រាជធានីភ្នំពេញ ៖ មកទល់ពេលនេះ គេកត់សម្គាល់ថា កីឡាការិនីប៉េតង់៣រូបកំពុងមានឈ្មោះបោះសំឡេងក្នុងស្រទាប់មហាជនទាំងក្នុងប្រទេស និងក្រៅប្រទេសរហូតសារព័ត៌មានបរទេសប្រសិទ្ធនាមឱ្យថាជារាជិនីកីឡាប៉េតង់ទៀតផង បន្ទាប់ពីពួកគាត់ទាំង៣នាក់ដណ្ដើមបានមេដាយមាសនៅក្នុងព្រឹត្តិការណ៍ប្រកួតប៉េតង់លំដាប់ពិភពលោកនៅក្នុងប្រទេសបារាំងដែលទើបតែបញ្ចប់ទៅនាពេលថ្មីៗនេះ ។ រាជិនីកីឡាប៉េតង់កម្ពុជា ទាំង៣រូបនោះរួមមាន អ្នកស្រី កែ ឡេង អ្នកនាង អ៊ុក ស្រីមុំ និងកញ្ញា អ៊ុន ស្រីយ៉ា។
ជាមួយនឹងការជ្រាបរួចមកហើយពីជីវប្រវត្តិ និងស្នាដៃរបស់អ្នកស្រី កែ ឡេង និងអ្នកនាង អ៊ុក ស្រីមុំ ពេលនេះកោះសន្ដិភាពសូមបង្ហាញជូននូវជីវប្រវត្តិ និងស្នាដៃសរបស់កញ្ញា អ៊ុន ស្រីយ៉ា វិញម្ដង ដែលកញ្ញាក៏បានទទួលមេដាយមាសចំនួន២ក្នុងវិញ្ញាសា២ទល់នឹង២ និង៣ទល់នឹង៣ ជាមួយអ្នកស្រី កែ ឡេង និងអ៊ុក ស្រីមុំ មុននេះនៅក្នុងប្រទេសបារាំងផងដែរ។
កញ្ញា អ៊ុន ស្រីយ៉ា បានរៀបរាប់ថា កញ្ញា កើតនៅថ្ងៃទី៦ ខែកុម្ភៈ ឆ្នាំ១៩៨៥ នៅភូមិកោះរការ ឃុំព្រែកអញ្ចាញ ស្រុកមុខកំពូល ខេត្តកណ្ដាល ដោយកញ្ញា គឺជាកូនទី៣ក្នុងចំណោមបងប្អូន៤នាក់នៅក្នុងគ្រួសារដែលមានសមាជិកជាបងប្អូនបង្កើតប្រុស៣នាក់ ស្រីតែនាងម្នាក់ ។ នាងមានឪពុកឈ្មោះ អ៊ុន សំអាត អាយុ៦៥ឆ្នាំ ជាអតីតមន្ត្រីយោធា និងម្ដាយឈ្មោះ ហែម ចន្ថា អាយុ៥៤ឆ្នាំ ជាអតីតមន្ត្រីយោធាដូចគ្នា តែអ្នកទាំងពីរបានលែងលះគ្នាជាយូរឆ្នាំមកហើយ ដោយក្នុងពេលនេះទាំងឪពុក និងម្ដាយរបស់នាងសុទ្ធតែមានគ្រួសាររៀងខ្លួន។
កញ្ញាថា តាមពិតខ្លួនស្រឡាញ់ពេញចិត្ត និងចង់ក្លាយជាកីឡាការិនីផ្នែកវាយសីឯណោះទេ ប៉ុន្តែដោយសារតែមានឱកាសបានក្លាយជាកីឡាការិនីប៉េតង់ ទើបនាំឱ្យនាងប្រឹងប្រែងតែក្នុងអាជីពនេះតែម្ដង ហើយក៏កាន់តែសប្បាយចិត្តពេលការងារខាងផ្នែកកីឡាមួយនេះជំរុញឱ្យនាងទទួលបានជោគជ័យមកទល់ពេលនេះ ។ កញ្ញាថា ខ្លួនស្រឡាញ់វិស័យកីឡាខ្លាំងណាស់ ដោយក្នុងមួយថ្ងៃៗសម្ងំហ្វឹកហាត់តែលេងប៉េតង់មិនសូវគិតបាយទឹកនោះផង ទើបធ្វើឱ្យនាងលេងកាន់តែល្អក្នុងប៉ុន្មានឆ្នាំចុងក្រោយ ។ អ៊ីចឹងហើយទើបនាងទទួលបរាជ័យក្នុងការប្រឡងថ្នាក់បាក់ឌុប ដោយក្នុងពេលនេះ នាងបានត្រឹមតែសិក្សាថ្នាក់បរិញ្ញាបត្ររងផ្នែកគ្រប់គ្រងដល់ឆ្នាំទី២ហើយ។
កញ្ញា អ៊ុន ស្រីយ៉ា បានថ្លែងរៀបរាប់ឱ្យដឹងពីមូលហេតុដែលនាំឱ្យនាងក្លាយជាកីឡាការិនីផ្នែកប៉េតង់ថា គឺដោយសារតែកញ្ញាឧស្សាហ៍ចេញទៅលេងសឹករងនៅខេត្តកណ្ដាល កន្លែងដែលម្ដាយ និងឪពុកនាងធ្វើយោធា ហើយដោយសារតែនៅទីនោះ ក៏មានទីលានលេងប៊ូល ទើបនាងរមែងទៅលេងជាប្រចាំ រហូតធ្វើឱ្យមេៗបម្រើការនៅទីនោះកោតសរសើរ ។ បន្តបន្ទាប់មកនៅពេលការិយាល័យយោធាធ្វើការជ្រើសរើសក្រុមកីឡាការិនីប៉េតង់ ហើយក្នុងឆ្នាំ២០០១ នាងក៏ត្រូវបានគេដាក់បញ្ចូលដោយផ្ដល់ប្រាក់ខែឱ្យ៥ម៉ឺនរៀល ។
កញ្ញាថា ក្រោយពីបានក្លាយជាកីឡាការិនីប្រចាំទីនោះ នាងក៏ប្រឹងប្រែងហ្វឹកហាត់រាល់ថ្ងៃ ហើយទីបំផុតនាងក៏បានក្លាយជាកីឡាការិនីជម្រើសជាតិ និងត្រូវបានមេៗរបស់នាង ដាក់ឱ្យក្លាយជាមន្ត្រីយោធាក្របខ័ណ្ឌពេញសិទ្ធិ ដោយក្នុងពេលនេះ នាងគឺជាមន្ត្រីយោធាពាក់ស័កិ្ដ១ ។ នាងថា ខ្លួនស្រឡាញ់អាជីពកីឡាគ្រប់ផ្នែក តែបើឱ្យនាងជ្រើសរើសក្នុងពេលមិនទាន់ល្បីនឹងប៉េតង់ គឺនាងនឹងជ្រើសយកកីឡាវាយសីហើយ ដោយសារតែនាងជាប់ចិត្តនឹងអាជីពនោះជាង បើនិយាយពីចំណូលចិត្ត ។
នាងបានថ្លែងឱ្យដឹងពីស្នាដៃនាពេលកន្លងមកថា ក្នុងឆ្នាំ២០០៤ នាងត្រូវបានបញ្ជូនឱ្យចេញប្រកួតលើកដំបូងនៅក្នុងប្រទេសវៀតណាម ហើយជាលទ្ធផលនាងក៏ទទួលបានមេដាយប្រាក់ត្រឡប់មកវិញ នៅក្នុងវិញ្ញាសា២នាក់ទល់នឹង២នាក់។ ក្នុងឆ្នាំ២០០៥ នាងបានចេញប្រកួតនៅក្នុងប្រទេសជប៉ុនក្នុងព្រឹត្តិការណ៍ជើងឯកអាស៊ី ហើយទទួលបានមេដាយប្រាក់។
ក្នុងឆ្នាំ២០០៦ នាងចេញទៅប្រកួតនៅក្នុងប្រទេសថៃ ក្នុងព្រឹត្តិការណ៍មេគង្គហ្គេមទទួលបានមេដាយសំរឹទ្ធិ១ ប្រាក់១ ។ ក្នុងឆ្នាំ២០០៧ ទៅប្រកួតនៅប្រទេសថៃ ក្នុងព្រឹត្តិការណ៍ជើងឯកអាស៊ី ទទួលបានមេដាយសំរឹទ្ធិ ។ ក្នុងឆ្នាំ២០០៩ ទៅប្រកួតនៅប្រទេសវៀតណាម ទទួលបានមេដាយសំរឹទ្ធិ ។ ក្នុងឆ្នាំ២០១២ ទៅប្រកួតនៅប្រទេសវៀតណាម ទទួលបានមេដាយប្រាក់ ។ ក្នុងឆ្នាំ២០១៣ ទៅប្រកួតនៅប្រទេសបារាំងក្នុងព្រឹត្តិការណ៍ពិភពលោក ទទួលបានមេដាយសំរឹទ្ធិ ខណៈដែលក្នុងឆ្នាំដដែល នាងក៏ទទួលបានមេដាយប្រាក់ពីស៊ីហ្គេម ។
ក្នុងឆ្នាំ២០១៤ ទៅប្រកួតនៅប្រទេសឡាវ ទទួលបានមេដាយប្រាក់២ ក្នុងឆ្នាំ២០១៥ ទៅប្រកួតនៅឡាវដូចគ្នាក្នុងព្រឹត្តិការណ៍មួយផ្សេងទៀត ទទួលបានមេដាយមាសលើកដំបូង ក្នុងព្រឹត្តិការណ៍កីឡាអាស៊ី ។ ក្នុងឆ្នាំ២០១៦ ទទួលបានមេដាយមាស១ ប្រាក់១ និងទទួលបានមេដាយសំរឹទ្ធិ១ពីព្រឹត្តិការណ៍ពិភពលោកនៅចិន ។ ដោយឡែកក្នុងឆ្នាំ២០១៨នេះ នាងទទួលបានមេដាយសំរឹទ្ធ១ពីព្រឹត្តិការណ៍ជើងឯកអាស៊ី និងទទួលបានមេដាយមាស២ពីព្រឹត្តិការណ៍ពិភពលោកនៅក្នុងប្រទេសបារាំងដែលទើបបញ្ចប់នៅក្នុងវិញ្ញាសា២នាក់ទល់នឹង២នាក់ និង៣នាក់ទល់នឹង៣នាក់ទើបធ្វើឱ្យនាងកាន់តែលេចធ្លោនៅក្នុងពិភពកីឡា ។
នាងអះអាងថា នឹងបន្តការងារនៅក្នុងវិស័យកីឡាប៉េតង់នេះដោយមិនកំណត់ពេលនោះទេ ដោយសារតែក្រោយចូលប្រឡូក ក៏ធ្វើឱ្យនាងជាប់ចិត្ត និងមានមោទនភាពកាន់តែច្រើនក្នុងនាមជាកីឡាការិនីអាជីពម្នាក់៕
ចែករំលែកព័តមាននេះ