ម៉ូតូ២គ្រឿងបុកគ្នាពេញទំហឹង បណ្ដាលឲ្យស្លា.ប់២នាក់
- ភ្នំពេញ
រាជធានីភ្នំពេញ ៖ ម៉ូតូធំម៉ាក M slaz មួយគ្រឿងបានបើកជែងបោះពួយក្នុងល្បឿនលឿនជ្រុល ទៅបុកម៉ូតូម៉ាកហុងដាសេ១២៥ មួយគ្រឿង ក្នុងទិសដៅបញ្ច្រាសគ្នា បណ្តាលឲ្យស្លាប់២នាក់…
រាជធានីភ្នំពេញ ៖ ម៉ូតូធំម៉ាក M slaz មួយគ្រឿងបានបើកជែងបោះពួយក្នុងល្បឿនលឿនជ្រុល ទៅបុកម៉ូតូម៉ាកហុងដាសេ១២៥ មួយគ្រឿង ក្នុងទិសដៅបញ្ច្រាសគ្នា បណ្តាលឲ្យស្លាប់២នាក់ និងរងរបួសធ្ងន់ម្នាក់ ហើយម៉ូតូទាំង២គ្រឿងរងការខូចខាតធ្ងន់ធ្ងរ។ គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង៣ និង៥០នាទីរសៀល ថ្ងៃទី២៥ ខែតុលា ឆ្នាំ២០១៨ នៅតាមផ្លូវ លេខ១៥១ ក្នុងភូមិស្រែដូនតូច សង្កាត់ពញាពន់ ខណ្ឌព្រែកព្នៅ។
ជនរងគ្រោះដែលបានស្លាប់ នោះរួមមាន ១.ឈ្មោះ សោម ពិសាល ភេទប្រុស អាយុ១៨ឆ្នាំ ជាសិស្ស មានលំនៅភូមិ កើតហេតុខាងលើ ជិះម៉ូតូធំម៉ាក M slaz ពណ៌ខៀវ លាយស ពាក់ស្លាកលេខ ភ្នំពេញ ១HA.១៤៨៩ បានបោកក្បាលស្លាប់នៅកន្លែង ២.ឈ្មោះ ណេត ផាត ភេទប្រុស អាយុ៣២ឆ្នាំ មាននៅផ្សាររកាកោង ស្រុកមុខកំពូល ខេត្តកណ្តាល ជិះម៉ូតូម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ ១CX-៤៣៨១ បានប៉ើងធ្លាក់ផ្លូវស្លាប់នៅនឹងកន្លែង។ ចំណែកអ្នករងរបួស ឈ្មោះ ឆាយ យ៉ា ភេទប្រុស អាយុ២៣ឆ្នាំ ជិះម៉ូតូធំ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត។
តាមសាក្សីបានឲ្យដឹងថា នៅមុនពេលកើតហេតុ គេឃើញម៉ូតូធំជិះគ្នា២នាក់បានធ្វើដំណើរ តាមផ្លូវលេខ១៥១ ក្នុងទិសដៅពីកើតទៅលិច ក្នុងល្បឿន។ នៅពេលធ្វើដំណើរមកដល់កន្លែងកើតហេតុក៏បានបើកជែងយានយន្ត ហើយក៏ជ្រុលចង្កូតទៅបុក ម៉ូតូម៉ាកហុងដាឌ្រីមជិះម្នាក់ឯងក្នុងទិសដៅបញ្ច្រាសគ្នាពេញទំហឹង។ តាមព័ត៌មានឲ្យដឹងទៀតថា នៅពេលកើតហេតុមានគ្រោះថ្នាក់អ្នកបើកម៉ូតូហុងបានប៉ើងធ្លាក់ផ្លូវ បណ្តាលឲ្យស្លាប់នៅនឹងកន្លែង។
ដោយឡែកម៉ូតូធំបណ្តាលឲ្យអ្នកបើកបរបោកក្បាលស្លាប់នៅនឹងកន្លែង និងអ្នករួមដំណើរ បានរងរបួសធ្ងន់។ បន្ទាប់ពីកើតមានគ្រោះថ្នាក់ នគរបាលក៏បានចុះទៅដល់កន្លែងកើតហេតុ ចាត់ចែងនាំ ជនរងគ្រោះថ្នាក់បញ្ជូនទៅកាន់មន្ទីរពេទ្យ។ ចំណែកសពត្រូវបានក្រុមគ្រួសារមកនាំយកទៅធ្វើបុណ្យ តាមប្រពៃណី។ ម៉ូតូត្រូវបាននគរបាលបញ្ជូនទៅកាន់ការិយាល័យចរាចរណ៍ជើងគោក ដើម្បីធ្វើការដោះស្រាយ៕
ចែករំលែកព័តមាននេះ