ខេត្តកំពង់ឆ្នាំង ៖ ពាក្យចាស់ពោលថា «ឈើកោងវល្លិព័ទ្ធ មនុស្សខ្ចាត់ព្រាត់កុំយកខ្លួនបៀត» ។ យ៉ាងណា ម៉ិញ ស្ត្រីម្នាក់រស់នៅស្រុកបរិបូរណ៍ បានចាញ់បោកបុរសម្នាក់ដែលមកស្នាក់នៅក្នុងភូមិ ហើយល្បួងសុំក្តីស្នេហ៍ពីនាង ដោយឱ្យអ្នកជិតខាងចូលចែចូវ ប៉ុន្តែទីបំផុតរៀបសែនព្រេនបានតែបីខែ ក៏បោកយកម៉ូតូពីនាងអស់១គ្រឿង និងចិញ្ជៀនមាស១វង់ គេចខ្លួនបាត់តែម្តង ។
ក្នុងពាក្យបណ្តឹងនារីរងគ្រោះអាយុ៤០ឆ្នាំ ដែលប្តឹងទៅលោកមេឃុំពន្លៃ ស្រុកបរិបូរណ៌ បានរៀបរាប់ថា កាលពីជាង៣ខែមុន មានបុរសម្នាក់ឈ្មោះរិទ្ធ អាយុ៤៣ឆ្នាំ បានស្នាក់នៅផ្ទះឈ្មោះពូសុត មីងអុន នៅភូមិ-ឃុំជាមួយគ្នា ។ ក្រោយមកបានឈ្មោះរិទ្ធ មកសុំស្រឡាញ់នាង ដោយឱ្យចាស់ទុំចូលចែចូវ និងប្រាប់ថា រូបគេគ្មានប្រពន្ធកូនទេ ហើយមានផ្ទះសំបែងនៅខេត្តកណ្តាល ។ កាលណោះនាងក៏យល់ព្រម ហើយពួកយើងក៏បានរៀបចំសែនព្រេនយកគ្នាជាប្តីប្រពន្ធ ។
នារីរងគ្រោះបន្តថា ការរស់នៅជាមួយគ្នាបានរយៈពេល៣ខែធ្វើឱ្យមានទុកចិត្ត ប៉ុន្តែអ្វីៗមិនដូចការគិតរបស់នាងឡើយ គឺបុរសឈ្មោះរិទ្ធនោះបានបោកយកខ្លួននាងហើយ យកទាំងទ្រព្យសម្បត្តិរបស់នាងទៀត ។ នៅក្នុងពាក្យបណ្តឹងរបស់នារីរងគ្រោះបញ្ជាក់ថា កាលពីថ្ងៃទី៦ ខែតុលា បុរសឈ្មោះរិទ្ធ បានសុំខ្ចីម៉ូតូនាង ថា ទៅលេងផ្ទះបងប្អូននៅខេត្តពោធិ៍សាត់ ដោយសារទុកចិត្តនាងបានឱ្យម៉ូតូខ្ចី និងឱ្យចិញ្ចៀនមាសទម្ងន់៣ជី ពាក់ទៀតផង ។
ប្រភពដដែលបានបន្តថា ចាប់តាំងពីចាកចេញទៅបុរសឈ្មោះរិទ្ធនោះមិនបានត្រឡប់មកវិញឡើយ ហើយថែមទាំងបិទលេខទូរស័ព្ទតេមិនចូលទៀត។ ដោយសារតែបែបនេះហើយ ទើបនាងដឹងច្បាស់ថា បុរសឈ្មោះរិទ្ធ ពិតជាបោកយកខ្លួននាង ហើយយកទាំងទ្រព្យសម្បត្តិនាងទៀត ។ ហេតុនេះ ទើបនាងសុំប្តឹងលោកមេឃុំ និងសមត្ថកិច្ចគ្រប់ជាន់ថ្នាក់ សូមជួយតាមចាប់បុរសឈ្មោះរិទ្ធនោះ យកមកផ្តន្ទាទោសទៅតាមច្បាប់ផង ៕
ចែករំលែកព័តមាននេះ