រាជធានីភ្នំពេញ ៖ ចាត់ទុកថា ជាលើកទី១ហើយ បន្ទាប់ពីសម្តេចតេជោនាយករដ្ឋមន្ត្រី បានបង្កើតក្រុមការងារចម្រុះមួយ សម្រាប់ទទួលរាល់ពាក្យបណ្តឹងតវ៉ារបស់ប្រជាពលរដ្ឋនៅមុខភូមិគ្រឹះរបស់សម្តេច ដែលមានលោកនាយឧត្តមសេនីយ៍ ហ៊ីង ប៊ុនហៀង ជាប្រធាន ។ ទោះបីជាបែបណា ការប៉ុនប៉ងហែក្បួនទៅភូមិគ្រឹះសម្តេចតេជោរបស់ពលរដ្ឋមកពីស្រុកស្នួល ខេត្តក្រចេះ ត្រូវបានរារាំងដោយកម្លាំងសមត្ថកិច្ច ដោយបានបង្វែរឲ្យមកកាន់ក្រសួងរៀបចំដែនដី នគរូបនីយកម្ម និងសំណង់វិញ ។
ប្រជាពលរដ្ឋរាប់រយនាក់មកពីភូមិជើងខ្លេ ឃុំ២ធ្នូ ស្រុកស្នួល ខេត្តក្រចេះ កាលពីវេលាម៉ោង៨ និង៣០នាទីព្រឹកថ្ងៃទី២៤ ខែតុលា បាននាំគ្នាមកកាន់ក្រសួងរៀបចំដែនដី នគរូបនីយកម្មនិងសំណង់ ដែលមានទីតាំងស្ថិតនៅតាមមហាវិថីព្រះមុនីវង្ស ក្នុងសង្កាត់បឹងត្របែក ខណ្ឌចំការមន ដើម្បីសុំឲ្យថ្នាក់ដឹកនាំក្រសួងជួយធ្វើអន្តរាគមន៍ ដោះស្រាយបញ្ហាដីធ្លីរបស់ពួកគាត់ជាមួយនឹងក្រុមហ៊ុនមេមត់ ដែលជម្លោះនេះមានរយៈពេលជាច្រើនឆ្នាំមកហើយមិនទាន់មានការដោះស្រាយ ។
ប្រជាពលរដ្ឋទាំងនោះរៀបរាប់ថា ពួកគាត់ជាង៨០០នាក់តំណាងឲ្យ១.៦៤៣គ្រួសារ មកពីភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ នាំគ្នាមកកាន់ក្រសួងរៀបចំដែនដី នគរូបនីយកម្ម និងសំណង់ ដើម្បីឲ្យថ្នាក់ដឹកនាំក្រសួងជួយអន្តរាគមន៍ដោះស្រាយបញ្ហាទំនាស់ដីធ្លីជាមួយនឹងក្រុមហ៊ុនមេមត់ ។ កន្លងមក ពួកគាត់បាននាំគ្នាមកកាន់ទីនេះចំនួន៦លើកមកហើយ តែមិនមានដំណោះស្រាយណាមួយពិតប្រាកដដល់ពួកគាត់ឡើយ ហើយបើរាប់ទាំងលើកនេះទៀតគឺជាលើកទី៧ហើយ និងមិនទាន់ដឹងថា តើខាងក្រសួងនឹងមានដំណោះស្រាយយ៉ាងណាដល់ពួកគាត់នៅឡើយ ។
ប្រភពដដែលបន្តទៀតថា កាលពីឆ្នាំ២០១៤កន្លងមក ពួកគាត់បាននាំគ្នាទៅកាប់ឆ្ការដីព្រៃ នៅក្នុងភូមិ ឃុំខាងលើ ដើម្បីសាងសង់លំនៅឋានរស់នៅ និងធ្វើស្រែចម្ការ ។ លុះមកដល់ឆ្នាំ២០១៧ ស្រាប់តែមានក្រុមហ៊ុនមួយឈ្មោះមេមត់ បាននាំយកគ្រឿងចក្រនិងកម្លាំងប្រដាប់អាវុធដែលមានទាំងនគរបាល ប៉េអឹម និងទាហាន ទៅការពារការឈូសឆាយដីចម្ការ និងដុតផ្ទះសម្បែងរបស់ពួកគាត់បណ្តាលឲ្យឆេះនិងខូចខាតខ្ទេចខ្ទីអស់គ្មានសល់ ។
ក្រោយពីក្រុមហ៊ុនមេមត់យកគ្រឿងចក្រនិងប្រើប្រាស់កម្លាំងប្រដាប់អាវុធដុតបំផ្លាញផ្ទះសម្បែងរបស់ពួកគាត់អស់មក ពួកគាត់ទាំង១.៦៤៣គ្រួសារ គ្មានផ្ទះសម្បែងស្នាក់នៅនិងដីសម្រាប់ធ្វើស្រែចម្ការទេ ។ ពួកគាត់បានធ្វើរោងតូចៗរស់នៅតាមមុខផ្ទះរបស់គេ និងខ្លះទៀតធ្វើរោងនៅតាមចិញ្ចើមផ្លូវរស់នៅយ៉ាងវេទនាបំផុត មិនតែប៉ុណ្ណោះកូនៗរបស់ពួកគាត់ ក៏មិនបានចូលសាលារៀនដូចគេឯងឡើយ ។
ប្រភពដដែលរៀបរាប់ទៀតថា ក្នុងពេលនេះដែរ ពួកគាត់ជាប្រជាពលរដ្ឋដែលរងគ្រោះអំពីបញ្ហាដីធ្លីជាមួយនឹងក្រុមហ៊ុនមេមត់ សំណូមពរទៅសម្តេចតេជោនាយករដ្ឋមន្ត្រី ហ៊ុន សែនក៏ដូចជាថ្នាក់ដឹកនាំកំពូលៗដទៃទៀត សូមជួយអន្តរាគមន៍ដោះស្រាយបញ្ហាដីធ្លីរបស់ពួកគាត់ទាំង១.៦៤៣គ្រួសារនេះផង ព្រោះរាល់ថ្ងៃនេះពួកគាត់គ្មានផ្ទះសម្បែងស្នាក់នៅ គ្មានដីស្រែដីចម្ការ ជួបការលំបាកវេទនាខ្លាំងណាស់ ហើយមួយទៀតក៏ដល់ខែដែលត្រូវប្រកបរបរធ្វើស្រែចម្ការដើម្បីចិញ្ចឹមជីវិតរបស់ពួកគាត់ទៀត ។ ពួកគាត់សុំត្រឹមតែដីភូមិដែលមានក្បាលទំហំ២០ម៉ែត្រ និងបណ្តោយប្រវែង៥០ម៉ែត្រ ដើម្បីធ្វើផ្ទះរស់នៅ ហើយនិងសម្រាប់ធ្វើស្រែចម្ការចំនួន២ហិកតាកន្លះសម្រាប់បង្កបង្កើនផលចិញ្ចឹមជីវិត ។
គួរបញ្ជាក់ថា ប្រជាពលរដ្ឋប្រុសស្រីជាច្រើនរយនាក់ដែលអ្នកខ្លះស្ពាយបង្វេចខោអាវ និងរបស់របរផ្សេងៗសំពីងសំពោងនៅជាប់នឹងខ្លួនគ្រប់ៗគ្នា បាននាំគ្នាធ្វើដំណើរដោយថ្មើរជើងជាជួរយ៉ាងវែងតាមផ្លូវចេញពីវត្តសាមគ្គីរង្សី ក្នុងគោលបំណងឆ្ពោះទៅមុខភូមិគ្រឹះរបស់សម្តេចតេជោនាយករដ្ឋមន្ត្រី ហ៊ុន សែន ស្ថិតនៅក្បែរវិមានឯករាជ្យ តែពេលនោះត្រូវបានកម្លាំងសម្ថកិច្ចមូលដ្ឋានរាប់សិបនាក់ធ្វើការរារាំង និងពន្យល់ណែនាំដល់ពួកគាត់មិនឲ្យធ្វើដំណើរទៅ និងបានណែនាំឲ្យពួកគាត់ធ្វើដំណើរទៅកាន់ក្រសួងរៀបចំដែនដី នគរូបនីយកម្មនិងសំណង់វិញ ។
ក្នុងពេលក្រុមពលរដ្ឋដែលមានបញ្ហាទំនាស់ដីធ្លីមកដល់ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ក៏បានអនុញ្ញាតឲ្យតំណាងប្រុសស្រីចំនួន៣នាក់ចូលជួបធ្វើការដោះស្រាយ តែមិនដឹងថាទទួលបានលទ្ធផលបែបណានោះទេ គិតត្រឹមវេលារសៀលថ្ងៃដដែលនោះ ៕
ចែករំលែកព័តមាននេះ