រាជធានីភ្នំពេញ ៖ នៅរសៀលថ្ងៃសៅរ៍ ទី២៧ តុលា ស្អែកនេះ សង្វៀនអន្តរជាតិរបស់ទូរទស្សន៍អាស៊ីអាគ្នេយ៍នឹងបើកឱ្យកីឡាករកម្ពុជា និងថៃប៉ះគ្នាជាលក្ខណៈមិត្តភាពទៀត ហើយដោយសមាសភាពរបស់កីឡាករម្ខាងៗគឺសុទ្ធតែជាជើងខ្លាំង និងល្អៗ អមដោយជំនឿចិត្តខ្ពស់ផងក្នុងការយកឈ្នះ។
ការប្រកួតដែលនឹងចាប់ផ្ដើមឡើងនៅម៉ោង២រសៀលនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារប៉ុស្តិ៍អាស៊ីអាគ្នេយ៍មានអ្នកទស្សនាច្រើនកកកុញស្រាប់ព្រោះតែស្ថានភាពទីតាំងស្របគ្នាការប្រកួតត្រូវចំរសៀលសៅរ៍រមែងមានអ្នកទស្សនាកកកុញជាប្រចាំ ។
កីឡាករកម្ពុជា២រូបដែលត្រូវគេស្គាល់ថាជាជើងខ្លាំងក្នុងការប្រកួតជាមួយកីឡាករក្នុងស្រុក គឺឃីម បូរ៉ា ដែលល្បីខាងប្រើកណ្ដាប់ដៃអមដោយបច្ចេកទេសខ្ពស់ក្នុងការផ្ដួលគូប្រកួត និងកីឡាករជំនាញប្រើកែង សុខ សាវិននឹងក្លាយជាគូប្រកួតស៊ីសាច់ហុតឈាមជាមួយកីឡាករបរទេស២រូបនៅលើសង្វៀនអន្តរជាតិនារសៀលនោះ ដោយពួកគេម្នាក់ៗនឹងឡើងប្រកួតប៉ះគ្នាជាលក្ខណៈមិត្តភាព ។ អ្នករៀបចំការប្រកួតបានអះអាងថា កីឡាករទាំង៤រូបគ្រាន់តែដឹងថាត្រូវប៉ះគ្នា គឺទាំងកីឡាករកម្ពុជា និងបរទេសសុទ្ធតែបានត្រៀមខ្លួនរួចរាល់ ជាពិសេសកីឡាករកម្ពុជាតែម្ដងទើបឈានដល់ការផ្គូផ្គងឱ្យឡើងប្រកួតជាមួយកីឡាករបរទេសដើម្បីសាកល្បងសមត្ថភាពគ្នា។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា២រូបដែលមានឈ្មោះឡើងប្រកួតមិត្តភាពអន្តរជាតិក្នុងព្រឹត្តិការណ៍ប្រដាល់នោះ កីឡាករ ឃីម បូរ៉ា គឺជាកីឡាករជើងខ្លាំងម្នាក់ដែលលោករំពឹងខ្ពស់នោះផង ដោយសារតែគេទើបផ្ដួលកីឡាករជើងខ្លាំងថៃមួយចំនួនរួចមកហើយទើបដាក់ឱ្យប្រកួត ។ បើទោះជាគេត្រូវប្រឈមនឹងកីឡាករថៃល្អសម្រាប់ការប្រកួតលើកនេះ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករកម្ពុជារូបនេះភាគច្រើន ។
គេត្រូវប៉ះប្រកួតជាមួយកីឡាករថៃឈ្មោះ Phat Thanna ក្នុងនាមជាគូរងឯកសម្រាប់ប្រដាល់អន្តរជាតិនៅរសៀលថ្ងៃសៅរ៍នេះ ដោយជំនួបរវាងពួកគេក៏ជារឿងសំខាន់ផងដែរ ខណៈដែលអ្នកណាឈ្នះ គឺក្រៅពីបានមុខមាត់ និងទឹកប្រាក់តម្លៃខ្លួនក្នុងនាមជាអ្នកឈ្នះ ក៏បានទទួលទំនុកចិត្តពីអ្នកគាំទ្រជាងមុនច្រើនដង ។ ផ្ទុយទៅវិញ បើចាញ់ការប្រកួត គឺមិនខុសពីត្រូវបាក់មុខ និងមានការរិះគន់ពីអ្នកគាំទ្រនោះទេ ។
កីឡាករ ឃីម បូរ៉ា លោកនៅតែយល់ឃើញថា នឹងធ្វើឱ្យកក្រើកសង្វៀនប្រដាល់អន្តរជាតិរបស់ទូរទស្សន៍អាស៊ីអាគ្នេយ៍មិនខាន បើទោះការប្រដាល់លើសង្វៀនអន្តរជាតិនាពេលចុងក្រោយ កីឡាកររូបនេះត្រូវគេកត់សម្គាល់ថា ជួនក៏មានលទ្ធផលល្អ ជួនក៏មិនល្អភាគច្រើន ។ លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយនឹងមិនប្រកាន់លាក់ដៃ ធ្វើឱ្យមានការិះគន់ណាមួយកើតឡើងនោះទេ ទើបលោកយល់ថា ជំនួបរវាងឃីម បូរ៉ា ជាមួយកីឡាករថៃជាដៃគូនឹងមិនធម្មតាសម្រាប់ការប្រកួតទាំងមូល ។
លោកថា កីឡាករកម្ពុជារូបនេះមានសមត្ថភាពខ្ពស់ទើបលោកយល់ថា គេអាចយកឈ្នះការប្រកួតនាថ្ងៃនោះបាន ថ្វីដ្បិតមានការប៉ាន់ស្មានថា លទ្ធផលដែលលោកដណ្ដើមបានអាចនឹងតឹងខ្លាំងក្ដី ។ កីឡាករកម្ពុជា លោកថា ធ្លាប់ប្រកួត១១១លើក ឈ្នះ៨០លើក ចាញ់២៩លើក និងស្មើ២លើក ក្នុងពេលកីឡាករថៃ ធ្លាប់ប្រកួត៦០លើក ឈ្នះ៥២លើកនិងចាញ់៨លើក។
សម្រាប់កីឡាករជើងខ្លាំង សុខ សាវិន គេក៏ត្រូវគណៈកម្មការផ្គូផ្គងឱ្យប៉ះប្រកួតជាមួយកីឡាករថៃPhet Nginthong ក្នុងនាមជាគូឯកផងដែរ ។ លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលកីឡាករកម្ពុជាក៏រាងធ្លាក់ដៃជាងមុន ។ លោកថា កីឡាករថៃជាដៃគូគេគឺជាជើងខ្លាំងម្នាក់តែគេមិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះដែរ ដោយសារតែបទពិសោធន៍នៅស្ទើរមិនទាន់ខ្លាំង ។ កីឡាករកម្ពុជា ធ្លាប់ប្រកួតផ្លូវការបាន៩៤លើក ឈ្នះ៦៩លើក ចាញ់២០លើក និងស្មើ៥លើក ខណៈដែលកីឡាករថៃ ធ្លាប់ប្រកួតបាន៨២លើក ឈ្នះ៦៥លើក និងចាញ់៨លើក៕
ចែករំលែកព័តមាននេះ