អង្គុយចាំមិត្តស្រីសុខៗ ស្រាប់តែលេចមុខបុរស២នាក់ស្ទុះមកកា.ប់
- សៀមរាប
ខេត្តសៀមរាប ៖ យោងតាម ពាក្យបណ្តឹងរបស់បុរសជាជនរងគ្រោះ ចុះថ្ងៃទី ២២ ខែ តុលា ឆ្នាំ ២០១៨…
ខេត្តសៀមរាប ៖ យោងតាម ពាក្យបណ្តឹងរបស់បុរសជាជនរងគ្រោះ ចុះថ្ងៃទី ២២ ខែ តុលា ឆ្នាំ ២០១៨ ដែលត្រូវជនសង្ស័យចំនួន២នាក់ បានកាប់មកលើខ្លួន បណ្តាលឱ្យរបួសធ្ងន់ ខណៈជនរងគ្រោះកំពុងឈប់ម៉ូតូចាំពួកមិត្តស្រីនៅមុខសាលារៀនវិហារចិន ភ្លាមៗនោះស្រាប់តែលេចមុខជនសង្ស័យចំនួន២នាក់ យកដាវមកកាប់យកៗតែម្តង កុំតែជនរងគ្រោះរត់ទាន់ កុំអីក្ស័យជីវិតបាត់ទៅហើយ។
ហេតុការណ៍ឃាត់ខ្លួនជនសង្ស័យទាំង២នាក់ធ្វើឡើងនៅការិយាល័យនគរបាលព្រហ្មទណ្ឌកំរិតស្រាលនៃស្នងការនគរបាលខេត្ត បន្ទាប់ពីនាំខ្លួនជនទាំង២នាក់យកមកសួរ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ បានប្រាប់ថា បន្ទាប់ពីមានពាក្យបណ្តឹង ពីជនរងគ្រោះឈ្មោះ ផាន ផានិត ភេទប្រុស អាយុ ២១ឆ្នាំ រស់នៅភូមិស្វាយដង្គំ សង្កាត់ស្វាយដង្គំ ក្រុងសៀមរាប ចុះថ្ងៃទី ២២ ខែ តុលា ឆ្នាំ ២០១៨ ដែលត្រូវជនសង្ស័យចំនួន២នាក់កាប់បណ្តាលឱ្យរបួសធ្ងន់ និង ម៉ូតូខូចខាតរួចមក លោកក៏បានបញ្ជាឱ្យកម្លាំងការិយាល័យនគរបាលព្រហ្មទណ្ឌកំរិតស្រាល ចុះស្រាវជ្រាវ រហូតនាំខ្លួនមកកាន់ការិយាល័យជំនាញ ដើម្បីសួរនាំ ។
ពេលនោះជនសង្ស័យទាំង២នាក់ ក៏បានសារភាពនៅចំពោះមុខសមត្ថកិច្ចថា ពួកខ្លួនទាំង២នាក់ពិតជាបានប្រព្រឹត្តដូចពាក្យបណ្តឹងរបស់ជនរងគ្រោះពិតប្រាកដមែន ទើបលោកបានសុំគោលការណ៍ពីថ្នាក់លើ ឃាត់ខ្លួនតែម្តង។
លោកបានបញ្ជាក់ថា ជនសង្ស័យទាំង២នាក់ម្នាក់ឈ្មោះ ពុធ ម៉ៅ ភេទប្រុស អាយុ៤០ឆ្នាំ មុខរបរមិនពិតប្រាកដ និងម្នាក់ទៀតឈ្មោះ អ៊ូរ ជីដារស្មីដារ៉ា ហៅ កុក ភេទប្រុស អាយុ ២៣ឆ្នាំ មុខរបរមិនពិតប្រាកដ អ្នកទាំងពីររស់នៅភូមិវិហារចិន សង្កាត់ស្វាយដង្គំ ក្រុងសៀមរាប ពាក់ព័ន្ធករណីហឹង្សាដោយចេតនា និងធ្វើឱ្យខូចខាតទ្រព្យសម្បត្តិដោយចេតនា កាលពីវេលាម៉ោង១១ថ្ងៃ ២២ខែតុលាឆ្នាំ២០១៨ ត្រង់ចំណុចភូមិវិហារចិន សង្កាត់ស្វាយដង្គំ ក្រុងសៀមរាប ។
លោកបានបញ្ជាក់ទៀតថា មុនពេលកើតហេតុ ជនរងគ្រោះបានជិះម៉ូតូម៉ាក Zoomer x ពណ៌ក្រហម ឆ្នាំ២០១៧ ស្លាកលេខ សៀមរាប ១Y-៣១៨៦ ទៅឈប់ចាំមិត្តភក្តិឈ្មោះ ស ស្រីនាថ ភេទស្រី អាយុ១៥ឆ្នាំ នៅមុខសាលារៀនវិហារចិន ភ្លាមនោះជនសង្ស័យឈ្មោះ ពុធ ម៉ៅ និងឈ្មោះអ៊ូរ ជីដារស្មីដារ៉ា ហៅកុក និងបក្សពួកម្នាក់ទៀតឈ្មោះ ឆាយ ភេទប្រុស បានធ្វើសកម្មភាពយកកាំបិតផ្គាក់ចំនួន២ មកកាប់ទៅលើជនរងគ្រោះបណ្តាលឱ្យរបួសដៃខាងឆ្វេងមួយកន្លែង និងស្មាស្តាំមួយកន្លែងធ្ងន់ធ្ងរ ភ្លាមនោះជនរងគ្រោះបានរត់គេចខ្លួន។ បន្ទាប់មកក្រុមជនសង្ស័យក៏បានកាប់ម៉ូតូរបស់ជនរង គ្រោះ បណ្តាលឱ្យរងការខូចខាតទាំងស្រុង។
រហូតដល់ថ្ងៃទី២៦ ខែតុលាឆ្នាំ២០១៨ ក្រោយពីសមត្ថកិច្ចចុះស្រាវជ្រាវរកជនសង្ស័យ តាមពាក្យបណ្តឹងរបស់ជនរងគ្រោះ រួចមក សមត្ថកិច្ចក៏បានរកឃើញឃើញជនសង្ស័យទាំង២នាក់ និងបាននាំខ្លួនជនសង្ស័យទាំងពីរនាក់ខាងលើមកធ្វើការសាកសួរ ពេលនោះជនសង្ស័យក៏បាន ឆ្លើយសារភាពថា រូបគេពិតជាបានធ្វើសកម្មភាព ដូចករណីខាងលើនេះពិតប្រាកដមែន ។
បច្ចុប្បន្ន ជនសង្ស័យទាំង២នាក់ត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនទៅតុលាការខេត្ត នៅថ្ងៃទី២៨ ខែតុលា ឆ្នាំ២០១៨ ដើម្បីចាត់ការបន្តទៅតាមនិតិវិធី ច្បាប់៕
ចែករំលែកព័តមាននេះ