ខេត្តព្រះវិហារ ៖ សម្លេងផ្ទុះលាន់ឮកក្រើកដីស្ទើរទូទាំងខេត្តព្រះវិហារ កាលពីវេលាម៉ោងប្រមាណ៦និង៣០នាទីព្រឹក ថ្ងៃទី២៥ ខែតុលា ឆ្នាំ២០១៨នេះ គឺមានករណីផ្ទុះយន្តហោះគ្មានមនុស្សបើក ស្ថិតក្នុងភូមិសាស្ត្រឃុំស្រយ៉ង់ ស្រុកគូលែន ខេត្តព្រះវិហារ ហេតុការណ៍នេះបង្កឱ្យមានការភ្ញាក់ផ្អើលយ៉ាងខ្លាំង បន្ទាប់ពីបំណែកដែកយន្តហោះនោះបានធ្លាក់រាយប៉ាយពេញក្នុងព្រៃ ក្នុងភូមិសាស្ត្រឃុំស្រយ៉ង់ ។
ប្រជាពលរដ្ឋជាច្រើនរស់នៅភូមិស្រយ៉ង់បានឲ្យដឹងថា ពួកគាត់មានការភ្ញាក់ផ្អើលយ៉ាងខ្លាំង បន្ទាប់ពីលឺសម្លេងផ្ទុះលាន់ឮឡើងកក្រើកដីទាំងព្រលឹមតែម្តង អ្នកខ្លះក៏មានការភ័យខ្លាច លុះមួយសន្ទុះក្រោយមកក៏មានលេចឮដំណឹងថា មានបំណែកផ្ទាំងដែកជាច្រើនបានធ្លាក់រាយប៉ាយតាមភូមិ និងពេញព្រៃក្នុងភូមិសាស្ត្រឃុំគូលែន ក្រោយមកទើបសមត្ថកិច្ចបាននាំគ្នាទៅពិនិត្យមើល និងធ្វើការប្រមូលយកបំណែកទាំងអស់នោះមករក្សាទុក ដើម្បីឲ្យជំនាញធ្វើការត្រួតពិនិត្យ ។
តាមការបញ្ជាក់ពីលោកឧត្តមសេនីយ៍ត្រី ឆយ បូរិន នាយសេនាធិការដ្ឋានស្នងការដ្ឋាននគរបាលខេត្តព្រះវិហារ បានឲ្យដឹងថា បន្ទាប់ពីមានករណីផ្ទុះយន្តហោះគ្មានមនុស្សបើកនេះ ស្នងការខេត្តបានបញ្ជូនអ្នកជំនាញទៅត្រួតពិនិត្យភ្លាមៗ ដើម្បីប្រមូលយកនូវវត្ថុតាង បំណែកយន្តហោះទាំងអស់នោះមករក្សាទុកធ្វើការត្រួតពិនិត្យពីប្រភពដែលនាំឲ្យកើតមានការផ្ទុះយន្តហោះនេះថា តើមានប្រភពមកពីណា?
លោកឧត្តមសេនីយ៍ បានបន្ថែមថា ករណីផ្ទុះយន្តហោះប្រភេទនេះ មិនមែនជាលើកទី១ឡើយសម្រាប់ខេត្តព្រះវិហារ ហើយនៅពេលមានការផ្ទុះឃើញថា ស្ថិតក្នុងភូមិសាស្ត្រស្រុកគូលែនដដែល ។ រហូតមកដល់ពេលនេះ សមត្ថកិច្ចកំពុងតែធ្វើការប្រមូលនូវកំទេចកំទីបំណែកយន្តហោះនេះមិនទាន់រួចរាល់នៅឡើយទេ ។
គួររំលឹកផងដែរ ករណីផ្ទុះយន្តហោះគ្មានមនុស្សបើកនេះ បានកើតឡើងលើកទី៤ហើយនៅក្នុងទឹកដីនៃខេត្តព្រះវិហារ ដោយក្នុងនោះស្រុកគូលែន ជាលើកទី២ហើយ តែពុំមានប៉ះពាល់ ឬបង្កឲ្យប្រជាជនរងរបួសដោយសារធ្លាក់បំណែកយន្តហោះទាំងនោះឡើយ ។
ចែករំលែកព័តមាននេះ