រាជធានីភ្នំពេញ ៖ គណៈកម្មាធិការជាតិរៀបចំបុណ្យជាតិ និងអន្តរជាតិបានជូនដំណឹងដល់មហាជនអំពីការបាញ់កាំជ្រួច ក្នុងឱកាសខួបអបអរសាទរគ្រងរាជសម្បត្តិរបស់ព្រះករុណា ព្រះបាទសម្តេចព្រះបរមនាថនរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា ដែលនឹងប្រព្រឹត្តនៅថ្ងៃទី២៩ ខែតុលាខាងមុខនេះ ។
គណៈកម្មាធិការជាតិរៀបចំបុណ្យជាតិ និងអន្តរជាតិបានបញ្ជាក់ថា ការបាញ់កាំជ្រួចនេះនឹងធ្វើឡើងនៅមុខព្រះបររាជវាំងរាជធានីភ្នំពេញ ដើម្បីអបអរសាទរព្រះរាជពិធីបុណ្យខួបលើកទី១៤ នៃការគ្រងព្រះបរមរាជសម្បត្តិរបស់ព្រះករុណាព្រះបាទសម្តេចព្រះបរមនាថនរោត្តមសីហមុនី ក៏ដូចជា ឱ្យប្រជារាស្ត្របានចូលរួមសម្តែងនូវមនោសញ្ចេតនាសប្បាយរីករាយចំពោះការគ្រងរាជរបស់ព្រះករុណាជាអម្ចាស់ជីវិតលើត្បូង ដើម្បីបានគង់ជាម្លប់ដ៏សុខក្សេមក្សាន្ត ត្រជាក់ត្រជុំរបស់មាតុភូមិអង្គរ និងប្រជារាស្ត្រខ្មែររបស់ព្រះអង្គ ។
គណៈកម្មាធិការជាតិរៀបចំបុណ្យជាតិ និងអន្តរជាតិក៏បានណែនាំឱ្យក្រសួងវប្បធម៌ និងវិចិត្រសិល្បៈចាត់តាំងក្រុមតន្ត្រី សិល្បៈបុរាណសម័យ ដើម្បីសម្ដែងជូនប្រជាពលរដ្ឋទស្សនា កម្សាន្តសប្បាយនៅតាមទីសាធារណៈក្នុងឱកាសនេះ ។ ជាមួយគ្នានៅគ្រប់ក្រសួងស្ថាប័នរាជធានីខេត្តម្ចាស់រោងចក្រសហគ្រាស និងប្រជារាស្ត្រក៏ត្រូវដាក់តាំងព្រះបរមឆាយាល័ក្ខណ៍ព្រះករុណាជាអម្ចាស់ជីវិតលើត្បូង និងដាក់ពាក្យស្លោកថ្វាយព្រះពរសារលិខិតថ្វាយព្រះពរព្រមទាំងចងទង់ជាតិមានបដាពាក្យស្លោកថ្វាយព្រះពរ និងតុបតែងលំអភ្លើងពណ៌ផងដែរ ៕
ចែករំលែកព័តមាននេះ