ប្រទេសថៃ ៖ នៅក្រុងបាងកកនារីៗរកស៊ីរត់ម៉ូតូឌុប មានកាន់តែច្រើនខណៈកាលពីមុនមានតែបុរស។ នារីរត់មូតូឌុបម្នាក់អះអាងប្រាប់សារព័ត៌មានកាលពីថ្ងៃទី២៧តុលាទាំងទឹកមុខញញឹមថា ម៉ូតូតាក់ស៊ី ឬម៉ូតូឌុបជាមធ្យោបាយដឹកជញ្ជូនសំខាន់បំផុតមួយ ដើម្បីគេចពីការកកស្ទះចរាចរណ៍ក្នុងទីក្រុងមានប្រជាជនដល់១០លាននាក់នោះ ដែលកាន់តែអភិវឌ្ឍន៍រយៈពេលប៉ុន្មានឆ្នាំចុងក្រោយនេះ។
ពាក់មួកសុវត្តិភាពឬក្បាលទទេ អ្នករត់ម៉ូតូឌុបតែងដឹកអ្នកដំណើរទាំងឡាយណាដែលប្រញាប់ឬខ្ជិលបើករថយន្ត ដែលរមែងជាប់ស្ទះផ្លូវយូរ ដោយម៉ូតូឌុបអាចជែងរថយន្តនានាឲ្យតែមានចន្លោះទៅរួច។ពីដើមអ្នករត់ម៉ូតូឌុបសុទ្ធតែបុរស តែឥឡូវគ្រប់កៀនកោះនៃដងវិថីគេឃើញនារីរត់ម៉ូតូឌុបមានកាន់តែច្រើន។
សមាគមម៉ូតូតាក់ស៊ីក្រុងបាងកកវាយតម្លៃថា ពេលនេះនារីតំណាងឲ្យរហូត៣០%នៃអ្នករត់ម៉ូតូឌុបនៅក្រុងបាងកក។លោកAR SATRANONជាអ្នករកស៊ីរត់ម៉ូតូឌុបជើងចាស់ម្នាក់ចាប់តាំងពី៧ឆ្នាំមកហើយ សម្ដែងការអបអរសាទរដែលនារីរត់ម៉ូតូតាក់ស៊ីមានកាន់តែច្រើន។គាត់ថានោះបង្ហាញពីនារីជំនាន់ថ្មីដែលមាំមួននិងកាន់តែក្លាហាន។
យោងតាមពេលវេលារត់ អ្នករត់ម៉ូតូឌុបម្នាក់នៅក្រុងបាងកក អាចរកប្រាក់បានរវាងពី៥០០ទៅ១២០០បាតក្នុង១ថ្ងៃ ក្នុងប្រទេសដែលកម្មកររោងចក្រទទួលបានចំណូលដើមច្រើនបំផុត៣០០បាតក្នុង១ថ្ងៃ៕
ចែករំលែកព័តមាននេះ