រាជធានីភ្នំពេញ៖ ចាងហ្វាងផលិតកម្ម RED Picture បានចេញសារប្រតិកម្មខ្លាំងចំពោះរោងភាពយន្តដែលចង់ឲ្យលើកពេលចាក់បញ្ចាំងខ្សែភាពយន្តរឿង«បិសាចគំនូរ»របស់ខ្លួន ដោយរោងភាពយន្តចង់ចាក់បញ្ចាំងភាពយន្តថៃវិញ ។
ផលិតកម្ម តារាសម្តែង និងអ្នកគាំទ្រភាពយន្តខ្មែរស្នើឲ្យរោងភាពយន្តគោរពលើការព្រមព្រៀងគ្នា ឲ្យតម្លៃភាពយន្តខ្មែរ និងបង្ហាញហេតុផលសមរម្យមួយដែលអាចទទួលយកបាន។ តាមការគ្រោងទុករឿង«បិសាចគំនូរ» របស់ផលិតកម្មRED Picture គ្រោងនឹងចាក់បញ្ចាំងចាប់ពីថ្ងៃទី១ខែវិច្ឆិកា តទៅ ដោយមានទាំងការផ្សព្វផ្សាយ ចែកលិខិតអញ្ជើញសិល្បករ និងភ្ញៀវចូលរួមសម្ពោធរួចហើយ ប៉ុន្តែស្រាប់តែលេចចេញបាតុភាពមួយដែលធ្វើឲ្យផលិតករ និងសិល្បករស្រងាកចិត្ត ។
លោកឌៀប សុវណ្ណតារា ចាងហ្វាងផលិតកម្ម និងអ្នកដឹកនាំសម្តែងបញ្ជាក់ថា ប្រសិនបើខ្សែភាពយន្តរឿង«បិសាចគំនូរ»មិនអាចចាក់បញ្ចាំងនៅរោងភាពយន្តណាមួយនៅថ្ងៃទី១ខែវិច្ឆិកា ទេ លោក តារាសម្តែង ព្រមទាំងទស្ស និកជនជាអ្នកគាំទ្រស្នើសុំហេតុផលមួយសមរម្យច្បាស់លាស់ដែលអាចទទួលយកបាន ទើបលោកព្រម ប៉ុន្តែប្រសិនបើគ្រាន់តែជាហេតុផលរឿងខ្មែរប៉ះជាមួយរឿងថៃ ហើយឲ្យរឿងខ្មែរដូរថ្ងៃចាក់បញ្ចាំង លោកមិនទទួលជាដាច់ខាត ។
លោកនិយាយថា«បងប្អូនដែលគាំទ្រភាពយន្តខ្មែរដែលតែងតែជួយលើកទឹកចិត្តផលិតករ និងតារាសម្តែងទាំងអស់មិនគួរត្រូវមកស្លាប់ទឹកចិត្តដោយសារមូលហេតុនេះនោះទេ ។ តើខ្ញុំត្រូវមានទឹកចិត្តផលិត និងពង្រឹងគុណភាពបន្តទៀតទេ ហើយតើតារាសម្តែងមានទឹកចិត្តថតភាពយន្តទៀតទេ បើគ្រាន់តែសុំបញ្ចាំងក្បែរគេផងពុំបាន ។ ខ្ញុំសង្ឃឹមថារឿងខ្មែរដ៏កម្សត់មួយនេះនឹងអាចសុំបញ្ចាំងក្បែរគេផងចុះ »។
លោកនិយាយថា ភាពយន្តខ្នាតធំរឿង«បិសាចគំនូរ»របស់ផលិតកម្ម RED Picture បានសម្រិតសម្រាំងផលិតអស់រយៈពេលជាច្រើនខែ ដោយចូលរួមដោយតារាសម្តែងប្រុសស្រីល្បីឈ្មោះជាច្រើនដូចជា លោកលឹម ជាឡាយ កញ្ញាគៀត សុវណ្ណាឡាង លោកជា សុវណ្ណនរាហ៍ អ្នកនាង សុខ សោម៉ាវត្តីជាដើម ។ ភាពយន្តនេះគ្រោងនឹងចាក់បញ្ចាំងនៅគ្រប់រោងភាពយន្តទំនើបទាំងអស់នៅកម្ពុជាចាប់ពីថ្ងៃទី១ខវិច្ឆិកាខាងមុខនេះ ។
ទោះជាយ៉ាងណាក្តីបញ្ហាចម្រូងចម្រាសនេះនៅមិនទាន់លេចចេញដំណោះស្រាយ ឬការបញ្ជាក់តបពីតំណាងរោងភាពយន្តនៅឡើយ ប៉ុន្តែកន្លងមកភាពយន្តខ្មែរមួយចំនួនត្រូវបានបដិសេធមិនទទួលចាក់បញ្ចាំង ឬត្រូវបានគេលើកពេលព្រោះតែត្រូវទុកម៉ោងសម្រាប់ចាក់បញ្ចាំងភាពយន្តបរទេសជំនួសវិញ៕
ចែករំលែកព័តមាននេះ