រាជធានីភ្នំពេញ ៖ អ្នកនាំពាក្យរដ្ឋសភាលោក ឡេង ប៉េងឡុង បានអះអាងថា សម្រាប់ឆ្នាំ២០១៩ខាងមុខនេះ រដ្ឋសភាមានគម្រោងនឹងចំណាយថវិការកើនជាងឆ្នាំ២០១៨ ចំនួន១.៦ នៃថវិកាសរុបបើធៀបនឹងឆ្នាំ២០១៨ ។
ផ្តល់បទសម្ភាសជាមួយក្រុមអ្នកសារព័ត៌មាន ក្រោយកិច្ចប្រជុំគណៈអចិន្ត្រៃយ៍រដ្ឋសភានាព្រឹកថ្ងៃទី២៥ តុលានេះ លោក ឡេង ប៉េងឡុង បានឲ្យដឹងថា កិច្ចប្រជុំក្រោមអធិបតីភាពសម្តេច ហេង សំរិន ប្រធានរដ្ឋសភាពិភាក្សាលើកយកវៀបវារៈចំនួនមួយ គឺការពិនិត្យសេចក្តីព្រាងគម្រោងចំណាយថវិការបស់រដ្ឋសភាឆ្នាំ២០១៩ ។ លោកបញ្ជាក់ថា«អស់លោកបានជ្រាបស្រាប់រដ្ឋសភាមានថវិការស្វយ័ត ហើយថវិកានេះរៀបចំដោយអគ្គលេខាធិការដ្ឋានរដ្ឋសភា ដែលធ្វើតាមការណែនាំពីគណៈកម្មាការសេដ្ឋកិច្ច ហិរញ្ញវត្ថិ ធនាគារ និងសវនកម្មនៃរដ្ឋសភា(គ2) ។
ថវិកានេះបានចាប់ផ្តើមធ្វើមុនការបោះឆ្នោត២០១៨ រហូតមកដល់ពេលនេះបានសម្រេចជាស្ថាពរហើយ នៃគម្រោងថវិការនេះ» ។ លោកគូសបញ្ជាក់ថា«ថ្ងៃនេះអចិន្ត្រៃយ៍បានសម្រេចអនុម័ត ហើយនឹងបញ្ជូនទៅរាជរដ្ឋាភិបាល ដើម្បីបញ្ចូលថវិកាជាតិ ។ ខ្ញុំជម្រាបថា ថវិការដ្ឋសភាឆ្នាំ២០១៩ មានការកើនឡើង១.៦% បើធៀបនឹងឆ្នាំចាស់ » ។ អ្នកនាំពាក្យរដ្ឋសភាក៏បានលើកពីមូលហេតុនៃចំណាយថវិកាសម្រាប់ឆ្នាំ២០១៩ មានការកើនឡើងនេះ ដោយសាររដ្ឋសភាត្រូវធ្វើឲ្យមានសុគត់ភាពជាមួយនឹងព្រឹទ្ធសភា ។ គឺប្រាក់សម្រាប់វិធីបុណ្យផ្សេងៗរបស់ព្រឹទ្ធសភាខុសរដ្ឋសភា អីញ្ចឹងយើងត្រូវធ្វើឲ្យដូចគ្នា ។ ការកើននេះក៏យើងធ្វើតាមគោលការណ៍របស់រាជរដ្ឋាភិបាលដែលបានចេញមកដែរ គឺចំពោះមន្ត្រីរាជការស៊ីវិលប្រាក់ចំណាច់មុខងារត្រូវបានឡើង១០% អីញ្ចឹងយើងត្រូវធ្វើការដំឡើងប្រាក់មន្ត្រីរាជការយើងឲ្យដល់១០%ដែរ » ។ ជាមួយគ្នានោះដែរលោក ឡេង ប៉េងឡុង ក៏បានលើកឡើងថា ប្រាក់មន្ត្រីរាជការត្រូវឡើងប្រាក់ខែដោយសាររាជរដ្ឋាភិបាលសម្រេចលុបក្របខណ្ឌ (គ)ចេញ ដូច្នេះមន្ត្រីដែលឡើងតួនាទី និងក្របខណ្ឌត្រូវតែឡើងប្រាក់ខែ ។ ការកើនថវិការដ្ឋសភានេះ ក្រៅពីករណីមន្ត្រីរាជការដែលបម្រើការងារនៅក្នុងរដ្ឋសភានោះក៏មកពីគម្រោងក្នុងការចំណាយថវិការលើការទិញសម្ភារៈចាស់ចេញ ដោយផ្លាស់ដាក់ថ្មីមកជំនួស ។
ជាងនេះជាគោលការណ៍សម្រាប់អាណត្តិថ្មីនេះ នៅបន្ទប់របស់អ្នកតំណាងរាស្ត្រត្រូវបំពាក់សម្ភារៈតាមតម្រូវការសម្រាប់ធ្វើការផងដែរ ។ ក្រៅពីដាក់សម្ភារៈនៅបន្ទប់សមាជិករដ្ឋសភានោះ ថវិកាក៏គ្រោងចំណាយលើការជួសជុលអគារដ្ឋសភា ព្រមទាំងការធ្វើផ្លូវឡើងទៅកាន់អគា (A) ផងដែរ ៕
ចែករំលែកព័តមាននេះ