រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី២៥ តុលា បានសម្រេចចេញដីកាឃុំខ្លួនស្ត្រីខ្មែរម្នាក់ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទហិង្សាដោយចេតនាមានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ ។…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីព្រឹកថ្ងៃទី២៥ តុលា បានសម្រេចចេញដីកាឃុំខ្លួនស្ត្រីខ្មែរម្នាក់ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទហិង្សាដោយចេតនាមានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ ។
ស្ត្រីជាប់សង្ស័យឈ្មោះ ជួង បុប្ផា អាយុ៣៣ឆ្នាំ ជនជាតិខ្មែរ មានលំនៅស្ថានលេខ៣៣៩F ផ្លូវលេខ៩០៨ ភូមិទួលសង្កែ សង្កាត់ទួលសង្កែ ខណ្ឌឬស្សីកែវ ។
ជនសង្ស័យត្រូវកម្លាំងសមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃចាប់ខ្លួនតាមដីកាបញ្ជាឲ្យនាំខ្លួនរបស់ចៅក្រមសើបសួរសាលាដំបូងរាជធានីភ្នំពេញ តាមសំណុំរឿងលេខ៧២២១ ចុះថ្ងៃទី១៤ វិច្ឆិកា ឆ្នាំ២០១៧ ដែលស្ថាប័នអយ្យការអមសាលាដំបូងបានសម្រេចចោទប្រកាន់ឈ្មោះ ជួង បុប្ផា តាមពាក្យបណ្ដឹងរបស់ឈ្មោះ ស៊ីន ជុងបឹក ភេទប្រុស អាយុ៥៣ឆ្នាំ ជនជាតិកូរ៉េ និងជាប្តីជនជាប់ចោទ ។
ខណៈចៅក្រមសម្រេចចេញដីកាឃុំខ្លួនស្ត្រីជាប់សង្ស័យបានថ្លែងឲ្យដឹងថា នេះជារឿងអយុត្តិធម៌ខ្លាំងណាស់ ដែលប្ដីជនជាតិកូរ៉េវាយធ្វើបាបនាងច្រើនលើកច្រើនសារ រហូតបាក់ដៃ បែកក្បាល បង្ខំឲ្យនាងដេករួមភេទជាមួយមិត្តភក្តិ «ប្ដី» តែដោយការស្រឡាញ់ប្ដីនាងមិនបានប្តឹងទេ បែរជាប្តីប្តឹងរហូតចាប់ខ្លួនដាក់គុកទៅវិញ ។
នាងជាប់សង្ស័យរៀបរាប់ទៀតថា ចំណែកព្រះរាជអាជ្ញាកាន់រឿងនេះ ក៏មិនបានហៅនាងទៅសាកសួរដែរ សម្បីមួយម៉ាត់ស្រាប់តែចោទប្រកាន់ទៅចៅក្រមឲ្យចេញដីកាចាប់ខ្លួននាងដាក់គុក ។ ស្ត្រីខ្មែរជនជាប់សង្ស័យរៀបរាប់ទាំងទឹកភ្នែកថា នាង និងប្ដីកូរ៉េបានរៀបការ និងចុះសំបុត្រអាពាពិពាហ៍ត្រឹមត្រូវតាមច្បាប់កាលពីថ្ងៃទី២២ ឧសភា ឆ្នាំ២០០៧ ក៏ចេញទៅធ្វើការសន្សំប្រាក់នៅប្រទេសកូរ៉េបានមួយចំនួន ហើយក៏ត្រឡប់មករស់នៅកម្ពុជាវិញ និងបានទិញផ្ទះ២ល្វែងជាទ្រព្យ រួមនឹងមានកូនស្រីម្នាក់អាយុ៥ឆ្នាំឈ្មោះ ស៊ីន ស៊ីអាឡេអ៊ី ។
ពេលមករស់នៅក្រុងភ្នំពេញវិញគ្រួសារនាង មិនសូវមានសេចក្ដីសុខទេ ដោយប្ដីជនជាតិកូរ៉េមានមិត្តភក្តិរដើរលេងរាល់យប់ ផឹកស៊ីស្រវឹងមកដល់ផ្ទះរករឿងវាយតប់ប្រពន្ធស្ទើរាល់ថ្ងៃ ពេលខ្លះវាយបែកក្បាល ពេលខ្លះវាយបាក់ដៃ ពេលខ្លះប្ដីបង្ខំនាងឲ្យដេកជាមួយប្រុសដែលជាមិត្តភក្តិ ដោយសារនាងមិនធ្វើតាមទើបប្ដីប្រើហឹង្សារនោះ ។
ក្រោយកើតមានអំពើហិង្សាញឹកញាប់ នាងទ្រាំមិនបានក៏សម្រេចចិត្តថា និងត្រូវប្ដឹងលែងលះប្តីកូរ៉េនោះ ។ បន្ទាប់ពីដឹងថា នាងចង់ប្ដឹងលែងលះ ប្ដីនាងបានលួចយកកូនស្រីទៅប្រទេសកូរ៉េបាត់រហូតដល់សព្វថ្ងៃនេះ ។
លុះដល់ឆ្នាំ២០១៧ បងប្អូនបានសម្របសម្រួលឲ្យគ្រួសារនាងជួបជុំគ្នាវិញ ទើបថ្ងៃនោះក៏កើតមានជម្លោះមួយថ្មីទៀត ដោយវាយប្រតាយប្រតប់គ្នានៅក្នុងហាងអាហារដ្ឋានមួយទល់មុខមន្ទីរពេទ្យកាល់ម៉ែត ។ ជម្លោះវាយតប់គ្នានោះប្ដីនាងរអិលដួលបោកជើងតុមានរបួសតិចតួច ដែលចំណុចនោះហើយ អាចប្តីកូរ៉េបានចាប់ទោសអូសដំណើរយករឿងនេះមកប្តឹងនាង ។
ស្ត្រីជាប់សង្ស័យបន្តថា រឿងប្តឹងជាសិទ្ធិបុគ្គលទេ តែអ្វីដែលអយុត្តិធម៌សម្រាប់នាង មិនបាន ដឹង និងមិនបានទទួលដីកាកោះហៅទៅសួរម្ដងសោះ ស្រាប់តែនៅថ្ងៃទី២៤ តុលា សមត្ថកិច្ចបានទៅចាប់ខ្លួននាង យោងតាមពាក្យបណ្ដឹងប្ដីកូរ៉េនោះនាងទៅវិញ រហូតចៅក្រមសម្រេចឃុំខ្លួនដាក់ពន្ធនាគារតែម្តង ។
នេះគ្រាន់តែជាសម្តីជនជាប់សង្ស័យប៉ុណ្ណោះទេ អ្នកច្បាប់បានលើកឡើងថា ព្រះរាជអាជ្ញាមិនដែលចេះតែចោទប្រកាន់អ្នកគ្មានកំហុសនោះទេ ហើយចៅក្រមស៊ើបសួរក៏រឹតតែមិនអាចឃុំខ្លួនជនណាម្នាក់ដែលមិនបានពិនិត្យអង្គហេតុ និងអង្គច្បាប់ដែរ ៕
ចែករំលែកព័តមាននេះ