ខេត្តស្វាយរៀង៖ ក្រុមអ្នកជួញផ្លែស្វាយទៅប្រទេសវៀតណាមបានត្អូញត្អែរថា ប៉ុន្មានខែចុងក្រោយនេះ ការជួញផ្លែស្វាយមិនសូវកាក់កបសោះ ដោយសារតែការចំណាយច្រើនទៅលើកម្មករលើកដាក់ច្រើនសារ ជាពិសេសនោះគឺចំណាយទៅសមត្ថកិច្ចតាមផ្លូវ និងសមត្ថកិច្ចប្រចាំប៉ុស្ដិ៍តាមច្រកទ្វារព្រំដែន ។ ពួកគេបញ្ជាក់ថា ៖«…
ខេត្តស្វាយរៀង៖ ក្រុមអ្នកជួញផ្លែស្វាយទៅប្រទេសវៀតណាមបានត្អូញត្អែរថា ប៉ុន្មានខែចុងក្រោយនេះ ការជួញផ្លែស្វាយមិនសូវកាក់កបសោះ ដោយសារតែការចំណាយច្រើនទៅលើកម្មករលើកដាក់ច្រើនសារ ជាពិសេសនោះគឺចំណាយទៅសមត្ថកិច្ចតាមផ្លូវ និងសមត្ថកិច្ចប្រចាំប៉ុស្ដិ៍តាមច្រកទ្វារព្រំដែន ។
ពួកគេបញ្ជាក់ថា ៖« ប្រសិនបើរថយន្ដយីឌុប ត្រូវបង់៣០ម៉ឺនរៀលក្នុង១គ្រឿង, រថយន្ដចំណុះ២៥តោនត្រូវបង់២៥ម៉ឺនរៀល, រថយន្ដចំណុះ១៥តោនត្រូវបង់១៥ម៉ឺនរៀល ហើយបើដឹកតាមរថយន្ដទួរីស ត្រូវបង់៥ម៉ឺនរៀល »។ ក្រុមឈ្មួញបាននិយាយទៀតថា ពួកគាត់ដឹកផ្លែស្វាយទៅប្រទេសវៀតណាម តាមច្រកព្រំដែនដូង ឃុំដូង ក្នុងស្រុករមាសហែក ដោយត្រូវបង់ឲ្យស្ថាប័នចំនួន៥ មិនដែលរួចខ្លួនម្ដងណាទេ ក៏ប៉ុន្តែមិនដែលឃើញសមត្ថកិច្ចណាមួយ ឲ្យវិក្កយបត្រឡើយ គឺក្រុមសមត្ថកិច្ចទាំងនោះ គ្រាន់តែឡើងមើលរថយន្ត រួចទារតម្លៃតែម្តងតាមការប៉ាន់ស្មានរបស់ពួកគេ ។
លោក សួន ម៉ារ៉ា ជាអ្នកជួញផ្លែស្វាយពីខេត្តកំពង់ស្ពឺ ទៅលក់ឲ្យវៀតណាមនៅច្រកទ្វារ តំបន់ព្រំដែនដូងនេះ បានឲ្យដឹងថា សព្វថ្ងៃនេះ លោកបានដើរម៉ៅចម្ការស្វាយពីម្ចាស់ចម្ការនៅខេត្តកំពង់ស្ពឺ ដឹកមកលក់ឲ្យវៀតណាម ។ លោកបន្ដថា ៖« ដោយសារតែការចំណាយលើសមត្ថកិច្ចតាមផ្លូវច្រើនកន្លែង ហើយមកដល់ព្រំដែនវត្តដូង ភូមិដូង ឃុំដូង ស្រុករមាសហែកនេះ ត្រូវចំណាយកាន់តែច្រើនទៀត ធ្វើឲ្យការរកស៊ីរបស់យើងជួបការខាតបង់ជាបន្ដបន្ទាប់ »។ លោកបញ្ជាក់ថា ៖« ជាទូទៅ យើងត្រូវចំណាយលើកម្មករលើកចុះដាក់ពីមួយទៅមួយ និងបង់ឲ្យសមត្ថកិច្ចតាមផ្លូវ, សមត្ថកិច្ចប្រចាំច្រកព្រំដែន៥ស្ថាប័ន និងចំណាយឲ្យទាហានវៀតណាមទៀត។ ដូច្នេះរាល់ថ្ងៃនេះ ការរកស៊ីគ្មានសល់ប្រាក់នោះទេ »។
បើតាមការរៀបរាប់ពីឈ្មួញជួញផ្លែស្វាយរូបនេះបានបញ្ជាក់ថា ទីផ្សារផ្លែស្វាយនៅប្រទេសវៀតណាមសព្វថ្ងៃ គឺស្វាយលេខ១ លក់បានតម្លៃ១.១០០ទៅ១.២០០រៀល, លេខ២លក់បានតម្លៃ៩០០ទៅ១.០០០រៀល និងលេខ៣ តម្លៃ៧០០រៀលក្នុង១គីឡូក្រាម តែពេលខ្លះស្វាយលេខ១ ក៏ត្រូវវៀតណាមទម្លាក់ថ្លៃដល់៩០០រៀលក្នុង១គីឡូក្រាមក៏មានដែរ ។
ចំណែកថ្លៃសេវាដឹកជញ្ជូនវិញ លោក សួន ម៉ារ៉ា បានឲ្យដឹងថា ៖« គ្រាន់តែចំណាយលើកម្មករលើកចុះពីរថយន្ដដាក់រ៉ឺម៉កក្នុង១តោន អស់៨ពាន់រៀល, ឈ្មួលរ៉ឺម៉កចំណុះ២តោន អស់ថ្លៃ១,៦ម៉ឺនរៀល, បង់ឲ្យទាហានវៀតណាមក្នុង១រ៉ឺម៉ក២ម៉ឺនរៀល និងបង់ឲ្យស្ថាប័នសមត្ថកិច្ចខ្មែរតាមក្បាលរថយន្ដចាប់ពី១៥ម៉ឺនទៅ៣០ម៉ឺនរៀល » ។ ក្រុមឈ្មួញទាំងនោះបានសំណូមពរដល់សមត្ថកិច្ច មេត្តាយោគយល់ និងអធ្យាស្រ័យដល់អ្នកជួញផលិតផលកសិកម្មបែបនេះផង ព្រោះវាជាផ្នែកមួយជួយឲ្យកសិករមានទឹកចិត្តបង្កបង្កើនផល ក៏ដូចជាជួយរកទីផ្សារកសិផលជូនពួកគាត់ដែរ ។ទាក់ទឹងនឹងករណីខាងលើនេះ ភ្នាក់ងារយកព័ត៌មាន កោះសន្ដិភាព មិនអាចសុំការបំភ្លឺពីសមត្ថកិច្ចប៉ុស្តិ៍ច្រកទ្វារតំបន់ព្រំដែនដូងបានទេ ដោយអ្នកយាមប្រាប់ថា « មេមិននៅ ទៅប្រជុំនៅខេត្ត »៕
ចែករំលែកព័តមាននេះ