ខេត្តសៀមរាប ៖ នៅរសៀលថ្ងៃទី២៦ ខែតុលា ឆ្នាំ២០១៨ តំណាងគ្រប់ស្ថាប័នជាតិនៃព្រះរាជាណាចក្រកម្ពុជា បានអញ្ជើញចូលរួមគោរពវិញ្ញាណក្ខន្ធ និងរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសព ឯកឧត្តមឧត្តមសេនីយ៍ឯកជា ម៉ន មេញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ ដែលបានទទួលមរណៈភាពនៅវេលាម៉ោង២១និង១០នាទី នារាត្រីថ្ងៃទី២៣ ខែតុលា ឆ្នាំ២០១៨ ក្នុងជន្មាយុ៦៦ឆ្នាំ ដោយរោគាពាធ ហើយត្រូវបានតម្កល់ធ្វើបុណ្យសពនៅគេហដ្ឋាននៃសព ស្ថិតនៅភូមិ ត្រពាំងសេះ សង្កាត់គោកចក ក្រុងខេត្តសៀមរាប ។
ដោយមានវត្តមានរបស់គណៈប្រតិភូអញ្ជើញចូលរួមគោរពវិញ្ញាណក្ខ័ន្ធនាឱកាសនោះរួមមានគណៈប្រតិភូគណបក្សប្រជាជនកម្ពុជាដឹកនាំដោយឯកឧត្តម ប៊ុន យឿន សមាជិកគណៈកម្មាធិការកណ្តាល និងជាអនុប្រធានគណៈចាត់តាំងគណៈកម្មាធិការកណ្តាលនៃគណបក្សប្រជាជនកម្ពុជា , គណៈប្រតិភូរដ្ឋសភាជាតិដឹកនាំដោយឯកឧត្តមឧកញ៉ាបណ្ឌិតសៀង ណាំង សមាជិករដ្ឋសភាមណ្ឌលសៀមរាប , ប្រតិភូក្រសួងបរមរាជវាំងដឹកនាំដោយ ឯកឧត្តម អ៊ឹន រដ្ឋាសេរី , ប្រតិភូក្រសួងមហាផ្ទៃ ដឹកនាំដោយឯកឧត្តមសន្តិបណ្ឌិត អ៊ុក គឹមលេខ រដ្ឋលេខាធិការ ក្រសួងមហាផ្ទៃ ,ប្រតិភូកាកបាទក្រហមកម្ពុជាដឹកនាំដោយលោកជំទាវ ពុំ ចន្ទីនី អគ្គលេខាធិការកាកបាទក្រហម កម្ពុជា ,ប្រតិភូក្រសួងកសិកម្មរុក្ខាប្រមាញ់ និងនេសាទដឹកនាំដោយឯកឧត្តមបណ្ឌិត ណៅ ធួក រដ្ឋលេខាធិការ តំណាងប្រតិភូក្រសួងសាធារណការ និងដឹកជញ្ជូន ដឹកនាំដោយលោក គឹម ប៉ុណ្ណា ប្រធានមន្ទីរសាធារណការនិងដឹកជញ្ជូនខេត្តសៀមរាប ព្រមទាំងតំណាងក្រសួងស្ថាប័ន និងតំណាងស្ថានីយ៍ទូរទស្សន៍កងយោធពលខេមរភូមិន្ទ និងក្រុមហ៊ុនសណ្ឋាគារសូហ្វីតែលសៀមរាប និងភ្នំពេញផងដែរ ។
សូមបញ្ជាក់ផងដែរថា ឯកឧត្តមឧត្តមសេនីយ៍ឯក ជា ម៉ន បានឆ្លងកាត់តាមដំណាក់កាលក្នុងការបំពេញភារកិច្ចការពារជាតិមាតុភូមិកម្ពុជា ហើយឯកឧត្តមសេនីយ៍ឯក ដែលជាថ្នាក់ដឹកនាំមួយដ៏ឆ្នើមក្នុងការបញ្ជាដឹកនាំបំពេញកាតព្វកិច្ចការពារជាតិមាតុភូមិ ក្នុងរយៈពេល៣៩ឆ្នាំ កន្លងមកនេះ ។ ក្នុងមួយជីវិតរបស់ឯកឧត្តមដោយមានមនសិកាស្នេហាជាតិមាតុភូមិ និងប្រជាជនបានធ្វើកាបូជានូវកម្លាំងកាយ គំនិតបញ្ញា ស្មារតី ក្នុងការចូលរួមចលនារំដោះជាតិមាតុភូមិកម្ពុជាឲ្យរួចផុតពីរបបប្រល័យពូជសាសន៍ ប៉ុល ពត នាថ្ងៃជ័យជម្នះ៧មករា១៩៧៩ និងកសាងការពារមាតុភូមិឲ្យកិច្ចអភិវឌ្ឍន៍ទៀតផង ។
ក្នុងពិធីគោរពវិញ្ញាណក្ខន្ធ ឯកឧត្តមឧត្តមសេនីយ៍ឯកជា ម៉ន តំណាងមកគ្រប់ស្ថាប័នជាតិក៏បានធ្វើការសម្តែងនូវការសោកស្តាយយ៉ាងខ្លាំងនៃការបាត់បង់មន្ត្រីថ្នាក់ដឹកនាំមួយរូបដ៏ឆ្នើមក្នុងជួរកងកម្លាំងប្រដាប់អាវុធដែលពោពេញទៅដោយបទពិសោធន៍ បច្ចេកទេស ក្នុងការដឹកនាំ និង បំពេញភារកិច្ចជូនជាតិមាតុភូមិកន្លងមកព្រមទាំងបានចូលរួមក្នុងកិច្ចការកសាង និងអភិវឌ្ឍន៍នូវសមទ្ធិផលនានា នៅតាមមូលដ្ឋាននៃយោធភូមិភាគទី៤ ។
ម្យ៉ាងទៀតការបាត់បង់ស្វាមី លោកឪពុក ជីតា ជាទីស្រឡាញ់របស់បងស្រី និងកូនៗចៅៗ ក៏ដូចគ្រប់ស្ថាប័នជាតិមេបញ្ជាការគ្រប់ជាន់ថ្នាក់ និងមន្ត្រីរាជការដែលបាត់បង់នូវកម្មាភិបាលឆ្នើមមួយរូបក៏ដូចជា ការបាត់បង់នូវវត្ថុអ្វីមួយដែលរកតម្លៃអ្វីមកប្រៀបធៀបផ្ទឹមពុំបាននៅក្នុងក្រុមគ្រួសារ និង សង្គមជាតិ ។
ក្នុងនោះដែរគណៈប្រតិភូគ្រប់ស្ថាប័នក្រសួងក៏បានធ្វើការបូជាទៀនធូប ដើម្បីឧទ្ទិសជូនដល់ដួងវិញ្ញាណក្ខន្ធឯកឧត្តមសេនីយ៍ឯកជា ម៉ន សូមឲ្យឯកឧត្តមបានទៅកាន់សុខតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារបងប្អូនកូនចៅ និងថ្នាក់ដឹកនាំគ្រប់ជាន់ថ្នាក់ ក្នុងជួរកងកម្លាំងប្រដាប់អាវុធ មន្ត្រីរាជការឲ្យទទួលនូវសេចក្តីសុខ និងឲ្យស្គាល់នូវតែសុខសន្តិភាព សុភមង្គល និងការអភិវឌ្ឍន៍ប្រទេសជាតិលើគ្រប់វិស័យផងដែរ ។ ក្នុងឱកាសជួបសំណេះសំណាលសម្តែងការរំលែកទុក្ខនៃក្រុមគ្រួសារសពគ្រប់តំណាងស្ថាប័នទាំងអស់ក៏បានធ្វើការប្រគល់នូវលិខិតរំលែកទុក្ខរបស់ស្ថាប័ននីមួយៗ រួមទាំងបច្ច័យ ដើម្បីចូលរួមជាមួយក្រុមគ្រួសារនៃសព ឯកឧត្តមឧត្តមសេនីយ៍ឯក ជា ម៉ន យកទៅប្រើប្រាស់ក្នុងពិធីធ្វើបុណ្យសពទៅតាមគន្លងប្រពៃណីព្រះសាសនា ៕
ចែករំលែកព័តមាននេះ