ខេត្តសៀមរាប ៖ កម្លាំងនគរបាលសង្កាត់ស្វាយដង្គំ បានធ្វើការឃាត់ខ្លួនប្រុសស្រី២នាក់ដែលរារាំងសមត្ថកិច្ច ថែមទាំងជេរប្រមាថ ខណៈកម្លាំងនគរបាលចុះត្រួតពិនិត្យតាមផ្ទះជួល កាលពីម៉ោង៩និង៣០នាទីព្រឹក ថ្ងៃទី២៦ ខែតុលា ឆ្នាំ២០១៨…
ខេត្តសៀមរាប ៖ កម្លាំងនគរបាលសង្កាត់ស្វាយដង្គំ បានធ្វើការឃាត់ខ្លួនប្រុសស្រី២នាក់ដែលរារាំងសមត្ថកិច្ច ថែមទាំងជេរប្រមាថ ខណៈកម្លាំងនគរបាលចុះត្រួតពិនិត្យតាមផ្ទះជួល កាលពីម៉ោង៩និង៣០នាទីព្រឹក ថ្ងៃទី២៦ ខែតុលា ឆ្នាំ២០១៨ ដែលជាកម្មសិទ្ធិរបស់ឈ្មោះ លាន សុចិន្តា មានទីលំនៅក្នុងភូមិសាលាកន្សែង សង្កាត់ស្វាយដង្គំ ខេត្តសៀមរាប រួមទាំងដកហូតវត្ថុតាងមួយចំនួនធំទៀតផង។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការនគរបាលខេត្ត បានប្រាប់ថា ជនសង្ស័យប្រុសស្រីទាំង២នាក់មាន ១-ឈ្មោះ ចាប ម៉ារ៉ា ភេទស្រី អាយុ៣៤ឆ្នាំ ស្នាក់នៅបន្ទប់ផ្ទះជួល ភូមិសាលាកន្សែង សង្កាត់ស្វាយដង្គំ ខេត្តសៀមរាប។ ២-ឈ្មោះ ពុំ យ៉ាណាន់ ភេទស្រី អាយុ៣២ឆ្នាំ ស្នាក់នៅផ្ទះជួល ភូមិសាលាកន្សែង សង្កាត់ស្វាយដង្គំ ។
លោកបានបញ្ជាក់ថា បន្ទាប់ពីកម្លាំងយើងបានធ្វើការចុះត្រួតពិនិត្យរដ្ឋបាលនៅក្នុងសង្កាត់ស្វាយដង្គំ តាមផ្ទះជួលដែលជាកម្មសិទ្ធិរបស់ឈ្មោះ លាន សុចិន្តា ភេទស្រី អាយុ៣៦ឆ្នាំ មានទីលំនៅក្នុងភូមិសាលាកន្សែង សង្កាត់ស្វាយដង្គំ រហូតឈានដល់ឃាត់ខ្លួនបានជនសង្ស័យ ប្រុសស្រីចំនួន២នាក់ ពាក់ព័ន្ធរក្សាទុក និងប្រើប្រាស់សារធាតុញៀនខុសច្បាប់។
ក្នុងនោះដកហូតវត្ថុតាងមានដូចជា៖ -គ្រឿងញៀនម្ស៉ៅក្រាមពណ៌ចំនួនពីរកញ្ចប់ និងឧបករណ៍ប្រើប្រាស់គ្រឿងញៀនមួយចំនួន។ -ទូរស័ព្ទចំនួន៤គ្រឿង ៖ ១-ម៉ាកណូគាចុចពិល, ២-ម៉ាកអាហ្វូនស៉ិចពណ៌មាស, ៣-ម៉ាកអាយហ្វូនស៉ិចផ្លាស់ពណ៌មាស, និង៤.ម៉ាកហ៊ូវ៉ៃពណ៌ខៀវ។
-អាយផេតពណ៌ទឹកប្រាក់ចំនួនមួយ -លិខិតឆ្លងដែនចំនួនពីរក្បាល -រថយន្តម៉ាក(Morning) ពណ៌ទឹកប្រាក់ ពាក់ស្លាកលេខសៀម 2B-4520 ចំនួន១គ្រឿង។ -រថយន្តម៉ាកLexus400 ពណ៌ស ពាក់ស្លាកលេខភ្នំពេញ 2AA-6226។ -ប្រាក់ដុល្លារចំនួន៦៣៥៥ដុល្លារ។
លោកបានបញ្ជាក់ទៀតថា មុនពេលកម្លាំងយើងកំពុងធ្វើការត្រួតពិនិត្យ ស្រាប់តែជនសង្ស័យទាំងពីរនាក់នោះ បានធ្វើសកម្មភាពរារាំងសមត្ថកិច្ច និងជេរប្រមាថមកលើសមត្ថកិច្ច បោកកំប៉ុងស្រាបៀនៅចំពោះមុខសមត្ថកិច្ចថែមទៀតផង។ ក្រោយមកកម្លាំងយើងក៏យកមកសួរនាំនៅប៉ុស្តិ៍រដ្ឋបាលសង្កាត់ស្វាយដង្គំ រួចក៏ប្រគល់ជនសង្ស័យប្រុសស្រីទាំង២នាក់ជូនទៅនគរបាលប្រឆាំងគ្រឿងញៀនក្រុងសៀមរាប ដើម្បីអនុវត្តនីតិវិធីបន្ត។
បច្ចុប្បន្នជនសង្ស័យប្រុសស្រីទាំង២នាក់ និងវត្ថុតាង ត្រូវកម្លាំងជំនាញកំពុងរៀបចំកសាងសំណុំរឿងបញ្ជូនទៅតុលាការខេត្ត នៅថ្ងៃទី២៨ ខែតុលា ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ