កូនប្រុសស្រីទាំងឡាយត្រូវដឹងថាខ្លួនជាអ្នកជំពាក់បំណុលហើយត្រូវដើរតួរជាអ្នកសងវិញជានិច្ច ដែលបំណុលនោះគឺការចិញ្ចឹមឪពុកម្តាយ ដែលគាត់បានចិញ្ចឹមបីបាច់រក្សាយើងមកតាំងតែពីតូចរហូតដល់ធំមិនមែនអស់ស្រូវអង្ករតិចបេ-ការុងទេ មិនមែនអស់ប្រាក់តិចលានទេ ដូច្នេះយើងជាកូនត្រូវតបស្នងសងគុណលោកវិញដោយចិត្តមេត្តា ។
ទោះជាពុកម៉ែអត់ឃ្លាន ក្រលំបាក សុខចិត្តតស៊ូក្នុងជីវិតធ្វើការនៅក្រោមកំដៅថ្ងៃ ហាលខ្យល់ព្យុះ ភ្លៀង ផ្គរ រន្ទះ ក្ដៅពេក ត្រជាក់ពេក រងាពេក ឃ្លានពេក ស្រេកពេក មាតាបិតានៅតែសុខចិត្តខាំមាត់សង្កត់ចិត្ត សម្រក់ទឹកភ្នែក ទទួលរ៉ាប់រងនូវការលំបាកសព្វបែបយ៉ាងដើម្បីកូន ។
សេចក្ដីនេះគួរតែកូនប្រុសស្រីទាំងឡាយ ខំគោរពបូជាបីបាច់ថែរក្សាចិញ្ចឹមគាត់វិញ នេះឯងហើយដែលជាការសងបំណុលចាស់ សូមកូនប្រុសស្រីទាំងឡាយសម្លឹងដោយល្អចុះ។ គាត់ចិញ្ចឹមយើងតាំងពីតូចរហូតដល់ធំ គាត់បំពេញតួនាទីរបស់គាត់បានយ៉ាងល្អ ហាមកូនមិនឲ្យធ្វើអំពើបាបអកុសល ឲ្យកូនតាំងនៅក្នុងសេចក្ដីល្អ ឲ្យកូនបានសិក្សាទាំងផ្លូវលោកទាំងផ្លូវធម៌ ឲ្យកូនតាំងនៅក្នុងសេចក្ដីល្អជានិច្ច ។
ពេលរៀបចំកូនឲ្យមានគូស្វាមីភរិយារួចហើយ គឺគាត់តែងចែកទ្រព្យសម្បត្តិមួយចំណែកដើម្បីបានជាដើមទន់សម្រាប់គ្រួសារថ្មីនេះ សួរថាមាតាបិតាគាត់ធ្វើអំពើល្អយ៉ាងនេះចំពោះកូន តើមានបានអ្វីអំពីកូនវិញទេ ?
ក្រៅតែអំពីការទទួលសេចក្ដីលំបាក មិនទាន់បានប៉ុន្មានផងគាត់ឈឺ គាត់ស្លាប់ចោលយើងនោះ គឺគាត់មិនបានទទួលអ្វីក្រៅពីនេះទេ។ ដូច្នេះកុំឲ្យគាត់ស្លាប់ទៅទាំងបិទភ្នែកមិនជិត យើងជាកូនត្រូវតែតបគុណលោក ចិញ្ចឹម ទំនុកបម្រុងគាត់វិញក្រែងបានរួចបំណុលចាស់ខ្លះ ។
ចែករំលែកព័តមាននេះ