ហ៊ឺ… មកបោកគាត់ជាក្រមុំចាស់ អស់ទាំងទ្រព្យ បង់ទាំងប្រាណ
- កំពង់ឆ្នាំង
ខេត្តកំពង់ឆ្នាំង ៖ ពាក្យចាស់លោកពោលថា ៖ «ឈើកោងវល្លិព័ទ្ធ មនុស្សខ្ចាត់ព្រាត់កុំយកខ្លួនបៀត» ។ យ៉ាងណាមិញ ស្ត្រីម្នាក់រស់នៅភូមិជើងខ្នារ ឃុំពន្លៃ…
ខេត្តកំពង់ឆ្នាំង ៖ ពាក្យចាស់លោកពោលថា ៖ «ឈើកោងវល្លិព័ទ្ធ មនុស្សខ្ចាត់ព្រាត់កុំយកខ្លួនបៀត» ។ យ៉ាងណាមិញ ស្ត្រីម្នាក់រស់នៅភូមិជើងខ្នារ ឃុំពន្លៃ ស្រុកបរិបូណ៌ បានចាញ់បោកបុរសពនេចរម្នាក់ដែលមកស្នាក់នៅក្នុងភូមិ ហើយល្បួងសុំក្តីស្នេហ៍ពីនាងដោយឱ្យអ្នកជិតខាងចូលចែចូវ ។ ទីបំផុត ក៏ឈានដល់ការសែនព្រេនយកគ្នាជាប្តីប្រពន្ធ ប៉ុន្តែបានតែ៣ខែ ក៏បោកយកម៉ូតូពីនាងអស់១គ្រឿង និងចិញ្ចៀន
មាស១វង់ រួចគេចខ្លួនបាត់តែម្តង ។
ក្នុងពាក្យបណ្តឹង នារីរងគ្រោះ ឈ្មោះ យស់ណឹប អាយុ៤០ឆ្នាំ ដែលបានប្តឹងទៅលោកមេឃុំពន្លៃ រៀបរាប់ថា កាលពីជាង៣ខែមុន មានបុរសម្នាក់ឈ្មោះ រិទ្ធ បានមកស្នាក់នៅផ្ទះ ពូសុត មីងអុន ដែលនៅភូមិឃុំជាមួយគ្នា ។ ក្រោយមក ឈ្មោះរិទ្ធ អាយុ៤៣ឆ្នាំ បានសុំស្រឡាញ់នាង ដោយឲ្យចាស់ទុំចូលចែចូវ និងប្រាប់ថា រូបគេគ្មានប្រពន្ធកូនទេ និងមានផ្ទះសម្បែងនៅខេត្តកណ្តាល ។ កាលណោះនាងក៏យល់ព្រម ហើយបានរៀបចំសែនព្រេនយកគ្នាជាប្តីប្រពន្ធ ។ ការរស់នៅជាមួយគ្នាបានរយៈពេល៣ខែ ធ្វើឲ្យមានទំនុកចិត្ត ។ ប៉ុន្តែអ្វីៗមិនដូចការគិតរបស់នាងឡើយ គឺបុរសឈ្មោះ រិទ្ធ បានបោកយកខ្លួនប្រាណនាងហើយ យកទាំងទ្រព្យសម្បត្តិរបស់នាងទៀត ។
ក្នុងពាក្យបណ្តឹងរបស់នារីរងគ្រោះបញ្ជាក់ថា កាលពីថ្ងៃទី៦ ខែតុលា បុរសឈ្មោះ រិទ្ធបានសុំខ្ចីម៉ូតូនាងថាទៅលេងផ្ទះបងប្អូននៅខេត្តពោធិ៍សាត់ ហើយដោយសារទុកចិត្តនាងបានឱ្យម៉ូតូខ្ចី និងឱ្យចិញ្ចៀនមាសទម្ងន់៣ជីពាក់ទៀតផង ។ ប្រភពដដែលបន្តថា ចាប់តាំងពីចាកចេញទៅ បុរសឈ្មោះ រិទ្ធ ឬហៅថាប្តីហេងស៊យរបស់នាងមិនបានត្រឡប់មកវិញឡើយ ហើយថែមទាំងបិទទូរស័ព្ទហៅមិនចូលទៀត ។
ដោយសារតែបែបនេះហើយ ទើបនាងដឹងច្បាស់ថា បុរសឈ្មោះ រិទ្ធ ពិតជាបោកយកខ្លួនប្រាណនាងហើយ យកទាំងទ្រពសម្បត្តិនាងទៀត ។ ហេតុនេះហើយ នាងសុំប្តឹងទៅលោកមេឃុំ និងសមត្ថកិច្ចគ្រប់ជាន់ថ្នាក់ សូមចាប់បុរសឈ្មោះ រិទ្ធ នេះយកមកផ្តន្ទាទោសទៅតាមច្បាប់ ៕
ចែករំលែកព័តមាននេះ