រាជធានីភ្នំពេញ ៖ សេចក្តីរាយការណ៍បឋមឱ្យដឹងថា ហាងលក់គ្រឿងតុបតែងរថយន្តយីហោ «ស៊ាងហាក់» តូបB24 ត្រូវបានភ្លើងឆេះបង្កការភ្ញាក់ផ្អើលដល់សមត្ថកិច្ច និងរថយន្តពន្លត់ចុះមកអន្តរាគមន៍ កាលពីវេលាម៉ោង១០ និង៣៥នាទីយប់ថ្ងៃទី២៦…
រាជធានីភ្នំពេញ ៖ សេចក្តីរាយការណ៍បឋមឱ្យដឹងថា ហាងលក់គ្រឿងតុបតែងរថយន្តយីហោ «ស៊ាងហាក់» តូបB24 ត្រូវបានភ្លើងឆេះបង្កការភ្ញាក់ផ្អើលដល់សមត្ថកិច្ច និងរថយន្តពន្លត់ចុះមកអន្តរាគមន៍ កាលពីវេលាម៉ោង១០ និង៣៥នាទីយប់ថ្ងៃទី២៦ តុលា ស្ថិតនៅក្បែរអង់តែនទួលគោក ក្នុងសង្កាត់បឹងកក់ទី១ ខណ្ឌទួលគោក។
សេចក្តីរាយការណ៍បន្តថា នៅមុនពេលកើតហេតុ គេបានធំក្លិនឈ្ងៀម និងឃើញផ្សែងចេញមកពីខាងក្នុងហាង ដែលម្ចាស់បានបិទទ្វារចាក់សោពីខាងក្រៅ ក៏ផ្អើលដល់ប្រជាពលរដ្ឋដែលរស់នៅក្បែរខាងនាំគ្នាចោមរោមមើល ស្រាប់តែកាន់តែភ័យទៀត ព្រោះមានអណ្ដាតភ្លើងឆេះចេញមកពីក្នុងតែម្តង ។
ភ្លាមៗនោះ ពលរដ្ឋក៏បាននាំគ្នាវាយបំបែកសោ និងគាស់ទ្វារហាងនាំគ្នាយកបំពង់ពន្លត់អគ្គិភ័យទៅបាញ់ពន្លត់អស់៨ ទៅ៩បំពង់ តែមិនអាចគ្រប់គ្រងអណ្តាតភ្លើងដែលកំពុងឆេះ ក៏បានរាយការណ៍ជូនសមត្ថកិច្ចមូលដ្ឋាននិងរថយន្តពន្លត់អគ្គីភ័យអោយចុះមកជួយអន្តរាគមន៍ ។ ក្រោយមក ឃើញមានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញមកចំនួន១៦គ្រឿង រួចក៏បានធ្វើការបាញ់ទឹកពន្លត់អស់ចំនួន
៧គ្រឿង ទើបរលត់ទៅវិញជាស្ថាពរ ។
បើតាមពលរដ្ឋថា ករណីខាងលើ មិនបណ្តាលឱ្យឆេះរាលដាលដល់តូបដែលនៅក្បែរខាងនោះទេ គឺគ្រាន់តែឆេះខូចខាតសម្ភារៈសម្រាប់លក់នៅក្នុងហាងខាងលើអស់ប្រមាណ៤០ភាគរយ ក្នុងនោះមានដូចជា ធុងបាស់ អំពូលភ្លើងរថយន្ត កម្រាលពូករថយន្ត និងសម្ភារមួយចំនួនទៀត។ ក្នុងហេតុការណ៍នោះកម្លាំងជំនាញពន្លត់អគ្គីភ័យម្នាក់ បានរងរបួសរយៈជើង ខណៈដែលកំពុងប្រតិបត្តិការណ៍បាញ់ពន្លត់ករណីខាងលើ ។
ចែករំលែកព័តមាននេះ