ខេត្តកំពង់ឆ្នាំង ៖ ការចេះបដិសណ្ឋារកិច្ចចំពោះភ្ញៀវទេសចរណ៍ គឺជាសារៈសំខាន់ខ្លាំងណាស់ ដើម្បីឲ្យភ្ញៀវទេសចរណ៍ពេញចិត្ត និងចូលចិត្តមកតំបន់ ឬខេត្តរបស់យើង ។ នេះជាប្រសាសន៍របស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍នៅក្នុងកិច្ចប្រជុំត្រួតពិនិត្យផែនការរៀបបុណ្យទន្លេក្នុងក្រុងកំពង់ឆ្នាំង ក្នុងពេលដ៏ខ្លីខាងមុខនេះ ។
កិច្ចប្រជុំនេះបានធ្វើឡើងនៅព្រឹកថ្ងៃទី២៧ ខែតុលា ឆ្នាំ២០១៨ នៅក្នុងសាលាខេត្តកំពង់ឆ្នាំង ។ ឯកឧត្តមបានបន្តថា អ្នកលក់ដូរក្នុងភោជនីយដ្ឋាន អាហារដ្ឋាន ត្រូវតែឯកសណ្ឋានត្រឹមត្រូវ និងមានសេវាកម្មល្អក្នុងការបម្រើភ្ញៀវ ដោយត្រូវមានអាហាឆ្ងាញ់ មានអនាម័យល្អ បរិស្ថានល្អ ដើម្បីទទួលភ្ញៀវដែលមកលេងកម្សាន្តក្នុងពិធីបុណ្យទន្លេរយៈពេល៣ថ្ងៃដែលនឹងប្រព្រឹត្តទៅនៅថ្ងៃទី១៨ ដល់ថ្ងៃទី២០ ខែមីនា ឆ្នាំ២០១៩ខាងមុខនេះ ។ ជាបទពិសោធន៍ក្នុងការធ្វើបុណ្យទន្លេកន្លងមកតាមបណ្តាខេត្តមួយចំនួននៅម៉ោង៩យប់ភ្ញៀវមកលេងបុណ្យទន្លេរកបាយម្ហូបអត់មាន ។
ឯកឧត្តមបានសំណូមពរដល់អាជ្ញាខេត្តត្រូវបង្រៀនដល់ក្រុមអាជីវករអ្នកលក់ដូរទាំងអស់ត្រូវចេះបដិសណ្ឋារកិច្ចចំពោះភ្ញៀវទេសចរណ៍ និងណែនាំដល់ម្ចាស់ផ្ទះសំណាក់ សណ្ឋាគារ សូមកុំតម្លើងថ្លៃ ចំណែកតាមផ្ទះប្រជាពលរដ្ឋនៅក្នុងក្រុងសូមរៀបចំឲ្យបានស្អាតបាតមានរបៀបរៀបរយ មានភ្លើងអគ្គិសនី មានបន្ទប់ទឹកស្អាត មានអនាម័យល្អ ដើម្បីទទួលភ្ញៀវដែលមកស្នាក់នៅលេងកម្សាន្តនៅក្នុងពិធីបុណ្យ គឺមានន័យថា បើផ្ទះសំណាក់ ឬសណ្ឋាគារពេញហើយនោះភ្ញៀវ និងមកជួលផ្ទះប្រជាពលរដ្ឋយើងស្នាក់នៅជាមិនខាន ចំណែកម៉ូតូឌុប រ៉ឺម៉កម៉ូតូត្រូវមានអាវកាក់ និងមានការគ្រប់គ្រងឲ្យបានល្អ ។
នៅក្នុងកិច្ចប្រជុំនេះដែរឯកឧត្តមឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំងក៏បានលើកឡើងថា គម្រោងនៃការធ្វើបុណ្យទន្លេក្រោមប្រធានបទ«ទន្លេនៃជីវិត សុភមង្គល និងកំណើនទេសចរណ៍» ដោយអាជ្ញាធរខេត្តបានរៀបចំបង្កើតគណកម្មការលេខាធិការដ្ឋាន និងអនុគណៈកម្មការសរុបចំនួន១៧អនុគណៈកម្មការ ដើម្បីបែងចែកភារកិច្ចទទួលខុសរៀងៗខ្លួន ទៅតាមមុខជំនាញ ដើម្បីឲ្យដំណើរការធ្វើបុណ្យទន្លេទទួលបានជោគជ័យ។ នៅក្នុងកម្មវិធីធ្វើបុណ្យទន្លេដែលនឹងមានវត្តមានសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងពេលខាងមុខនេះអាជ្ញាធរខេត្តបានគ្រោងរៀបចំតុបតែងខ្លោងទ្វារ រូបភាពធំៗចំនួន១៧ក្លោងទ្វា តូចៗចំនួន២២ នៅក្នុងទីក្រុង និងនៅតាមផ្លូវជាតិ ។
ក្នុងកម្មវិធី៣ថ្ងៃ នៃបុណ្យទន្លេនេះដែរក៏មានកម្មវិធីនានាជាច្រើនដូចជា រត់ប្រណាំង,ការដាំដើមឈើអនុស្សាវរីយ៍ , ការប្រណាំងទូក២២គូ , ការតាំងពិពណ៌ទេសចរណ៍ ផលិតផលខ្មែរ , ការប្រកួតកីឡាអុកចត្រង្គ , ប្រដាល់គុនខ្មែរ ថៃ , ចំបាប់បុរាណ និងក្បាច់គុនល្បុកតោ , កីឡាហែលទឹកឆ្លងទន្លេ, ការប្រកួតកីឡាបាល់ទាត់ បាល់ទះមិត្តភាព , ការប្រកួតកីឡាប្រណាំង , ជិះកង់កម្សាន្ត១២គីឡូម៉ែត្រ,កម្មវិធីសិល្ប៍ ប្រគុំតន្ត្រី , មហោស្រពម្ហូបអាហារ និងភេសជ្ជៈ មានការតាំងលក់ដូរនូវផលិតផលផ្សេងៗ២៤០ស្តង់, និងកាបាញ់កាំជ្រូចអបអរសាទរកម្មវិធីបើកជាផ្លូវការ បុណ្យទន្លេលើកទី៥ផងដែរ ៕
ចែករំលែកព័តមាននេះ