រាជធានីភ្នំពេញ ៖ បុរសជាជនអណាថាម្នាក់ទំនងជាកើតជំងឺខ្យល់គរបានដួលស្លាប់បាត់បង់ជីវិត
ភ្លាមៗមួយរំពេច ក្រោយពីគាត់កំពុងតែជួយប្រមូលសំរាមសុខៗក៏ត្អូញប្រាប់គេឯងថា «ដូចជា
ងងឹតខ្លាំងណាស់» បានបន្តិច ក៏ដួលដេកទៅលើដីស្លាប់យ៉ាងអាណោចអាធ័ម ។
ហេតុការណ៍នេះដែរបានបង្កការភ្ញាក់ផ្អើលកើតឡើងកាលពីវេលាម៉ោង៥ល្ងាចថ្ងៃទី ២៧ ខែ តុលា ឆ្នាំ ២០១៨ នៅចំណុចគំនរសំរាមលើមាត់លូ (ខាងលិខផ្សារបឹងត្របែក) ផ្លូវលេខ១០៥ ក្នុងសង្កាត់បឹងត្របែក ខណ្ឌចំការមន។
តាមប្រភពព័ត៌មានពីសម្ថកិច្ចបានប្រាប់ឱ្យដឹងថា ជនរងគ្រោះដែលស្លាប់ឈ្មោះ ធី ហៅ ចំរើន ភេទប្រុស អាយុប្រហែលជា២៥ឆ្នាំ មានមុខរបរ និងទីលំនៅមិនពិតប្រាកដ បច្ចុប្បន្នស្នាក់នៅកន្លែងកើតហេតុខាងលើ។
មុនពេលកើតហេតុ បុរសរងគ្រោះរួមជាមួយនឹងក្រុមកម្មករប្រុសៗដែលជាបុគ្គលិករបស់ក្រុមហ៊ុនស៊ីនទ្រី ចំនួនពី៣ទៅ៤នាក់កំពុងតែនាំគ្នាប្រមូលសំរាមនៅក្បែរកន្លែងស្នាក់នៅរបស់ជនរងគ្រោះនោះ។
តាមប្រភពដដែលបានប្រាប់បន្តទៀតថា ខណៈដែលពួកគេកំពុងតែប្រមូលសំរាមសុខៗនោះ ក៏ស្រាប់តែបុរសរងគ្រោះបានត្អូញត្អែរប្រាប់គេឯងថា «ដូចជាងងឹតមុខខ្លាំងណាស់» ហើយក៏ដើរដំដៅទៅកាន់កន្លែងសំរាករបស់គាត់ ។
ពេលដែលបុរសរងគ្រោះដើរទៅដល់ក្បែរកន្លែងស្នាក់នៅនោះ ក៏ស្រាប់តែដួលទៅលើដី ហើយក្រុមកម្មករជាបុគ្គលិកក្រុមហ៊ុនស៊ិនទ្រី ដែលនៅក្បែរនោះបាននាំគ្នាស្ទុះរត់ទៅលើក និងធ្វើចលនាដើម្បីសង្គ្រោះដែរ តែជាអកុសលបុរសរងគ្រោះស្លាប់បាត់ទៅហើយ។
គេមិនដឹងថាបុរសរងគ្រោះមានសាច់ញាតិ ឬបងប្អូននៅទីណានោះទេ ព្រោះរាល់ថ្ងៃគេតែងឃើញជនរងគ្រោះដើររើសអេតចាយយកទៅលក់យកលុយទិញបាយហូប ក្រៅពីនោះជនរងគ្រោះតែងជួយប្រមូលសំរាមអោយគេ ហើយគេអោយលុយគាត់ពី១ពាន់រៀលទៅ២ពាន់រៀលប៉ុណ្ណោះ លុះដល់វេលាកើតហេតុទំនងជា ជនរងគ្រោះកើតខ្យល់គរ ទើបបណ្តាលអោយដួលស្លាប់គួរឱ្យអាណោចអាធ័មបែបនេះ។
ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះមកដល់កន្លែងកើតហេតុ ធ្វើការត្រួតពិនិត្យនិងកោសល្យវិច្ច័យទៅលើសពរបស់បុរសរងគ្រោះបានឃើញថា បុរសរងគ្រោះស្លាប់ដោយសារគាំង
បេះដូង (ខ្យល់គរ) ទើបបញ្ជួនសពបុរសរងគ្រោះខាងលើទៅតម្កល់ទុកនៅវត្តសន្សំកុសល ដើម្បីរង់ចាំក្រុមគ្រួសារមកទទួលយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ