រាជធានីភ្នំពេញ ៖ ស្លាកក្លោងទ្វារការដ្ឋានសាងសង់មន្ទីរពេទ្យមិត្តភាពកម្ពុជាចិនព្រះកុសុមៈបានរុះរើទម្លាក់ចោលវិញហើយ បន្ទាប់ពីលើកបានប្រមាណ២ម៉ោង ដោយសរសេរជាភាសាចិនធំពីលើភាសាខ្មែរ ហើយរងការរិះគន់ពីប្រជាពលរដ្ឋក្នុងបណ្តាញសង្គមនោះ ។
តាមព័ត៌មានឲ្យដឹងថា ស្លាកក្លោងទ្វារការដ្ឋានសាងសងមន្ទីរពេទ្យនោះបានលើកនៅរសៀលថ្ងៃទី២៤ ខែតុលា ឆ្នាំ២០១៨ ដើម្បីគ្រោងនឹងបើកការដ្ឋានស្ថាបនានៅថ្ងៃ៣០ ខែតុលានេះដោយក្រុមហ៊ុនចិន ។ នៅពេលលើកស្លាកខាងការដ្ឋានបានសរសេរជាភាសាចិនពីលើដែលជួរទី១ជាអក្សរចិនធំៗ , ជួរទី២ ជាអក្សរចិន និងជួរទី៣ ជាអក្សខ្មែរប៉ុនជួរទី២ ជាហេតុធ្វើឲ្យមានការរិះគន់ជាខ្លាំង ។
ទន្ទឹមនោះមហាជនក៏បានបន្ទោសក្រសួងសុខាភិបាលក៏ដូចជា គណៈកម្មការសាងសង់មន្ទីរពេទ្យនោះមិនបានយកចិត្តទុកដាក់បណ្តោយឲ្យក្រុមហ៊ុនចិនលើកស្លាកតាមចិត្ត ។ តាមព័ត៌មានឲ្យដឹងទៀតថា បន្ទាប់ពីមានការរិះគន់នៅតាមបណ្តាញសង្គមបានប្រមាណជាង១ម៉ោង ស្លាកនោះត្រូវបានដោះទម្លាក់ចោលវិញ ។ តាមគណៈកម្មការមន្ទីរពេទ្យព្រះកុសុមៈ សូមមិនបញ្ចេញឈ្មោះបានឲ្យកោះសន្តិភាពដឹងនៅព្រឹកថ្ងៃទី២៥ ខែតុលានេះថា ការដាក់ស្លាកការដ្ឋានសាងសង់ជាភាសាចិនលើ ជាកំហុសខាងការដ្ឋានសំណង់របស់ក្រុមហ៊ុនចិន ។ មុនការលើកស្លាកគណៈកម្មការបានណែនាំដល់ការដ្ឋានឲ្យសរសេរភាសាខ្មែរលើ និងភាសាចិនក្រោម ស្រាប់តែខាងបច្ចេកទេសបានលើកស្លាកសរសេរភាសាចិនពីលើវិញ ។
តាមគណៈកម្មការរូបនោះបានឲ្យដឹងទៀតថា បន្ទាប់ពីមានបាតុភាពខាងគណៈកម្មការក៏បានណែនាំដល់ការដ្ឋានដោះទម្លាក់វិញហើយនៅវេលាម៉ោងប្រមាណ៨យប់ គឺបន្ទាប់ពីលើកស្លាកនោះរួចរាល់ បានប្រមាណ២ម៉ោងតែប៉ុណ្ណោះ ។
គួរបញ្ជាក់ថា មន្ទីរពេទ្យមិត្តភាពកម្ពុជាចិនព្រះកុសុមៈនេះគម្រោងសាងសងកម្ពស់១១ជាន់ ក្រោមជំនួយរបស់មហាមិត្តចិន ហើយគ្រោងនឹងបើកការដ្ឋានសាងសង់ដោយក្រុមហ៊ុនចិន នៅព្រឹកថ្ងៃទី៣០ ខែតុលា ឆ្នាំ២០១៨ ៕
ចែករំលែកព័តមាននេះ