាអ្នកទទួលខុសត្រូវលើជីវិតបងប្រុសខ្ញុំ ដោយសារតែការធ្វេសប្រហែសរបស់អ្នកតែមួយភ្លែតប៉ុណ្ណោះ ធ្វើឲ្យអ្នកដទៃត្រូវបាត់បង់មនុស្ស ដែលគេស្រឡាញ់ កូនត្រូវព្រាត់ឪពុក ប្រពន្ធត្រូវព្រាត់ប្ដី ឪពុកម្ដាយត្រូវបាត់បង់កូនគ្រួសារត្រូវព្រាត់ប្រាសគ្នា តើយកអ្វីមកសង? ចង់សងអ្វីក៏វាគ្មានន័យ អ្នកមានចិត្ដជាមនុស្សទេ បង្កវាឡើងមកហើយក៏រត់បាត់ មិនប្រាប់គ្រួសារគេមួយម៉ាត់ ហោចណាស់ក៏អាណិតក្មេងតូចម្នាក់ដែលនៅលើឡានមិនទាន់ស្លាប់ដែរ បេះដូងអ្នកសាងមកពីអ្វី?» ។
ចំណែកបងថ្លៃម្នាក់ទៀត បានបង្ហាញអារម្មណ៍ឈឺចាប់សោកស្ដាយជាពន់ពេក ពេលបាត់បង់ជីវិតបុរសម្នាក់នេះ ដោយសរសេរថា «អ្នកណាសងជីវិតប្អូនថ្លៃខ្ញុំ ដោយសារតែអ្នកធ្វេសប្រហែស ធ្វើឲ្យក្មួយខ្ញុំត្រូវកំព្រាឪពុកទាំងនៅក្មេង ប្អូនស្រីខ្ញុំត្រូវព្រាត់ប្រាសប្តី…។ សូមទៅឲ្យបានសុខណា ជាតិនេះយើងមាននិស្ស័យជាបងថ្លៃប្អូនថ្លៃគ្នាត្រឹមប៉ុណ្ណឹង បងនឹងមើលថែកូននិងប្រពន្ធឯងឲ្យបានល្អ» ។
មន្ត្រីប៉ូលិសដែលទទួលបាននូវការកោតសរសើរ ចំពោះស្មារតីផ្តល់នូវភាពកក់ក្តៅដ៏កម្រនេះ ឈ្មោះ ប៉ូ ច័ន្ទមុនី អាយុ២៩ឆ្នាំ ។ លោក មុនី មានឋានន្តរស័ក្តិអនុសេនីយ៍ទោ ជាមន្ត្រីប៉ូលិសនៃអធិការដ្ឋានស្រុកកំពង់ ត្រឡាច ផ្នែកចរាចរណ៍ ។
ចែករំលែកព័តមាននេះ