រាជធានីភ្នំពេញ ៖ ជនសង្ស័យម្នាក់ត្រូវសមត្ថកិច្ចឃាត់ខ្លួន បន្ទាប់ពីធ្វើសកម្មភាពលួចម៉ូតូមួយគ្រឿងដែលគេចតទុកចោលនៅខាងមុខតូបលក់ទឹកត្នោតជូរបានសម្រេច តែបែរជាលួចចំម៉ូតូខូច ហើយក៏ត្រូវម្ចាស់ម៉ូតូតាមទាន់ចាប់វាយទ្រោមខ្លួន ។
ហេតុការណ៍នេះបង្កអោយមានការណ៍ភ្ញាក់ផ្អើលឡើងកាលពីវេលាម៉ោង៤និង១០នាទីទៀបភ្លឺ ថ្ងៃទី២៦ ខែតុលា ឆ្នាំ២០១៨ ត្រង់ចំណុចខាងមុខផ្សារឈូកមាស តាមបណ្ដោយផ្លូវ២០១១ ស្ថិតក្នុងសង្កាត់គោកឃ្លាង ខណ្ឌសែនសុខ។
ជនសង្ស័យមានឈ្មោះ ចាន់ ស្មី អាយុ៣២ឆ្នាំ មុខរបរមិនពិតប្រាកដ ស្នាក់នៅម្តុំក្តាន់ពីរ ស្ថិតក្នុងសង្កាត់ស្រះចក ខណ្ឌដូនពេញ។ ចំណែកម្ចាស់ម៉ូតូឈ្មោះ ស៊េង ម៉ុន អាយុ៥៥ឆ្នាំ ជាអ្នកលក់ទឹកត្នោតជូរ ស្នាក់នៅរោងលក់ទឹកត្នោតជូរ ស្ថិតក្នុងភូមិច្រេះ សង្កាត់គោកឃ្លាង ខណ្ឌសែនសុខ។
បើតាមសម្តីម្ចាស់ម៉ូតូបានរៀបរាប់អោយដឹងថា នៅមុនពេលកើតហេតុ គាត់បានសម្រាកនៅក្នុងរោងលក់ទឹកត្នោតជូរ ដែលនៅខាងជើងវត្តសំរោងអណ្តែត ហើយចតម៉ូតូមួយគ្រឿងម៉ាក ZOOMER-X ពណ៌សលាយក្រហម ពាក់ស្លាកលេខ ភ្នំពេញ១GQ-០៦៥០ នៅជិតគ្រែដែលគាត់សំរាក ដោយមិនបានចាក់សោកម៉ូតូអ្វីនោះទេ ព្រោះគិតថាម៉ូតូខូច ដេមិនឆេះគ្មានចោរណាមកលួចបាននោះទេ។
លុះដល់វេលាម៉ោង២រំលងអធ្រាត្រថ្ងៃកើតហេតុ ខណៈពេលដែលគាត់ងើបឡើងក៏ស្រាប់តែមិនឃើញម៉ូតូរបស់គាត់ ហើយគាត់ក៏ឆោឡោនាំកូនក្មួយដើររកម៉ូតូរបស់គាត់ ពេលដែលគាត់ជិះមកដល់ចំណុចកើតហេតុខាងលើ ក៏ប្រទះឃើញម៉ូតូរបស់គាត់ត្រូវជនសង្ស័យខាងលើកំពុងបណ្តើរតែម្នាក់ឯង។
ភ្លាមៗនេះគាត់ក៏ស្រែកឆោឡោបង្កអោយមានការណ៍ភ្ញាក់ផ្អើលដល់ប្រជាពលរដ្ឋដែលនៅក្បែរនោះ ជួយចាប់ឃាត់ហើយក៏បានស្វាគមន៍ម្នាក់មួយដៃមួយជើងបណ្តាលឲ្យទ្រោមខ្លួន រួចក៏ប្រគល់ទៅឲ្យសមត្ថកិច្ចមូលដ្ឋាននាំខ្លួនយកទៅសាកសួរនាំ។
ក្រោយពេលកើតហេតុ ជនសង្ស័យខាងលើរួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលគោកឃ្លាងធ្វើការសាកសួរនាំនិងកសាងសំណុំរឿងបញ្ជូនទៅអធិការដ្ឋាននគរបាលខណ្ឌសែនសុខដើម្បីចាត់ការតាមនីតិវិធីជាបន្តទៀត៕
ចែករំលែកព័តមាននេះ