រាជធានីភ្នំពេញ ៖ នគរបាលប៉ុស្តិ៍ច្បារអំពៅទី២ បានឃាត់ខ្លួនស្ត្រីម្នាក់នៅចំណុចតូបលក់គ្រឿងអលង្ការមួយក្នុងផ្សារច្បារអំពៅសង្កាត់ច្បារអំពៅទី២ ខណ្ឌច្បារអំពៅ កាលពីវេលាម៉ោង២ និង៣០នាទីរសៀលថ្ងៃទី២២ ខែតុលាកន្លងទៅ ពាក់ព័ន្ធនឹងការបន្លំយកគ្រឿងអលង្ការ ។
ស្ត្រីរូបនេះ ឈ្មោះ ម៉ាន រីយ៉ាន អាយុ៣៨ឆ្នាំ ជាខ្មែរអ៊ិស្លាម មុខរបរមិនពិតប្រាកដ ស្នាក់នៅផ្ទះលេខ២៦A ផ្លូវជាតិលេខ៥ សង្កាត់ព្រែកព្នៅ ខណ្ឌព្រែកព្នៅ ។ ចំណែកជនរងគ្រេាះឈ្មោះ ឡុង នីឡេង ភេទស្រី អាយុ៣១ឆ្នាំ មុខរបរលក់គ្រឿងអលង្ការ ។ តាមជនរងគ្រេាះឲ្យដឹងថា នាវេលារសៀលថ្ងៃទី២០ ខែតុលា ស្ត្រីរូបនេះបានចូលមកទិញគ្រឿងអលង្ការនៅហាងរបស់គាត់ ដោយឲ្យគាត់យកខ្សែកមាសម៉ូដច្រវាក់ឆាប១ខ្សែទម្ងន់១តម្លឹងមកមើល ។ នៅពេលមើលនេាះ ជនសង្ស័យបានយកខ្សែកមាសមកពាក់ក លុះគាត់ភ្លេចខ្លួនក៏បន្លំដោះខ្សែកកាឡៃដែលពាក់ជាប់កស្រាប់ឲ្យទៅគាត់ទុកវិញ រួចសុំមើលខ្សែកម៉ូដផ្សេងទៀត ។
ខណៈនេាះគាត់ប្រាប់ថា ចាំមួយភ្លែត ស្រាប់តែជនសង្ស័យឆ្លៀតឱកាសដើរចេញទៅក្រៅគេចខ្លួនបាត់ស្រមោលសូន្យតែម្តង ។ ភ្លាមៗ គាត់ហាក់មានការសង្ស័យក៏យកខ្សែកនោះមកពិនិត្យមើលម្តងទៀត ទើបដឹងថាជាខ្សែកកាឡៃក៏នាំគ្រួសារទៅប៉ុស្តិ៍នគរបាលមូលដ្ឋានដើម្បីដាក់ពាក្យបណ្តឹង ។ នៅរសៀលថ្ងៃដដែលនោះ កម្លាំងនគរបាលមូលដ្ឋានបានទៅពិនិត្យកាមេរ៉ាសុវត្ថិភាពនៅផ្ទះកើតហេតុ ដើម្បីកំណត់ភិនភាគជនសង្ស័យងាយស្រួលតាមចាប់ខ្លួនយកមកផ្តន្ទាទោស ។
នាយប៉ុស្តិ៍នគរបាលច្បារអំពៅទី២ លោក ទេព បូរ៉ា ឲ្យដឹងថា នារសៀលថ្ងៃទី២២ ខែតុលា កម្លាំងនគរបាលប៉ុស្តិ៍បានដើរល្បាតក្នុងផ្សារ ពិសេសចំណុចទូលក់គ្រឿងអលង្ការ ដើម្បីការពារសន្តិសុខសុវត្ថិភាពជូនអាជីវករក្រែងកើតមានអំពើប្លន់ជាដើម ។ ខណៈកំពុងល្បាតនោះ ក៏ប្រទះឃើញស្ត្រីជាជនសង្ស័យដែលបានលួចបន្លំគ្រឿងអលង្ការកាលពីថ្ងៃទី២០ ខែតុលា កន្លងទៅ ទើបសម្រេចឃាត់ខ្លួនភ្លាមៗតែម្តង ខណៈស្ត្រីរូបនេះចូលមកប៉ុនប៉ងលួចបន្លំគ្រឿងអលង្ការអាជីវករផ្សារច្បារអំពៅជាលើកទី២ទៀត ។
តាមចម្លើយសារភាពចំពេាះមុខសមត្ថកិច្ចស្ត្រីខាងលើនិយាយថា មូលហេតុដែលលួចបន្លំគ្រឿងអលង្ការគេនេះ គឺដោយសារខ្លួនជំពាក់បំណុលគេច្រើនពេក ។ ចំពេាះខ្សែកមាស ប្រភេទច្រវាក់ឆាបដែលលួចបន្លំបាននោះ គឺខ្លួនយកទៅលក់នៅផ្សារទួលសង្កែបាន១.៤៣០ដុល្លារ ហើយលុយទាំងអស់នោះខ្លួនបានយកសងគេអស់ហើយ ។
សូមបញ្ជាក់ថា ក្នុងការឃាត់ខ្លួនជនសង្ស័យខាងលើនេះ សមត្ថកិច្ចដកហូតបាន ខ្សែកកាឡៃ១៧ខ្សែ ខ្សែដៃកាឡែ១ខ្សែ ចិញ្ចៀនកាឡៃ៨វង់ ក្រវិលកាឡៃមានដាំត្បូងពណ៌ស២គូ បន្តោងខ្សែកកាឡៃមានដាំត្បូងពណ៌ស១ ទូរស័ព្ទដៃ២គ្រឿង(ម៉ាកiPhone៦ ពណ៌ទឹកមាស និងម៉ាក iPhone៥ ពណ៌ផ្កាឈូក) លុយ២ដុល្លារនិង៦.០០០រៀល កាបូបក្រវាត់ចង្កេះ១ និងថង់ប្លាស្ទិក១ ។ ជនសង្ស័យនិងវត្ថុតាង ត្រូវបានបញ្ជូនទៅកាន់អធិការដ្ឋាននគរបាលខណ្ឌច្បារអំពៅ ដើម្បីកសាងសំណំុរឿងចាត់ការតាមនីតិវិធី ៕
ចែករំលែកព័តមាននេះ