ខេត្តព្រះវិហារ ៖ ក្រោយពីមានការសង្គ្រោះបន្ទាន់ពីក្រុមគ្រូពេទ្យនៃមន្ទីរពេទ្យបង្អែក១៦មករា ក្រុងព្រះវិហារ រយៈពេល៣ថ្ងៃមកនេះបុរសម្នាក់ឈ្មោះ ស្រី យ៉ា រស់នៅភូមិរំចេក ឃុំស្រយ៉ង់ ស្រុកគូលែន…
ខេត្តព្រះវិហារ ៖ ក្រោយពីមានការសង្គ្រោះបន្ទាន់ពីក្រុមគ្រូពេទ្យនៃមន្ទីរពេទ្យបង្អែក១៦មករា ក្រុងព្រះវិហារ រយៈពេល៣ថ្ងៃមកនេះបុរសម្នាក់ឈ្មោះ ស្រី យ៉ា រស់នៅភូមិរំចេក ឃុំស្រយ៉ង់ ស្រុកគូលែន ខេត្តព្រះវិហារ មានអាការៈធូរស្រាលឡើងវិញហើយ បន្ទាប់ពីបុរសរូបនេះមានអាការៈពុលផ្សិត កាលពីថ្ងៃទី២៣ ខែតុលា ឆ្នាំ២០១៨ កន្លងទៅ ។
ថ្លែងប្រាប់អ្នកសារព័ត៌មានលោកវេជ្ជបណ្ឌិតសុក វាសនា ប្រធានមន្ទីរពេទ្យបង្អែក១៦មករា ក្រុងព្រះវិហារបានឲ្យដឹងថា ជនរងគ្រោះដោយសារការបរិភោគផ្សិត ហើយពុលនោះពេលនេះមានអាការៈធូរស្រាលហើយ ប៉ុន្តែអ្នកជំងឺត្រូវបន្តសម្រាកព្យាបាលនៅមន្ទីរពេទ្យបន្តទៀតសិន រង់ចាំជាសះស្បើយទើបអាចឲ្យត្រឡប់ទៅផ្ទះវិញបាន។
ជាមួយគ្នានេះដែរ លោកវេជ្ជបណ្ឌិតក៏បានអំពាវនាវដល់ប្រជាពលរដ្ឋទាំងអស់នៅទូទាំងខេត្តព្រះវិហារចំពោះករណីដែលបរិភោគអាហារ ហើយមានអាការៈពុលផ្សេងៗនោះត្រូវប្រញ៉ាប់នាំអ្នកជំងឺនោះមកកាន់មន្ទីរពេទ្យ ឬមណ្ឌលសុខភាពជាបន្ទាន់ ដើម្បីធ្វើការសង្គ្រោះឲ្យទាន់ពេលវេលា ព្រោះបច្ចុប្បន្នមន្ទីរពេទ្យមានវេជ្ជបណ្ឌិតជំនាញៗឧបករណ៍ទំនើបៗ និងថ្នាំព្យាបាលគ្រប់គ្រាន់ សម្រាប់ជួយដល់ប្រជាពលរដ្ឋ។
សូមបញ្ជាក់ថា ករណីនេះកើតឡើង កាលពីថ្ងៃទី២៣ ខែតុលា ឆ្នាំ២០១៨កន្លងទៅថ្មីៗនេះ មុនពេលកើតហេតុឈ្មោះ ស្រី យ៉ា បានដើរទៅក្នុងព្រៃដកផ្សិតយកមកឲ្យម្តាយស្លកកូរបរិភោគជុំគ្នាជាមួយគ្រួសារ តែបន្ទាប់ពីបរិភោគបាន១ម៉ោងក្រោយមកឈ្មោះស្រី លួន ត្រូវជាឪពុក និងឈ្មោះស្រី យ៉ា ខាងលើនេះចាប់មានអាការៈពុលខ្លាំងដោយហៀរទឹកមាត់ ក្អួតចង្អោរ រាគជាដើម ។
ក្រោយឃើញអាការៈបែបនេះក្រុមគ្រួសារក៏បានបញ្ជូនជនរងគ្រោះទាំងពីរនាក់ទៅកាន់មន្ទីរពេទ្យបង្អែក១៦មករា ក្រុងព្រះវិហារ តែជាអកុសលបុរសជាឪពុកត្រូវបានស្លាប់ទៅហើយ ដោយឡែកឈ្មោះ ស្រី យ៉ា ត្រូវបានសង្គ្រោះទាន់ពេលវេលា ៕
ចែករំលែកព័តមាននេះ