សហរដ្ឋអាមេរិក ៖ ទោះបីមានការហេវហត់ខ្លាំងក៏ដោយ ពួកអន្តោប្រវេសន៍ ហុងឌូរ៉ាស់នាថ្ងៃទី២៥ តុលា បន្តការធ្វើដំណើររបស់ពួកគេកាត់ប្រទេសម៉ិកស៊ិក សំដៅទៅសហរដ្ឋអាមេរិកដែលប្រកាសត្រៀមដាក់ពង្រាយទាហាន៨០០នាក់ទៀត នៅតាមព្រំដែន ដើម្បីបញ្ឈប់ដំណើររបស់ពួកគេ។
ពួកអន្តោប្រវេសន៍ហុងឌូរ៉ាស់ជាច្រើនពាន់នាក់ ដែលភៀសខ្លួនចេញពីអំពើហិង្សា និងភាពក្រីក្រក្នុងប្រទេសពួកគេ ចាប់ពីព្រឹកព្រលឹមបាននាំគ្នាចាកចេញពីក្រុង MAPASTEPEC ឆ្ពោះទៅកាន់ PIJIJIAPAN ក្នុងរដ្ឋ CHIAPAS ភាគខាងត្បូងម៉ិកស៊ិក ហើយពួកគេទៅដល់គោលដៅនាវេលារសៀល ក្រោយការដើររយៈពេលដល់ទៅ៧ម៉ោង។ ពួកអន្តោប្រវេសន៍ទាំងនោះត្រូវដើរក្នុងចម្ងាយផ្លូវជាង៣០០០គីឡូម៉ែត្រទៀត ទើបទៅដល់ព្រំដែនសហរដ្ឋអាមេរិក។ បើតាមការវាយតម្លៃ គឺពួកគេត្រូវដើរប្រមាណជា១ខែកន្លះទៀត ទើបទៅដល់គោលដៅ។
អង្គការសហប្រជាជាតិបាននិយាយថា មនុស្សប្រមាណជា៧០០០នាក់បានលើកគ្នាចាកចេញពីហុងឌូរ៉ាស់ ពីថ្ងៃទី១៣ តុលាមក។ ពួកគេធ្វើដំណើររួមជាមួយគ្នាដោយគិតដល់បញ្ហាសន្តិសុខតាមផ្លូវ ដែលពួកគេគិតថាមានគ្រោះថ្នាក់។
អ្នកទទួលខុសត្រូវអាមេរិក២រូប បានគូសបញ្ជាក់កាលពីថ្ងៃទី២៥ តុលាថា មន្ទីរប៉ង់តាហ្គោន ត្រូវដាក់ពង្រាយទាហាន៨០០នាក់ទៀតនៅតាមព្រំដែន ជាមួយម៉ិកស៊ិក ដើម្បីជួយទ្រទ្រង់ខាងភស្ដុភារ។ កងទាហានទាំងនេះដែលអាចបញ្ជូនទៅពីមូលដ្ឋានយោធាជាច្រើនរបស់ប្រទេស នឹងជួយពង្រឹងកម្លាំងកងឆ្មាំព្រំដែនជាង២០០០នាក់ដែលមានវត្តមានរួចហើយនៅទីនោះចាប់តាំងពីរដូវផ្ការីកមក៕
ចែករំលែកព័តមាននេះ