ទីក្រុងសេអ៊ូល ៖ អ្នកជំនាញរបស់កូរ៉េខាងត្បូងបាននិយាយកាលពីថ្ងៃពុធថា ប្រទេសខ្លួនគួរតែស្វែងរកវិធីក្នុងការបង្កើតតំបន់ឧស្សាហកម្មជាមួយនឹងកូរ៉េខាងជើងក្នុងតំបន់ដែលមានធនធានរ៉ែសំខាន់ៗច្រើនដើម្បីសម្របសម្រួលដល់ការវិនិយោគ និងការអភិវឌ្ឍពេលដែលភាគីទាំងពីរត្រៀមខ្លួនរួចក្នុងការអនុម័តគម្រោងឆ្លងដែន ។ យោងតាមស្ថាប័ន Korea Resource Corporation…
ទីក្រុងសេអ៊ូល ៖ អ្នកជំនាញរបស់កូរ៉េខាងត្បូងបាននិយាយកាលពីថ្ងៃពុធថា ប្រទេសខ្លួនគួរតែស្វែងរកវិធីក្នុងការបង្កើតតំបន់ឧស្សាហកម្មជាមួយនឹងកូរ៉េខាងជើងក្នុងតំបន់ដែលមានធនធានរ៉ែសំខាន់ៗច្រើនដើម្បីសម្របសម្រួលដល់ការវិនិយោគ និងការអភិវឌ្ឍពេលដែលភាគីទាំងពីរត្រៀមខ្លួនរួចក្នុងការអនុម័តគម្រោងឆ្លងដែន ។
យោងតាមស្ថាប័ន Korea Resource Corporation (KORES) បានឲ្យដឹងថា ប្រទេសកូរ៉េខាងជើងមានធនធានរ៉ែសរុបប្រមាណ៣,៣ទ្រីលានដុល្លារ ប៉ុន្តែពួកគេមិនមានឧបករណ៍ជីកត្រឹមត្រូវ ឬដៃគូសហការ ព្រោះតែការដាក់ទណ្ឌកម្មអន្តរជាតិ ។ យ៉ាងណាក្តី ធនធានរ៉ែរបស់កូរ៉េខាងជើងបានទទួលការចាប់អារម្មណ៍យ៉ាងខ្លាំង ខណៈដែលកិច្ចប្រជុំអន្តរកូរ៉េបានបង្កើនក្តីសង្ឃឹមលើគម្រោងជីករ៉ែ ។
លោក Lee In-woo ប្រធានក្រុមអភិវឌ្ឍន៍ធនធានធម្មជាតិអន្តរកូរ៉េនៅ KORES បាននិយាយថា កូរ៉េខាងត្បូងមានតម្រូវការធនធានរ៉ែរបស់កូរ៉េខាងជើងដល់ទៅប្រមាណ៨,៨លានដុល្លារជារៀងរាល់ឆ្នាំ ។ ប្រទេសកូរ៉េខាងត្បូងមានចំណេះដឹងខ្ពស់ក្នុងផ្នែកផលិតមេម៉ូរី ឈីប អេក្រង់ និងថ្ម ហើយនាំចូលធនធានពីបរទេស ។
លោក Lee បានផ្តល់យោបល់ឲ្យមានការបង្កើតតំបន់ឧស្សាហកម្មពិសេសក្នុងតំបន់ដែលមានធនធានរ៉ែច្រើនដើម្បីទាក់ទាញការវិនិយោគនិងសម្របសម្រូលដល់ការអភិវឌ្ឍ និងដំណើរការ ។
លោកបានបន្តថា ភាគីទាំងសងខាងគួរតែមានការសិក្សាដំណាក់កាលដំបូង ការស្រាវជ្រាវ និងការអភិវឌ្ឍ រួមទាំងបង្កើតជាកញ្ចប់ថវិកាមួយសម្រាប់គម្រោងនេះផងដែរ ។
លោក Lim Chang-do អ្នកស្រាវជ្រាវម្នាក់នៅ POSCO Research Institute បានឲ្យដឹងថា រដ្ឋាភិបាលកូរ៉េខាងត្បូងត្រូវតែធ្វើការស្រាវជ្រាវដំណាក់កាលដំបូងលើធនធានធម្មជាតិនៅកូរ៉េខាងជើងដើម្បីត្រៀមខ្លួនសម្រាប់គម្រោងរួមគ្នាមួយនៅពេលដែលមានការដកទណ្ឌកម្មអន្តរជាតិ ៕
ចែករំលែកព័តមាននេះ