រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានអះអាងថាបញ្ហាសិទ្ធិមនុស្សនៅកម្ពុជាគ្មានការរំលោភដូចការលើកឡើងរបស់ក្រុមប្រឆាំងតែងតែចោទរាជរដ្ឋាភិបាលនោះទេ ។ ការលើកឡើងរបស់អ្នកនាំពាក្យបក្សកាន់អំណាចនេះ ខណៈដែលក្រុមប្រឆាំង និងសង្គមស៊ីវិល…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានអះអាងថាបញ្ហាសិទ្ធិមនុស្សនៅកម្ពុជាគ្មានការរំលោភដូចការលើកឡើងរបស់ក្រុមប្រឆាំងតែងតែចោទរាជរដ្ឋាភិបាលនោះទេ ។
ការលើកឡើងរបស់អ្នកនាំពាក្យបក្សកាន់អំណាចនេះ ខណៈដែលក្រុមប្រឆាំង និងសង្គមស៊ីវិល ព្រមទាំងអ្នកវិភាគនយោបាយមួយចំនួនបាននាំគ្នាលើកឡើងថា នៅក្នុងប្រទេសកម្ពុជាមានការរំលោភសិទ្ធមនុស្សយ៉ាងធ្ងន់ធ្ងរ ។ យ៉ាងណាក្តីលោក សុខ ឥសាន បានឲ្យដឹងនៅថ្ងៃទី២៨ ខែតុលានេះថា ដោយសាររាជរដ្ឋាភិបាលកម្ពុជាបានអនុវត្តត្រឹមត្រូវតាមគោលការណ៍លទ្ធិប្រជាធិបតេយ្យ និងនីតិរដ្ឋទើបប្រជាជនកម្ពុជាបានរស់នៅប្រកបដោយសុខដុមរមនា នៅក្នុងសង្គមអស់រយៈពេលរាប់សិបឆ្នាំមកហើយ បើគិតចាប់ពីឆ្នាំ១៩៩៣មក ។ ដូច្នេះមានន័យថានៅកម្ពុជាគ្មានការយាយី និងរំលោភសិទ្ធិមនុស្សធ្ងន់ធ្ងរដូចជនមួយចំនួននិយាយផ្ទុយពីការពិតនោះទេ ។
លោកបញ្ជាក់ «បើសិនជាមានការរំលោភសិទ្ធិមនុស្សធ្ងន់ធ្ងរដូចពួកនោះថា មែនម្ល៉េះសមកម្ពុជាបានមានឈ្មោះនៅក្នុងបញ្ជីខ្មៅរបស់អង្គការសហប្រជាជាតិ (អសប) ទៅហើយ ។ ក្រុម ប្រឹក្សាសិទ្ធិមនុស្សអង្គការសហប្រជាជាតិ និងអ.ស.ប ទាំងមូលមិនដែលបានកត់ឈ្មោះ ប្រទេសកម្ពុជានៅក្នុងបញ្ជីប្រទេសដែលមានការរំលោភសិទ្ធិមនុស្សឡើយ» ។ អ្នកនាំពាក្យរូបនេះបានបន្ថែមថា ដោយឡែកមានតែជនមួយចំនួនដែលមាននិន្នាការនយោបាយលំអៀងទេដែលនិយាយមិនល្អពីបញ្ហាសិទ្ធិមនុស្សនៅកម្ពុជាដូចជា លោកប្រែតអាដាំ លោកស្រីរ៉ូណាស្មីត និងបណ្តាជននៅក្នុងអង្គការមិនមែនរដ្ឋាភិបាលមួយចំនួននៅក្នុងកម្ពុជាទោះបីរាជរដ្ឋាភិបាលធ្វើអ្វីក៏នៅតែមានការរំលោភសិទ្ធិមនុស្សដែរ ។
ចំពោះបញ្ហាសិទ្ធិមនុស្សលោក សុខ ឥសាន បានគូសបញ្ជាក់យ៉ាងដូច្នេះថា ដើម្បីមានសិទ្ធិមនុស្សល្អត្រឹមត្រូវលុះត្រាពួកគេទៅជួលផ្ទះធំមួយ ហើយទៅរស់នៅជុំគ្នាទៅនោះទើបបានមានសិទ្ធិមនុស្សពេញលេញតាមដែលពួកគេចង់បាន ។ នៅពេលនោះនៅកម្ពុជាពិតជាលែងមានបញ្ហារំលោភសិទ្ធិមនុស្សដូចមុនហើយ» ។
សូមជម្រាបថា ការលើកឡើងលោក សុខ ឥសាន ខណៈដែលអ្នករាយការណ៍ពិសេសរបស់ អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាអ្នកស្រី រ៉ូណា ស្ម៊ីត (Rhona Smith) គ្រោងនឹងមកបំពេញទស្សនកិច្ចនៅប្រទេសកម្ពុជានាពេលចុងខែតុលា ឆ្នាំ២០១៨នេះ ។ អ្នកស្រីរ៉ូណា ស្មីត ទស្សនកិច្ចនៅកម្ពុជាចាប់ពីថ្ងៃទី២៩ តុលា ដល់ថ្ងៃទី០៨ ខែវិច្ឆិកាខាងមុខនេះ ដំណើរទស្សនកិច្ចនេះអ្នកស្រីគ្រោងជួបមន្ត្រីជាន់ខ្ពស់រាជរដ្ឋាភិបាលតំណាងមន្ត្រីសង្គមស៊ីវិលនិងអ្នកការទូតនៅកម្ពុជា ។
មុនពេលអ្នកស្រីចាកចេញពីកម្ពុជាអ្នកស្រីនឹងធ្វើសន្និសីទសារព័ត៌មានស្ដីពីលទ្ធផលនៃ ដំណើរទស្សនកិច្ចនេះ ហើយអ្នកស្រីនឹងធ្វើរបាយការណ៍ពីស្ថានភាពសិទ្ធិមនុស្សកម្ពុជាទៅអង្គការសហប្រជាជាតិខែកញ្ញា ឆ្នាំ២០១៩ខាងមុខ ។ ជាងនេះការលើកឡើងរបស់អ្នកនាំពាក្យកាន់អំណាចនេះ បន្ទាប់ក្រុមអង្គការសង្គមស៊ីវិលមួយចំនួនគ្រោងនឹងបង្ហាញរបាយការណ៍ខ្លួនប្រាប់ទៅអ្នករាយការណ៍ពិសេសទទួលបន្ទុកសិទ្ធិមនុស្សផងដែរ ៕
ចែករំលែកព័តមាននេះ