ADផ្ទាំងផ្សព្វផ្សាយពាណិជ្ជកម្ម

អង្គុយលេងភ្លេចមើលម៉ូតូ ទាល់តែសមត្ថកិច្ចចាប់ចោរបានទើបភ្ញាក់

5 ឆ្នាំ មុន

ភ្នំពេញ
២៦ ខែ តុលា ឆ្នាំ ២០១៨ ម៉ោង ១៩:៣៣

រាជធានីភ្នំពេញ ៖ បុរសជនសង្ស័យជាចោរលួចម៉ូតូចំនួន ២នាក់ ត្រូវបានកម្លាំងនៃអធិការដ្ឋាន ខណ្ឌដូនពេញ ចាប់ឃាត់ខ្លួន ខណៈពេលដែលពួកគេបានជិះម៉ូតូមួយគ្រឿងនាំគ្នាទៅធ្វើសកម្មភាព លួចម៉ូតូម៉ាក CLICK មួយគ្រឿង ដែលម្ចាស់ដាក់ចតទុកចោលលើផ្លូវម្ខាង ហើយនាំគ្នាទៅអង្គុយលេង នៅមាត់ទន្លេដោយមិនដឹងខ្លួន ទាល់តែសម្ថកិច្ចចាប់បានទើបដឹងថា លោកចោរប្រុងលួចម៉ូតូរបស់ខ្លួន។ ករណីនេះបានកើតឡើងកាលពីវេលាម៉ោង៣ និង៤៥នាទីល្ងាច ថ្ងៃទី២៦ ខែតុលា ឆ្នាំ២០១៨ នៅចំណុចមាត់ទន្លេខាងព្រះបរមរាជមុខវាំង ផ្លូវព្រះស៊ីសុវត្ថិ ក្នុងសង្កាត់ជ័យជំនះ ខណ្ឌដូនពេញ។

តាមប្រភពព័ត៌មានពីសម្ថកិច្ចបានប្រាប់ឱ្យដឹងថា បុរសជាជនសង្ស័យទាំង២នាក់ ដែលបានឃាត់ខ្លួន មានទី១-ឈ្មោះ ហាយ សុវណ្ណរ៉ា អាយុ២៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ៥៩Eo ផ្លូវលេខ ៦៣ ក្នុងសង្កាត់ចតុមុខ ខណ្ឌដូនពេញ ទី២-ឈ្មោះ ផល សុវណ្ណវិចិត្រ អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំផ្សារន្ទះបាញ់ ក្នុងសង្កាត់ទន្លេបាសាក់ ខណ្ឌចម្ការមន។ មុនពេលកើតហេតុ មានយុវជនចំនួន៣នាក់ បានជិះម៉ូតូចំនួន២គ្រឿងក្នុងនោះមានម៉ាក CLICK ពណ៌ខ្មៅ ពាក់ស្លាកលេខ បាត់ដំបង ១AB-០២៩៤ មួយគ្រឿង និងម៉ាកស្គូពី ពណ៌ក្រហម មួយគ្រឿងទៀត ចតទុកនៅលើចិញ្ចើមផ្លូវម្ខាងនៅខាងមុខវាំង រួចហើយនាំគ្នាទៅអង្គុយលេង លើខឿនថ្មមាត់ទន្លេ។

តាមប្រភពដដែលបានប្រាប់ បន្តទៀតថា ពេលនោះក៏ស្រាប់តែលេចមុខ ក្រុមជនសង្ស័យទាំង២នាក់ ជិះម៉ូតូម៉ាក ហុងដាសេ១២៥ ពណ៌ខ្មៅ ពាក់ស្លាកលេខ កំពង់ចាម ១K-៩១៨៩ មួយគ្រឿងឌុបគ្នាទៅឈប់ក្បែរម៉ូតូទាំង២គ្រឿង ដែលនៅចតទន្ទឹមគ្នានោះ។ ដោយម្ចាស់រវល់តែ អង្គុយមើលទៅទឹកទន្លេខាងមុខមិនបានមើលក្រោយនោះ ក៏ស្រាប់តែជនសង្ស័យម្នាក់ ក្នុងចំណោម បក្ខពួកទាំង២នាក់ បានចុះពីម៉ូតូទៅធ្វើសកម្មភាពឆ្កឹះសោ ក្នុងបំណងលួចយកម៉ូតូម៉ាក CLICK។

ស្របពេលនោះកម្លាំងល្បាតរបស់អធិការដ្ឋានខណ្ឌ ដូនពេញក៏បានប្រទះឃើញ និងចាប់ឃាត់ខ្លួនបានទាំងពីរនាក់តែម្តង ទាំងម្ចាស់មិនបានដឹងថាកើតមានរឿងអ្វីឡើយនោះ។ ក្រោយពេលកើតហេតុ ម៉ូតូម៉ាក CLICK មួយគ្រឿងនោះត្រូវបានធ្វើការប្រគល់ទៅឲ្យយុវជនជាម្ចាស់វិញ ចំណែកឯបុរសជាជនសង្ស័យទាំង ២នាក់ក៏បាននាំខ្លួនមកកាន់អធិការដ្ឋាននគរបាលខណ្ឌដូនពេញ ដើម្បីកសាងសំណុំរឿង ចាត់ការទៅតាមនីតិវិធីច្បាប់ជាបន្តទៅទៀត៕